51
Egvu-ọma, Dévidi deru nụ onye ishi egvu
Teke o deru iya bụ teke onye nkfuchiru Nchileke, bụ Nétanu byatsụaru nk'iya bya ekfuaru iya l'o meru ẹji lẹ yẹle Betisheba zẹru
1 Nggụbe Ojejoje, ị bụ onye obu-ọma.
Ẹ tii gbanwejedu agbanwe.
Byiko; phụaru mu imiko.
Gude nụ k'eze obu-imiko ngu
fuchafu iphe dụ ẹji mu!
2 Safụkotanu iphe dụ ẹji mu l'ọ ha;
nggu efufukota mu
ẹjo iphe, mu meshiru ngu.
3 Kẹle mu maru ẹge mu
ngetaberu ngu ọkpa l'ishi;
ọphu mu azahajẹdu ẹjo iphe mu azaha.
4 Ọ bụ nggụbedua gẹdegede;
bẹ mu mesweru.
Mu mewaru iphe ị sụru l'ọ dụ ẹji.
Ọo ya bụ l'iswi dụ ngu
mma l'ikpe, i kperu mu;
ụta ta dụ ngu l'ikpe,
ị nmaru mu.
5 Mu shiru teke a mụru mu
bụtaru onye eme ẹji.
Mbụ lẹ mu shiru teke nne
mu tsụtaru ime mu bụtaru ẹjo madzụ.
6 Iphe iile ẹnya iya lẹ ndzụ
madzụ bụ ire-lanụ.
Zinua mu mmamiphe ngu.
7 Gudenu isopu saa mu;
tẹ mu chahụ dengu!
Saa mu tẹ mu ka eberugo ọcha ụcha!
8 Menua t'ẹhu tsọo mu ẹna;
mu etee ẹswa;
k'ọphu mubẹ onye ono,
i tsuru pyaapyaa ono e-te ẹswa.
9 Lesweta nụ ẹjo iphe, mu meshiru;
nggu efufukota iphe dụ ẹji,
mu meru l'ọ ha!
10 Nggụbe Nchileke; menua tẹ
obu gụa mu iphoro;
nggu anụ mu ume ọphungu;
k'ọphu mu a-nọdu anụru ngu okfu!
11 Ba achịfukwa mu l'ifu ngu;
ọphu ị nafụkwa mu
Ume-dụ-Nsọ ngu!
12 Menua tẹ ẹhu-ọtso-ẹna mu laphuta azụ ọdo;
mbụ ẹhu-ọtso-ẹna ono,
shi l'adzọfuta ono,
ị dzọfutaru mu ono.
Nggu emee tẹ ome
uche-obu ngu heje mu uhere;
k'ọphu mu e-shihu ike.
13 Teke ono; mu adụje ike
l'akpọ-ziru ndu emeswe
ngu nụ ụzo nke ngu;
ndu eme ẹjo iphe aghakọbe lakfuta ngu.
14 Dzọfutanu mu l'ikpe ọchi, mu gburu;
nggụbe Nchileke;
kẹ l'ọ bụ nggu bụ Nchileke,
adzọfutaje mu nụ.
Teke ono; mu araa ya arara
l'ị bụ onye doberu ẹka ndoo.
15 Nggụbe Nnajiufu; kpuhaa mu ọnu;
k'ọphu mu a-jaa ngu ajaja.
16 Ndẹge ọ bụ l'ọo ngwẹja;
bẹ iile ẹnya iya; mẹ mu
egwokwaaru ngu iya.
Obenu lẹ ngwẹja te
emejekwa t'ẹhu tsọ ngu ẹna;
m'o -ruhuru; ọ bụru ngwẹja-ukfuru.
17 Ngwẹja ọphu Nchileke
anatajẹ bụ aphụ oji madzụ
obu
kẹ iphe o meru.
Onye aphụ jiru obu
k'iphe dụ ẹji, o meru;
bya ataa onwiya ụta;
bẹ nggụbe Nchileke
ta akpọkwa ẹbo-ẹbo l'afụ.
18 Phụnuaru Záyọnu imiko;
mee ya t'ọ jaa ajaja.
Kpụnua ụpho-mkpuma Jerúsalemu.
19 Teke ono; eegwolaaharu
ngu ngwẹja, gbaru nụ;
ngwẹja-ukfuru atsọlahaa ngu ẹna;
a wataru ngu ogbushiru
oke-eswi l'ẹnya-ngwẹja ngu.