9
No Dasal ni Daniel
1 Si Daryos a taga Mede a pōtot ni Ahasweros, ki napatnek a āri do pagāryan no Babilonya.
2 Do nanōma a tawen no kapagāri na, yaken a si Daniel, natonngan ko iyaw kapachipandanchi no nāw no nakarārayaw no Jerosalem, ki papito a poho a katawen. Iyaw nya, ki yapo do masantwan saw a libro a naibasar do chirin ni ĀPO a naitoroh di propīta Jeremiyah.
3 Sipapasnek ako a naydasal kan nangdakdaw di Āpo Dyos. Nagayonar ako, naylaylay ako so makersang, as kan naydisna ako do ahbek.
4 Naydasal ako di ĀPO a Dyos ko, kan inpodno ko gatos dan tawotawo ko a kon ko, “O Āpo Dyos, mabīleg kan makaskasdāaw ka. Tongpalen mo intōlag mo kan nāw na a kadaw mo dyirad tabo a madaw dyimo kan magtongpal siras bilbilin mo.
5 Naygatos kami kan pinarin namen madi. Siraw kaparin namen, ki marahet. Nagribīldi kami a somniwal do bilbilin mo kan siraw pangeddeng mo.
6 Inadngey namen sabaw no pachirawatan mo sa a propīta a naychirin do toray no ngaran mo dyirad ar-āri namen, siraw prinsipi namen, kan siraw kapoonan namen, kan do tabo a tawo do dya a tana.
7 “O Āpo, malinteg ka. Ki nataloban rōpa namen so kasnek akma sicharaw. On, iyaw kasnek, ki dyira dan tawotawo no Joda, siraw omyan do Jerosalem, kan tabo tawotawo no Israel a pinaychawpit mo do nasnasyon a masngen kan mateng a maynamot do dyi da a kapodno dyimo.
8 O ĀPO, yamen kan siraw ar-āri namen, prinsipi, kan siraw kapoonan namen saw, ki nataloban rōpa namen so kasnek a maynamot ta naygatos kami dyimo.
9 O Āpo a Dyos namen, māsisyen kan mamakawan ka a aran nagribīldi kami dyimo.
10 Nanganohed kami aba dyimom ĀPO a Dyos do dyi namen a nagtongpalan so linlinteg mo a inpaitoroh mo dyirad pachirawatan mo a propīta.
11 Tabo no tawotawo no Israel, ki nakagatos sa do linteg mo, kan somniwal sa a chinaskeh daw manganohed dyimo.
“As dawa, iyaw no abay kan kaokom a naitolas do Linteg ni Moyses a pachirawatan no Dyos, ki nangay dyamen maynamot ta nakagatos kami dyimo.
12 Tinongpal mo inchirin mo a maikontra dyamen kan siraw magtoray dyamen do kaiyangay mo so rakoh a didigra dyamen. Ta do ohbo no tābo hanyit, ki ari pad abo naparin a akmas naparinaw do Jerosalem.
13 Akmas naitolas do Linteg ni Moyses, nangay dyamen tabo nya a didigra. Ki aran komwan mo ĀPO a Dyos namen, pinarin namen aba iyaw no makay-āyo dyimo maynamot ta tinadyichokod namen abaw gatogatos namen kan nakawnot namen abaw kaoyodan mo.
14 Dawa, mo ĀPO, nakasagāna ka a nangyangay so didigraw dyamen. Ta imo no ĀPO a Dyos namen, ki malinteg do tabo kaparin mo, as kan inanohdan namen abaymo.
15 “Changori, mo Āpo a Dyos namen a nangihtot so tawotawo mo do Egipto do panakabalin mo, kan nakapatohosan no ngaran mo a manda sichangori, ki naygatos kami kan marahet saw kaparin namen.
16 Sigon do tabo a malinteg a kaparin mo, padichanen mo paw kasoli mo do Jerosalem a iyaw syodad mo a iyaw masantwanaw a paytokonan. Iyaw gatogatos namen kan gatogatos dan kapoonan namen, ki pinayparin da iyaw Jerosalem kan tawotawo mo a pangoyaw dan tabo do omdibon namen.
17 “Dawa, changori, mo Dyos namen, adngeyen mo pa saw dasal kan akdakdawen no pachirawatan mwaya. As para do kaidāyaw mo, paysedāngen mo pakono rōpa mo do masantwan a yanan mo a narārayaw dana.
18 O Dyos namen, adngeyen mo pa yamen kan chiban mo iyaw karārayaw no syodadaw a mayrara so ngaran mo. Mangdakdaw kami aba dyimo a naibasar do kalinteg namen an dya maynamot do rakoh a kāsi mo.
19 O Āpo, adngeyen mo pa yamen! O Āpo, pakawanen mo pa yamen! O Āpo, ikāso mo pa yamen! O Dyos ko, maybabalay kaba a para do kaidāyaw mo, maynamot ta iyaw syodad mo kan siraw tawotawo mo, ki mayrara so ngaran mo.”
No Kailawlawag ni Gabriel so Padto
20 Tinongtong ko naychirin kan naydasal, kan inpodno ko gatos ko kan gatos dan tawotawo ko a Israel. Inakdakdaw ko do salapen ni ĀPO a Dyos ko a maynamot do masantwanaw a paytokonan na.
21 Do kayan kwaw a maydaydasal, si Gabriel a nagparang a tawo a naboya ko do dāmwaw a parmata ko, ki nangay dyaken do taywara danaw a nakahopag ko do ōras naw no kapangidāton do kamahep.
22 Nangay kan binata na dyaken a kāna, “Daniel, nangay akos changori a manoroh dyimo so kinasīrib kan kapakaāwat.
23 Do nakasiknanaw no kapangdakdaw mwaw, ki inpaw-it naranaw atbay na, as nangay ako a mangibahey sya dyimo, ta chadaw naymo no Dyos. Dawa, amirīsen mo iyaw minsāhi, kan awāten mo iyaw parmataw.
24 “Naikeddeng iyaw maypapito a papito a poho a katawen para do tawotawo mo kan no masantwan a syodad mo a mapatayokanchi so kapaygatos kan karahet da. Tan komwan, maipakawan dananchiw gatos, kan mapatēnek anchiw abos pandan a kinalinteg tan maparin anchi a matongpal parmataw kan padto, as kan mapasantonchiw yananaw a kasasantwan.
25 “Machita a matonngan kan maawātan mo nya: Yapo do kaikeddeng no bilin a mangbangon kan mapatnek a mirwa so Jerosalem a manda do kawara no napidyaw a magtoray, ki myan papito a maypapito. Sinpangan na, do irahem no anem a poho kan dadwa a maypapito, ki mapatnek a mirwa iyaw Jerosalem a myan so kalkalsāda kan napadibonan so minānga do gaganaw no ahad no Jerosalem. Ki maparin anchiw nya do chimpo a kalidyatan.
26 Anchan tayokaw anem a poho kan dadwa kalawas, maipadiman anchi a abos gapo iyaw pinidyaw no Dyos. Sinpangan na, siraw bōyotaw no matarek a magtoray a mangay anchi, ki rārayawen danchiw syodadaw kan no masantwanaw a yanan. No pandan na, ki mangay anchi a akmay layos a mangyangay so gobat kan karārayawan a inkeddeng no Dyos.
27 Machitōlag anchiw nawri a magtoray do āro a tawotawo do papito a katawen. Ki do hobok no papito a katawen, pagsardengen nanchiw sakripīsyo kan kapangidāton. Patneken nanchiw makamwamomwaw a mangrārayaw do masantwan a yanan, kan nāw na daw manda do naikeddengaw a pandan a nawriw kapādo no Dyos so kasoli na dya.”