15
Iyaw Nakapagōngar ni Kristo
1 Changori a kakakteh, chakey ko a ipanakem dyinyo rinawat nyowaya a Maganay a Dāmag a inkasaba ko dyinyo a iyaw paydadatokanaya no kapanganohed nyo.
2 On, iyaw nyaya Maganay a Dāmag a inkaskasaba ko dyinyo, ki iyaw paynamotan kaisalakānan nyo an nāw nyo a manganohed, malaksid an sin-aanohed kamo.
3 On, inparawat ko dyinyo rinawat kwaya a kasisītaan a minsāhi a sigon do naitolasaw do Masantwan a Tolas a nadiman si Kristo a maynamot do gatogatos ta.
4 On, naitanem kan nagōngar do chatatdo naw a araw sigon do naitolasaw do Masantwan a Tolas.
5 Sinpangan na, napaboya di Pedro kan somnarono dyirad apostolis naw.
6 Sinpangan na, napaboya pa dyirad naychichipeh saw a nasorok a dadima gasot a kakakteh, as kan kārwan na pa dyiraw sibibyay. Ki aran komwan, nadiman dana saw kadwan dyira.
7 Katayoka no nawri, napaboya di Santiago, kan sinpangan na,, siraw tabo apostolis naw.
8 Kapanawdyan na, aran yaken, ki napaboya dyaken a aran dya ko a natawagan a akmas nakatawag daw no nanawhen saw ni Jesos.
9 Ta an yaken, ki kabobodisan ako do tabo apostolis saw, kan maikari akwaba matawagan so apostol, ta nilala ko saw manganohed saw do Dyos do nakarahan.
10 Ki maynamot do parābor no Dyos, ki nayparin ako a asa a apostol na, as kan maydamnay a maboyaw asi no parābor na dyaken, ta arwāro nagbānagan no nayhohopagan ko kan siraw tabo saw a apostolis. Ki iyaw nyaya kapasnek ko, bōkod kwaba kaparin, an dya kaparin no paraboraya no Dyos a myan dyaken.
11 Ki masisīta aba an sino āros tinarabako dyamen. No masisīta, ki naikasaba danaw Maganayaya a Dāmag, kan inanohdan nyo.
No Maynamot do Kapagōngar Ta
12 Changori, do kayan namenaya a nangikaskasaba so nakapagōngaraya ni Kristo, āngo ta batahen kadwan dyinyo a dya mangōngar nadiman?
13 Ki an oyod a abo kapagōngar no nadiman, ayket na, nagōngar aba si Kristo.
14 As an dya nagōngar si Kristo, ayket, apabaw sīrbi no ikaskasaba namenaya dyinyo, as kan apabaw sinpaspangan nakapanganohed nyo.
15 Ki nawri aba lang, ta an oyod a dyi sa magōngar nadiman, bāli bayataw kami na a saksi no Dyos. Ta pinaneknekan namen a si Āpo Dyos, ki pinagōngar nas Jesos. Ki syimpri an abo kapagōngar, pinagōngar aban Āpo Dyos si Jesos.
16 Ta no kaoyodan na, ki an dyi sa magōngar nadiman, ayket, syirto a dya nagōngar si Kristo.
17 As an dya nagōngar si Kristo, abaw sinpaspangan no kapanganohed nyowaya, as kan ari kam pad nawon do gatos nyo.
18 On, an komwan, ayket, siraw nadiman saw do kayan da a manganohed di Kristo, ki alit na nabo sa a abos namnāma.
19 Kakakteh ko di Kristo, an iyaw kapangnamnāma ta di Kristo, ki para do byay taya lang do tanaya as naw dana, ayket, yaten danaw makapimpiman do aran sino do lōbongaya.
20 Ki no kaoyodan na, ki oyod a nagōngar si Kristo. As maynamot dya, ki nawriw pakapaneknekan ta a aran siraw manganohed a nadiman dana, ki magōngar sanchi.
21 Ta maynamot do kaparin no asa tawo a si Adan, ki madiman tawotawo, ki sichangori, maynamot do kaparin no asa tawo a si Kristo, ki myan danaw kapagōngar no nadiman.
22 Ta tabo tawotawo, ki madiman a maynamot ta kapotōtan tas Adan. Ki komwan maparin dyirad machichasa saya di Kristo, mapagōngar sanchi a tabo a akmas Kristo.
23 Ki sigon do ornos na, syimpri, nanma si Kristo a nagōngar. Sinpangan na, do kapaybidi naw anchi, somarono dana sanchiw tawotawo naw a magōngar.
24 Do dawri dananchiw panongpalan. On, abohen sanchin Kristo tabo a dya boya a magtotoray, tabo a myan so toray kan panakabalin, as kan do dawrinchi, iparawat nanchi a tabo iyaw kapagtoray na do Dyos Ama a Manakabalin.
25 Ta dawa machita a nāw na magtoray si Kristo a mandad katokap na tabo siras kabōsor na saw.
26 As no manawdyi anchi a kabōsor a abohen na, ki kadiman.
27 Ta myan naitolas do Masantwan a Tolas a kāna, “Tabo nonchi, ki ipaitoray sanchi no Dyos di Kristo.” Ki maawātan ta iyaw bata naya a, “Kaipaitoray na sya tabo,” ki mairāman abaw Dyos a maitorayan do tabo myan saya do tokapan Kristo.
28 Ki anchan maipaitoray dana tabo di Kristo a anak no Dyos, ki ipaitoray nanchiw mismo a inawan na di Āpo Dyos a Āmang na. Do dawrinchi, komplito dananchiw kapagtoray no Dyos do tabo.
29 Changori, sigon do dadakay dan kadwan, magpabawtisar sa a maynamot dyirad nadiman dana. Ki no iyahes ko dyira: An dyi sa manganohed do kapagōngar no nadiman, aryoriw sīrbin nya dadakay da? Āngo hahawen da do dawri a dadakay?
30 Aran yamen, an oyod a dya magōngar nadiman, āngo ta pirmi kami a mangiposta so byay namen?
31 On, ipodno ko dyinyo a kakakteh a do kararaw, ki nakasagānaw kadiman dyaken! Sigorādohen ko nyaya a akmas kasigorādo no kaitangsit kwaya dyinyo a maynamot do kapachichasa nyowaya di Kristo Jesos a Āpo ta.
32 An oyod a dyi sa magōngar nadiman a akmas myanaw do kapangipagarop dan kadwan, ayket na, aba polos sirsīrbi no nakalidyatan kwaya do syodadaw a Epeso. Ta oyod a nalidyatan ako do dya, ta mayarig sa do marongsot saw a animal siraw nangkontraw dyaken. On, asyo gon-gona ko, an dya nagōngar nadiman? Maganaganay an tod ta mabyay a maragsak a akmas batabatahen daw a, “Koman kan minom ta, ta anchan delak, ki madiman ta na.”
33 Maallīlaw kamo aba, ta no panyinyirinaw, ki oyod a kāna, “No tawowaw a machirayarayay dyirad marahet saw a tawotawo, ki marārayaw anchiw maganay a dadakay na.”
34 Maybidi kamo pakono do sīgodaw a maganay a kapangtokto nyo, kan maygaygatos kamo paba. Ibahey ko nya tan masnekan kamo, ta myan saw kadwan dyinyo a dya makapatak so Dyos.
No Maynamot do Kapagōngar no Inawan
(2 Kor. 5:1-5)
35 Sigōro, iyahes dan kadwan dyinyo a kon nyo, “Na, maypāngo paro kapagōngar da no nadiman? Maypāngo paronchiw kīta no inawan da?”
36 Ayya! Kabo pan arang nyo. An myan imoha mo a botoh, maypāngo paro katobo na, an dyi pa mahtaw kodit naw.
37 Ki an maymoha kamo so botoh no trīgo mana kadwanaw a botoh, ki imoha mwabaw sīgod danaw a rakoh a akmas karakohaw no hahawen mwaw, an dya iyaw botoh naw lang.
38 Ki si Āpo Dyos makatoneng a manoroh so atngeh no nawri a botoh. Ta kāda kīta botoh, itoroh naw maitotopaw a atngeh na.
39 Komwan pa kāda inawan a pinarswa no Dyos. Maytarek asi no tawo kan binyay. Masaw a maytarek asi no manomanok kan among.
40 Matarek pa saw myan do hanyit kan siraw myan do lōbongaya, as kan iyaw kapintas kan katan-ok da, ki matatarek.
41 Aran iyaw araw, ki myan bōkod na kapintas. Masaw bohan kan siraw bitohen saya, matatarek sas kapintas. On, iyaw kāda bitohen, ki myan bōkod da kapintas.
42 Komwan maparin an mapagōngar saw nadiman. Iyaw inawan taya, ki mahta an maitābon. Ki an magōngar dana, syimpri, mahta paba, kan polos dana dya madiman.
43 On, makabābaba kan dalotaytay an maitābon, ki mapintas kan mabīleg an magōngar dana.
44 An maitābon, ki akmas gagāngayaw a inawan a nainlōbongan. Ki an mapagōngar dana, asa dana naispiritwan. No chakey na batahen, ki an myan inawan ta a mahta do lōbongaya, masigorādo a myan inawan ta a naispiritwan a maitotop do byay tad hanyit.
45 Ta akmas naitolasaw do Masantwan a Tolas a kāna, “No nanoma a tawo a si Adan, ki nanyeng a natorohan so byay do tanaya.” Ki myan paw matawagan so nanawdyi a Adan, as kan iya, ki si Kristo. Iyaw manorotorohaya so naispiritwanaya a byay a abos pandan.
46 Ki aran komwan, naknakmen ta a manmanmaw inawan taya a mahta, as kangay no naispiritwanaw a inawan ta.
47 Iyaw dāmwaw a Adan, ki yapo do tana, ta dawriw nakapōtaran na. Ki iyaw somnaronwaya Adan a si Kristo, ki yapo do hanyit.
48 On, maynamot ta yapo do tana si Adan, ki aran yaten sichangori, ki yapo ta a tabo do tana. Ki maynamot ta yapo do hanyit si Kristo, akma tanchi dya do hanyit an machichasa ta dya.
49 As dawa, sichangori, naipariho ta pa do tawowaya a yapo do tana a pinarswa no Dyos. Ki do masakbayan, machipariho ta nanchi do inawanaw no Tawo a Yapod Hanyit, as kan si Jesos nyaya.
No Kapagballīgi a Maynamot di Jesos.
50 Iyaw nyayaw chakey kwaya batahen dyinyo a kakakteh: Siraw inawan taya a myan so asi kan raya, ki maparin saba mabyay do hanyit a pagtorayan Āpo Dyos. Ta siraw inawan taya a mahta, ki maparin saba mabyay a abos pandan.
51 Adngeyen nyo yaken, ta ibahey ko dyinyo plāno no Dyos a aran dyi na inpakatoneng do nakarahan. Madiman tabanchi a tabo. Ki anchan kapaybidi ni Āpo Jesos, mabaliwan anchiw inawan taya a tabo.
52 On, mabaliwan tanchi a pagripat a akmas kalistwaw no kakimit no mata. Oyod a maparin nyaya do kapanawdyanaw anchi a kaalop no trompīta. Ta do dawrinchi, ki omyeng anchiw trompītaya, as kan mapagōngar sanchiw nadiman, as kan matorohan sanchis inawan a dya madiman. As yaten a sibibyay pa do dawri, ki mabaliwan tanchi.
53 Ta iyaw inawan taya a mahta, mabaliwan anchi so dyi narana kahtan. Mana iyaw madimanaya a inawan ta, ki magbaliw anchi a dyi dana madiman.
54 As dawa, anchan mabaliwan danaw inawan taya a mahta so dyi narana kadimanan kan kahtan, maparin dananchiw naitolasaw do Masantwan a Tolas a kāna, “Naābak dana si Kadiman, kan komplito danaw nakapadso na.”
55 Dawa, maparin ta na batabatahen,
“Aryoriw kapangābak no Kadiman?
Aryoriw panonyit na?”
56 Iyaw gatos panghapan no kadiman so panonyit na, as iyaw dyi taw a matongpal a linteg iyaw panghapan no gatos so bīleg na.
57 Ki magyāman ako do Dyos, ta iyaw manoroh dyaten so kapagballīgi ta a maynamot di Āpo ta a Jeso-Kristo.
58 Dawa, chadaw kwa kakakteh, nāw nyo pakono a mahnyi kan dya mabdibdis do kapanganohed nyo. Pirmi nyo a ibōkot tarabāko nyowaya a magsīrbi di Āpo, ta chapatak nyo na a sayang abaw kapagsīrbi nyo do Dyos.