10
1 Akmas kapangot no nadiman a gōyong so bangbanglo,
komwan dēkey a kabon arang a abāken naw kinasīrib kan dāyaw.
2 Do masīrib a tawo, ki pidyen naw kosto a rarahan.
Ki do abos arang, ki pidyen naw madyaw.
3 Aran do kayam na do rarahan,
nāw no kabon arang na,
kan ipaboya na do aran sino kapaychabobon arang na.
4 An isoli naymo no magtoray,
komaro kaba do paytarabākwan mo.
Kaolimek, ki maparin a mangbāw so rakoh a kamali.
5 Myan paw marahet a naboya ko do lōbongaya
a iyaw kamali a parinen no magtoray.
6 Siraw abos arang, ki mapadisna sa do matotohos so pagrebbengan.
As siraw mababaknang, ki maydisna sa do mabwabodis.
7 Naboya ko saw adīpen a nakasakay do kabalyo.
As siraw prinsipi saw, ki manakey sa a akmay adīpen.
8 No maychadi so aridos, ki āngwan malasek a masday.
No mayrakrak so ahad a somdep, ki āngwan sonyiten no boday.
9 No maytarabāko do paychadyan so bato, ki maparin a mabigaran.
No mangasda so kayo, ki maparin a magdilikādo.
10 An mangareh wasay, as dya nakadib so tarem,
arwaro ayit a machita na, ki no kinasiglat manoroh so ballīgi.
11 An manonyit boday sakbay a maorasyonan,
abaw magon-gona no magor-orasyonaw.
12 Siraw chirin a ibahey no masīrib, ki manoroh so kaidāyaw.
Ki no mohtot do bibi no abos arang, ki mayrārayaw.
13 No kairogi no kapaychirin no abos arang, ki abos sinpaspangan.
As no tawsan no kapaychirin na, ki marahet a kinaattit.
14 No abos arang, ki nāw na masawat a maychirin.
Abaw makapatak an āngo īto a maparin.
Abaw makaibahey dya so myan do masakbayan na.
15 No kapaytarabāko no abos arang, ki tod na a payhohopagan.
Ta aran kangay do idi, ki chapatak nabaw ayaman na.
16 Kapakāsi pa no tana an iyaw āri na, ki akmay adedekey.
As siraw opisyal na, ki machipista sa an mabekas.
17 Mabindisyonan tana an iyaw āri na, ki naiyanak a mabigbigbig.
As siraw opisyalis na, ki machipista sa do kosto a ōras,
ta panghapan da so kayit da, kan pakabōkan daba.
18 An masadot no tawo, ki maydodoyos atep.
An ditā abos chabalay no tanaro naw, ki matoro bahay na.
19 No pista, ki manoroh so kamimyeng.
No palek, ki mamarin so kasoyot.
Ki no kwarta, ki ipamospōsan do tabo.
20 Abayen mwabaw āri a aran do kapangtokto mo,
mana mangabay kaba so baknang do pakaychehan mo,
ta maparin a isayap no manomanok inchirin mwaw
as yangay na a ibahey binata mwaw.