2
No Kabo no Sinpaspangan no Kinaragsak
1 Binata ko do inawan ko a kon ko, “Sigi, padāsen ko paw kinaragsak. Nanāmen ko kasoyot.” Ki āwan! Alit paya a abos sinpaspangan.
2 Binata ko a maynamot do kamyeng a kon ko, “Abos arang.” As kinaragsak, kon ko, “Āngo sīrbi na?”
3 Inamīris ko an āngo maparin an pasoyosoyoten ko inawan ko do kaynom kos palek, kan padāsen ko abos arang a kaparin. Inamīris ko a mangidaōlo dyaken iyaw aktokto ko do kinasīrib tan mapatakan ko an āngo maganay a parinen no tawotawo ranan kayan manyid a kabyay da do tanaya.
4 Mabibīleg saw kaparin ko. Napapatnek ako so bahabahay kan napaymohamoha ko siras kaobāsan a para dyaken.
5 Napaparin ako siras hardin kan minoyongan, as napaymoha ko dyira so matatarek a kīta no kayokayo a may-asi.
6 Napaychadi ako so pangpehan so ranom a pangsibog siras magla saya a kayokayo a naimoha.
7 Gomnatang ako so mahahakay kan mababakes a adīpen, kan myan saw kadwan a adīpen ko a naiyanak do bahay ko. Myan dyaken arwaro pa a arban bāka ko kan arban karniro ko kan aran sino a nanmanma kan yaken a minyan do Jerosalem.
8 Nangpeh ako so para dyaken a pirak kan balitok. Inhap ko saw kinabaknang dan ar-āri kan yapo pa do probinsya saw a itorayan ko. Nangpeh ako pa siras taga-kansyon ko a mahahakay kan mababakes a para dyaken, kan āro saw mababakes a pagkorsonadaan no mahakay.
9 Dawa, mabilbīleg ako a adayo kan aran sino a nanmanma kan yaken a minyan do Jerosalem. Do tabo nyaya a naparin, nāw pa no kinasīrib ko.
10 Binaywan kwabaw aran āngo a chalakam no mata ko.
Pinenpen kwabaw aran āngo ragsak no pōso ko.
Inīmas no pōso ko tabo tarabāko ko,
kan nyaw gon-gona ko do tabo nayhohopagan ko.
11 Ki do kaiktokto ko so tabo pinarin dan tanoro ko
kan tabo nayhohopagan ko,
ayyah, abaw sinpaspangan na a tabo. Bāli, manglakat so salawsaw.
Aba polos maganansya do lōbongaya.
No Kabo no Sinpaspangan no Kinasīrib kan Abos Arang
12 Inidit ko a iniktokto kinasīrib
kan kaattit kan kabon arang.
Āngo paw maparin tawowaw a machitādi do āri
a mangamangay pa kan sīgod danaw a naparin?
13 Naboya ko a no kinasīrib, ki maganaganay kan abos arang
a akmas sohwaw a maganaganay kan sari.
14 No masīrib a tawo, ki makaboya do kwanan na.
Amnan no abos arang, ki mayam do kasaryan.
Ki natonngan ko
a mayengay a madiman sa a tabo.
15 Sinpangan na, binata ko do inawan ko a kon ko,
“No kadiman ni abos arang, ki adasen na pa yaken.
Āngo paro mahap ko an taywara a somīrib ako?”
Kan binata ko do inawan ko a kon ko,
“Aran nya sawen, ki abos sinpaspangan.”
16 Ta no masīrib a tawo a akmas abwaw so arang, ki mahay aba manakenakem pabanchi
Do manam sanchi a araw, ki mayengay sanchi a mawayakan.
Ala, madiman masīribaw a akmas abwaw so arang.
No Kabo no Sinpaspangan no Nayhohopagan
17 Dawa, inipsok ko byay, ta tabo naparin do lōbongaya, ki palālo dana makaynyiynyin dyaken. Tābo, ki abos sinpaspangan. Bāli, manglakat so salawsaw.
18 Inipsok ko tabo saw nayhohopagan ko do lōbongaya, ta machita bidinen ko sanchi do somaronwaw dyaken.
19 As sino paro makapatak an masīrib nawri mana abos arang? Alit a iyanchiw āmo do tabo nayhohopagan ko saya do lōbongaya. Aran nya, ki abos sinpaspangan.
20 Dawa, nolay ko pōso ko a maynyinan a mapāay a maynamot do tabo nayhohopagan ko do lōbongaya.
21 Ta maparin a parinen no asa tawo tarabāko na do kinasīrib, kapakatoneng kan kasiglat, as kan tokosen naw tabo a dyira na do dyaw a naytarabāko. Aran nya, ki abos sinpaspangan, kan taywara a marahet.
22 Āngo mahap no tawo do tabo sa a payhohopagan a tarabāko kan pangbakebakel do lōbongaya?
23 Tabo a araw na, ki manoroh so kaynyin kan kapāay. Aran mahep, ki makapaynahah aba so kapangtokto. Aran nya, ki abos sinpaspangan.
24 Abaw maganaganay a parinen tawo an dya koman kan minom kan maychichwas so pakapnekan na do tarabāko naw. Nya pa, ki maboya ko a yapo do tanoro no Dyos.
25 Ta an abo iya, sino makakan kan makachichwas so kasoyotan na?
26 No tawowaw a mangahwahok so Dyos, torohan na so kinasīrib, kapakatoneng, kan ragsak. Ki do maygaygatosaw, ki torohan na so tarabāko a mangpeh kan mangapya so kinabaknang a iparawat nanchi do asaw a makahwahok so Dyos. Aran nya, ki abos sinpaspangan. Bāli, manglakat so salawsaw.