3
Siraw Mawnged Paw do Kapanganohed Da
1 No kaoyodan na kakakteh, ki do kayan ko paw dyinyo do nakarahan, naychirin akwaba dyinyo so akmas nakapaychirin kwaw dyirad tawo saw a nakneb dana do Ispirito no Dyos. No nakapaychirin ko dyinyo, ki akmas gagāngayaw a kapaychirin ko dyirad tawotawo saw do lōbongaya a adekey pa do kapanganohed.
2 Mayarig kamo do tagibi, ta gātas paw inpasepsep ko dyinyo a maynamot do dyi nyo a kaawātan so mararahem pa saw a nanawo. As sichangori, ki ari kamo payad nakasagāna koman so matwa.
3 Ibahey ko nyaya dyinyo a maynamot ta manda sichangori, ki nainlobōngan payaw kapangtokto nyo kan dadakay nyo. Oyod nyaya, ta no pakaboyan a tawotawo na paynyo no lōbongaya, ki siraw dadakay nyo saya a kapaysin-aapal kan kapaydidiman. An komwan kamo, ki nawriw pakaboyan a maybibyay kamo pa a magtongpal do dadakayaya no lōbong. Oyod abawri?
4 Ta an myan makabata dyinyo a kāna, “Oy, an yaken, ki rārayay na yaken Pablo,” as myan kadwan a makabata sya a kāna, “Rarayay na yaken Apolos,” mangipaboya abawriw a nainlobōngan paw dadakay nyo?
5 Iktokto nyo nyaya: Sino a oyod si Apolos, kan sino ako a si Pablo? Mayengay kami abawri a tobotoboyen lang no Dyos a inosar no Dyos tan nawriw naynamotan nakapanganohed nyowaya? On, ta kāda asa dyamen, ki parinen namen intalek saya no Dyos dyamen a tarabāko.
6 Iyārig koynyo do asa a bengkag. Yaken naymoha so chirin no Dyos dyinyo, as si Apolos nangsibog, ki si Āpo Dyos danaw nangparakoh sya.
7 Masisīta abaw maymohaw mana iyaw mangsibsibogaw sya. No masisīta, ki si Āpo Dyos, ta iyaw maparakoh sya.
8 Abaw naytarkan da no naymohaya kan nangsibogaya, ata pariho sa do salapen no Dyos, ki magon-gonaan sanchi sigon do pinarin katakatayisa dyira.
9 Ta an yamen, ki makakayban kami a maytaytarabāko a magsīrbi do Dyos. As an inyo, ki maiyarig kamo a pinakabengkag no Dyos.
No Pangarig a Maynamot do Kapatnek so Bahay
Maiyarig kamo pa do asa bahay a patneken no Dyos.
10 Maynamot do nakaosar kwaya so sāgot no Dyos dyaken, naytarabāko ako a akmay asa sanay a mapatnek so bahay. Inplastar ko kosto a pondasyon, kan matatarek sanchiw tawotawo a omtongtong sya. Ki aran komwan, machita a siaannad kāda tawo, kan machita a kosto kapaytarabāko na,
11 ta abaw matarek a osaren tawo a pondasyon, an dya iya lang inosaraw ni Āpo Dyos a si Jeso-Kristo.
12 Tongtongen ko pangārig kwaya a maynamot do kapamatnek so bahay. Myan saw mangosar so balitok, pirak, mana mapapateg saw a bato do kapamatnek daya do hapotaya no pondasyonaya. Ki siraw kadwan saya, ki kayo, bochid, mana garamiw osaren da.
13 Ki do arawaw anchi a kapangokom ni Āpo Dyos so tabo no tawotawo, ki maiparang anchiw natarabakwan katakatayisa. Ta iyanchiw apoyaw do dawri a chimpo, ki nawrinchiw pangtenneb so klasi no tarabāko a pinarin katakatayisa.
14 An malasātan naw apoyaw no nawri a napatnek do hapotaw no pondasyon, magon-gonaan anchiw nawri a tawo.
15 Ki an masosohan tarabākwaw no asa tawo, ayket, mabo nanchiw gon-gona na. Ki aran komwan, ki maisalākan anchi a akmas asaw a tawo a nakalāsat do nakanamayaw a bahay na, ta apabaw pakaboyan so tinarabakwan naw.
16 Sichangori, chapatak nyo abawri a inyo a tabo a manganohed, ki mayarig kamo do timplo a yanan no Dyos, as kan omyan danaw Ispirito no Dyos dyinyo?
17 As dawa, rārayawen anchi no Dyos aran sino a mangrārayaw so timplo na. Ta no timplo no Dyos, ki naibidang dana masantwan a yanan, as kan inyo, ki maibidang kamo na a timplo na.
Abos Sinpaspangan do Dyos Sīrib no Tawo
18 Allilawen nyo abaw inawan nyo ah. An myan makabata masīrib a maynamot do kinasīribaya no lōbong, maganaganay pa adayo an tadyichokodan nawri a tawo iyaw sīribaya tan rawaten naw oyod a sīrib a yapo do hanyit.
19 Ta do salapen no Dyos, tabo a ibidang no lōbongaya a kinasīrib na, ki abos sinpaspangan dya. Ta akmas naitolasaw do Masantwan a Tolas a kāna, “Osaren no Dyos sidap daw no maysinsīsiribaw a mismo da pakaridosan.”
20 Asa pa, “Chapatak ni Āpo a abo sirsīrbi no kapangtokto da no mamasīrib saya do lōbongaya.”
21 As dawa, abo pakono tawo a mangipangas so kaparin no tawo. Ta no kaoyodan na, ki intoroh ni Āpo Dyos dyinyo tabo pinarswa na.
22 On, dyira nyo tabo. Ta aran si Apolos kan si Pedro, mana yaken, ki tinoboy ni Āpo Dyos yamen a magsīrbi dyinyo. Masaw do lōbongaya, byay, kan kadiman, siraw myan sichangori mana aran āngo a maparin do masakbayan, ki dyira nyo sa tabo.
23 As dyira naynyo ni Kristo, as si Kristo, ki dyira no Dyos.