26
Aagụ ndu Ízurẹlu ọgu k'ẹbo
1 Lẹ mgbọnwu ono latsuaru bẹ Ojejoje kfuru Mósisu yẹle Eliyéza Érọnu, bụ onye achịjeru Nchileke ẹja; sụ:
2 “Unu gụa ndu Ízurẹlu kpamukpamu ọgu l'ẹnya-ufu l'ẹnya-ufu; tsube lẹ ndu nọwaru ụkporo afa kwasẹru; mbụ ndu dzuwaru oje ọgu lẹ Ízurẹlu.”
3 Yọ bụru lẹ baswangu alị Móabu, nọ l'iku Ẹnyimu Jọ́danu lẹ mgboro Jériko bẹ Mósisu yẹle Eliyéza, bụ onye achịjeru Nchileke ẹja nọdu kfuaru ndu Ízurẹlu; sụ ẹphe:
4 “Unu gụa ndu Ízurẹlu kpamukpamu ọgu; tsube lẹ ndu nọwaru ụkporo afa kwasẹru; mbụ ẹge ono, Ojejoje tụru iya Mósisu l'ekemu ono.”
Ọwaa ndu Ízurẹlu, shi lẹ Íjiputu lụfuta:
5 Ndu eri kẹ Rúbẹnu,
bụ ọkpara Ízurẹlu bụ:
Hanọku, metaru ikfu Hanọku;
Palu, metaru ikfu Palu;
6 Hẹzuronu, metaru
ikfu Hézurọnu.
Kami emeta ikfu Kami.
7 Ndu ono l'ẹphe ha tụko bụru ndu ikfu Rúbẹnu. Ndu ọphu a gụru ọgu tụkoru dụ ụkporo ụnu madzụ ise l'ụnu madzụ tete; l'ụkporo madzụ ishingu lẹ madzụ iri.
8 Nwatibe Palu kẹ nwoke bụ Eliyabu.
9 Ụnwegirima Eliyabu ndu k'unwoke bụ: Nemẹlu; Detanu; mẹ Ebiramu. Ọ bụ Detanu; mẹ Ebiramu-a b'a fọtajeru t'ẹphe bụru ishi lẹ Ízurẹlu; ẹphe etsoru ndu kẹ Kora; kwefuru Mósisu yẹle Érọnu íkè teke ono, ẹphe kwefujeru Ojejoje íkè;
10 alị asaa ọnu tụko ẹphe lẹ Kora lekota ono. Ndu shi etso iya nụ bẹ nwụshihuru nụ; teke ono ọku kegbushijeru ụkporo madzụ iri l'ẹbo l'ụmadzu iri ono. Iphe ono abụru iphe alọ ẹka lẹ nchị.
11 Obenu l'ụnwu kẹ Kora ta nwụshihukwa.
12 Ndu ikfu Símiyọnu
l'ọnu-ufu l'ọnu-ufu ẹphe bụ:
Nemẹlu, metaru ndu ufu Nemẹlu;
Jaminu, metaru
ndu ufu Jaminu;
Jakinu, metaru
ndu ufu Jakinu;
13 Zera, metaru
ndu ufu Zera;
mẹ Shawulu, metaru
ndu ufu Shawulu.
14 Ndu ono tụko bụru ndu ikfu Símiyọnu. Ndu ọphu a gụru ọgu bẹ dụ ụkporo ụnu madzụ ugbo labụ l'ụnu iri madzụ l'ise l'ụkporo madzụ iri.
15 Ndu ikfu Gádu
l'ọnu-ufu l'ọnu-ufu ẹphe bụ:
Zefọnu, metaru
ndu ufu Zefọnu;
Hagi, metaru
ndu ufu Hagi;
Shuni, metaru
ndu ufu Shuni;
16 Ozuni, metaru
ndu ufu Ozuni;
Éri, metaru ndu ufu Éri;
17 Arodi, metaru
ndu ufu Arodi;
Areli, metaru ndu ufu Areli.
18 Ndu ono bẹ tụko bụru ndu ikfu Gádu. Ndu ọphu a gụru ọgu dụ ụkporo ụnu madzụ ugbo ise l'ụnu madzụ l'ụkporo ise.
19 Júda bẹ mụtaru unwoke labụ, ẹpha ẹphe bụ Ẹru; mẹ Onanu. Ọle ẹphe ẹbo nwụshihuru l'alị Kénanu.
20 Ndu kẹ ikfu Júda l'ọnu-ufu l'ọnu-ufu ẹphe bụ:
Shela metaru ndu ufu Shela;
Pẹ́rezu emeta ndu ufu Pẹ́rezu;
mẹ Zera, metaru ndu ufu Zera.
21 Ụnwu kẹ Pẹ́rezu bụ:
Hézurọnu, metaru ndu
ufu Hézurọnu;
mẹ Hamulu, metaru ndu
ufu Hamulu.
22 Ndu ono tụko bụru ndu ikfu Júda. Ndu ọphu a gụru ọgu dụ ụkporo ụnu madzụ ugbo tete l'ụnu madzụ iri lẹ nanụ l'ụkporo madzụ ise.
23 Ndu ikfu kẹ Ísaka
l'ọnu-ufu l'ọnu-ufu bụ:
Tola, metaru
ndu ufu Tola;
Puwa, metaru
ndu ufu Puwa;
24 Jashubu, metaru
ndu ufu Jashubu;
mẹ Shimurọnu,
metaru ndu ufu
Shimurọnu.
25 Ndu ono bẹ tụko bụru ndu ikfu kẹ Ísaka. Ndu ọphu a gụru ọgu dụ ụkporo ụnu madzụ ugbo ẹsato l'ụkporo madzụ ugbo iri l'ise.
26 Ndu ikfu kẹ Zébulọnu l'ọnu-ufu l'ọnu-ufu ẹphe bụ:
Sẹredu, metaru
ndu ufu Sẹredu;
Elọnu, metaru
ndu ufu Elọnu;
mẹ Jahulẹlu,
metaru ndu
ufu Jahulẹlu.
27 Ndu ono tụko bụru ndu ikfu Zébulọnu. Ndu ọphu a gụru ọgu dụ ụkporo ụnu madzụ ugbo ẹsaa l'ụnu madzụ iri lẹ nanụ l'ụkporo madzụ ise.
28 Ndu ikfu kẹ Jósẹfu l'ọnu-ufu l'ọnu-ufu ẹphe bụ:
Manásẹ; mẹ Ífuremu.
29 Ụnwu kẹ Manásẹ bụ:
Makiya, metaru
ndu ufu Makiru.
Makiru bụ nna Gíledu.
Gíledu abụru iya
metaru ndu Gíledu.
30 Ụnwu Gíledu bụ:
Iyeza, metaru
ndu ufu Iyeza;
Helẹku, metaru
ndu ufu Helẹku;
31 Asurẹlu, metaru
ndu ufu Asurẹlu;
Shékemu, metaru
ndu ufu Shékemu;
32 Shemida, metaru
ndu ufu Shemida;
mẹ Hefa, metaru ndu
ufu Hefa.
33 Zelofehadu Hefa ta mụtadu nwata nwoke. Ọ bụ ụnwanyi b'ọ mụshiru. Ẹpha ụnwanyi ono, ọ mụshiru ono bụ Mahula; Nówa; Họgula; Milika; mẹ Tíza.
34 Ndu ono tụko bụru ndu eri Manásẹ. Ndu ọphu a gụru ọgu tụko dụ ụkporo ụnu madzụ ishingu l'ụnu madzụ iri lẹ nanụ l'ụkporo madzụ iri l'ise.
35 Ụnwu kẹ Ífuremu l'ọnu-ufu l'ọnu-ufu bụ:
Shutela, metaru
ndu ufu Shutela;
Beka, metaru
ndu ufu Beka;
waa Tahanu, metaru
ndu ufu Tahanu.
36 Ụnwu Shutela bụ Eranu, metaru ndu ufu Eranu.
37 Ndu ono bẹ tụko bụru ndu ikfu Ífuremu. Ndu ọphu a gụru ọgu dụ ụkporo ụnu madzụ ẹno l'ụnu madzụ l'ụkporo madzụ ise.
Ndu ono tụko bụru ndu eri Jósẹfu l'ọnu-ufu l'ọnu-ufu.
38 Ndu ikfu kẹ Bénjaminu bụ:
Béla, metaru
ndu ufu Béla;
Ashibẹlu, metaru
ndu ufu Ashibẹlu;
Ahiramu, metaru
ndu ufu Ahiramu;
39 Shefufamu, metaru
ndu ufu Shefufamu;
waa Hufamu, metaru
ndu ufu Hufamu.
40 Ụnwu Béla bụ:
Arudu; mẹ Námanu.
Arudu, bụ iya
metaru ndu ufu Arudu;
Namanu abụru iya
metaru ndu ufu Namanu.
41 Ndu ono tụko bụru ndu ikfu Bénjaminu l'ọnu-ufu l'ọnu-ufu ẹphe. Ndu ọphu a gụru ọgu dụ ụkporo ụnu madzụ ugbo ise l'ụnu madzụ iri l'ẹno.
42 Ndu ikfu kẹ Dánu l'ọnu-ufu l'ọnu-ufu ẹphe bụ:
Shuhamu, metaru
ndu ufu Shuhamu.
Ndu ono tụko bụru ndu ikfu Dánu l'ọnu-ufu l'ọnu-ufu ẹphe.
43 Ẹphe tụko bụru ndu ufu Shuhamu. Ndu ọphu a gụru ọgu dụ ụkporo ụnu madzụ ugbo ẹsato l'ụnu madzụ.
44 Ndu ikfu kẹ Ásha bụ:
Imuna metaru ndu ufu Ịmuna;
Ishivi metaru ndu ufu Ishivi;
waa Beríya, metaru ndu ufu Beríya.
45 Ụnwu Beríya bụ: Heba, metaru ndu ufu Heba; waa Malikẹlu, metaru ndu ufu Malikẹlu.
46 Ọ bụ nwata nwanyi lanụ bẹ Ásha mụtaru. Ẹpha nwata ono bụ Séra.
47 Ndu ono tụko bụru ndu ikfu Ásha. Ndu ọphu a gụru ọgu dụ ụkporo ụnu ugbo ishingu l'ụnu madzụ iri l'ẹto l'ụkporo madzụ iri.
48 Ndu bụ ndu eri Náfutali
l'ọnu-ufu l'ọnu ẹphe bụ:
Jahuzẹlu, metaru
ndu ufu Jahuzẹlu;
Guni, metaru ndu ufu Guni;
49 Jeza, metaru
ndu ufu Jeza;
waa Shilemu, metaru
ndu ufu Shilemu.
50 Ndu ono tụko bụru ndu ikfu Náfutali l'ọnu-ufu l'ọnu-ufu ẹphe. Ndu ọphu a gụru ọgu dụ ụkporo ụnu madzụ ugbo ise l'ụnu madzụ iri l'ẹto l'ụkporo madzụ iri.
51 Iphe, ndu Ízurẹlu kpakọru dụ abụru ụkporo ụnu madzụ ugbo ụkporo ẹto l'ụkporo ụnu madzụ iri l'ise l'ụnu madzụ ẹno l'ụkporo madzụ ishingu l'ụmadzu iri.
Ndu Ízurẹlu awa alị ono, ẹphe eje eburu ono
52 Ojejoje asụ Mósisu:
53 “Ọo ndu-a bẹ aa-washịru alị ono t'ọ bụru òkè-iphe, ẹphe ketaru. Ndu nọnu e-keta l'ẹge ẹphe ha l'ọnu-ọgu.
54 Ndu ha nshinu bẹ ịi-wẹ alị, ha nshinu. Ndu ọphu ha nwanshị; bẹ ịi-wẹ alị, ha nwanshịi. Ndu ọphu nọnu e-keta l'ẹge ẹphe ha l'ọnu-ọgu.
55 Alị ono bụ ẹnwa bẹ aa-tụ gude washịa ya. Aa-wa iya l'ikfu l'ikfu; ndu ọphu nọnu; ẹphe eketa òkè iya nk'ẹphe l'ikfu nk'ẹphe.
56 Ọ bụ ẹnwa bẹ aa-tụ gude washịaru ndu ọphu ha nshinu; mẹ ndu ọphu ha nwanshịi alị ono.”
Aagụ eri Lívayi ọgu
57 Ọwaa ẹge e gude gụa ndu ikfu kẹ Lívayi l'ọnu-ufu l'ọnu-ufu:
Geshọnu metaru
ndu ufu Geshọnu;
Kohatu, metaru
ndu ufu Kohatu;
Merari emeta
ndu ufu Merari.
58 Ndu ọwaa bẹ bụkwaphu ndu ikfu Lívayi:
Ndu ufu Libíni;
ndu ufu Hẹ́buronu;
ndu ufu Mahuli;
ndu ufu Mushi;
mẹ ndu ufu Kora.
Kora bụ iya metaru Amuramu.
59 Ẹpha nyee Amaramu bụ Jekobẹdu, bụ nwatibe Lívayi. Jokebẹdu bụ nwata nwanyi, a mụtaru Lívayi lẹ Íjiputu. Ndu ọ mụtaru Amuramu bụ Érọnu; mẹ Mósisu; waa Miriyamu, bụ nwunne ẹphe kẹ nwanyi.
60 Érọnu bụ nna Nadabu; Abihu; Eliyéza; waa Itama.
61 Nadabu yẹle Abihu bẹ nwụhuru nụ teke ẹphe gude ọku, ẹ-ta dụdu nsọ kpọoru Ojejoje ngwẹja ọku.
62 Ndu a gụru ọgu l'eri Lívayi; mbụ unwoke ẹphe, nọwaru shita l'ọnwa lanụ kwasẹru bẹ kpakọru dụ ụkporo ụnu madzụ ugbo labụ l'ụnu madzụ iri l'ẹsaa l'ụkporo madzụ iri. Ẹ ta gụdu ẹphebedua teke a gụru ndu Ízurẹlu ndu ọphunanu; kẹ l'e te kevuduru ẹphe òkè lẹ Ízurẹlu.
63 Ndu ono bụ ndu Mósisu yẹle Eliyéza, bụ onye achịjeru Nchileke ẹja gụru ọgu; mbụ ndu ono, gụru ndu Ízurẹlu ọgu lẹ baswangu alị Móabu l'iku Ẹnyimu Jọ́danu lẹ mgboro Jériko.
64 Ndu ono ta dụdu l'ẹphe ha, tso lẹ ndu ọphu Mósisu yẹle Érọnu, bụ onye achịjeru Nchileke ẹja gụru ọgu teke ono, ẹphe gụru ndu Ízurẹlu l'echi-ẹgu ono.
65 Ishi iya abụru lẹ Ojejoje sụru ndu Ízurẹlu ono l'ẹphe nwụhufutaje l'echi-ẹgu ono. Ẹ tọ dụdu m'ọo onye lanụ, phọduru nụ l'ime ndu ono; a gụfu Kálẹbu Jefune yẹle Jóshuwa Nunu.