9
No Kapangokom Ni ĀPO
Naboya ko si Āpo a mayteytēnek do bīt naw no altar. Inbilin naw nya a kāna, “Māswen mo totok saya no parey* no Timplo tan magon-gon pondasyon na saya. Loyohen mo kan inolay mo a masday do oho dan tawotawo saya. Siraw nabidin saw a tawotawo, ki ipadiman ko sanchi do ispāda. Abanchiw makapayyayo, kan abanchiw makalības. Aran machikolkol sa do yanan no kadiman, alneten ko sanchi. Aran komayat sanchi do hanyit, pagchinen ko sanchi. Aran tomayo sa do totok no Tokon a Karmel, chichwasen ko sanchi kan tiliwen ko sa. Aran taywan da yaken do irahem no tāw, bilinen konchiw rakohaw a boday a mangay a omsonyit dyira. Aran ihtot da san kabōsor da a akawen, ibilin konchi a ipadiman da sa do ispāda. Nawrinchiw chichiban ko iyaw kararayaw da, iyabaw kasidong ko sira.”
 
Si Āpo a DYOS a Manakabalin do Tābo,
saliden naw tanaya kan malonag,
kan magdong-aw tabo a omyan daw.
No tābo tanaya, ki magalloallon a akmas oksong a Nile do Egipto.
Mapatnek si ĀPO so bahay na do hanyit,
kan pangayen naw pondasyon na do tanaya.
Tawagan naw ranom do tāw,
kan padohen na do hapotayan tana.
Si ĀPO ngaran na.
Binata ni ĀPO a kāna, “Inyo a tawotawo do Israel, akma kamo siras taga Etiopyaw dyaken. Inihtot ko saw Pilisteo a yapo do Kreta kan siraw taga Siryaw a yapo do Kir a akmas nakaihtot kwaw dyinyo a yapo do Egipto. Yaken si Āpo a DYOS, mangsipsipot so nya magagatosen a tawotawo do pagāryan no Israel. Rarayawen ko sanchi a abohen do hapotayan tana, ki rarayawen ko abanchi a tabo iyaw kapotōtan Jakob.
“Do mandar ko, yokoyoken konchiw tawotawo do Israel. On, yokoyoken ko sanchi a karāman dan tabo saya nasyon tan mapakaro tabo a abo so sirsirbi. 10 Tabo no magagatosen do tawotawo ko, ki madiman sanchi do ispāda. On, tabon makabata sya a kon da, ‘Abanchiw didigra a mangyoba mana makasngen dyaten.’ ”
No Kapakabangon a Mirwa No Israel
11 Binata ni ĀPO a kāna, “Īto danaw araw a pirwahen ko na bangonen pagāryan ni Dabid a mayarig do asa nalasa a bahay. Paysonongen ko sanchiw ahad na, kan pabidyen konchiw plastar naw. Bangonen kan payparinen konchi a akmas sīgod a kayayan na. 12 Tan komwan, sakōpen nanchi no tawotawo a Israel nabidin saw a tana no Edom kan tabo a nasyon a dyaken do nakarahan.” Komwan chirin ni ĀPO a mangparin anchi sira syay.
 
13 Binata ni ĀPO a kāna, “Īto dana saw araw
a dyi sa makagaben magranyi do kāro no āpit,
kan dya kadasan no maypaypalek so maynoy a obas.
Maytetedted sanchiw bayo a palek a yapo do katokotokonan,
kan maychawoyog anchi do paytoytokonan.
14 Pabidyen ko sanchiw naakaw saw a tawotawo ko a Israel do tana da.
Patneken da sanchi a mirwaw nararayaw saw a syodad da kan omyan dana sa daw.
Maymoha sanchi so obas, kan inomen da panchiw palek naw.
Homakaw sanchi, kan kanen danchiw maāpit da.
15 Imoha konchiw tawotawo a Israel do tana a intoroh ko dyira,
kan mabagot pa sabanchi a mirwa.”
Nyaw binata ni ĀPO a Dyos nyo.
* 9:1 Myan maymemeh a arti do totok saw no parey. 9:2 Do Hebreo, ki “Sheol”. 9:3 Gen. 1:21