4
No Kaidadanes, Kapayhohopag, kan Kapaychatanyi
1 Mirwa dana naboya ko iyaw tabo a kaidadanes a mapariparin do lōbongaya.
Naboya ko siraw hō dan naidadanes,
kan abaw mangahwahok sira.
No panakabalin, ki myan dyirad mangidadanesaw,
kan abaw mangahwahok dyirad naidadanes.
2 Naktokto ko pa dyirad naybitos dana saw so byay,
ki masoyosoyot sa pa kan siraw sibibyayaya.
3 Ki maganaganay pa kan siraw nya dadwa
iyaw dyi paw a naiyanak,
a dya nakaboya siras marahet a kaparin
a naparin do lōbongaya.
4 As naboya ko pa a tabo kapayhohopag a kapaytarabāko kan tabo masiglat a kaparin, ki mapahtot no tawo maynamot do āpal na do karoba na. Aran nya, ki abaw sinpaspangan na. Bāli, manglakat so salawsaw.
5 Magsadalikepkep abos arang a dya maytarabāko,
kan nāw na maptengan a mandan madiman.
6 Maganaganay myan so asa a kakemkem a makaynahah
kan myanaw so dadwa a kakemkem, ki mahah
kan manglakat so salawsaw.
7 Mirwa dana myan naboya ko a abos sinpaspangan do lōbongaya.
8 Myan asa mahakay a maybibyay a maychatanyi.
Abaw pōtot kan kakteh na a mahakay.
Machipandabaw kapaytarabāko na,
ki alit na mapnek aba do kinabaknang na.
Inyahes na a kāna, “Para di sino itartarabākwan ko,
kan āngo ta penpenen ko a magragsak inawan ko?”
Aran nya, ki abos sinpaspangan
a makalidliday a kapaybibyay.
9 No dadwa a tawo, ki maganaganay kan asa,
ta myan maganay a magapo da do kapayhohopag da.
10 An masday asa,
ki masidongan sīt naw a maybangon.
Ki kapakāsi pa no tawowaw a masday,
kan abaw mangbangon sya.
11 Otro, an mayoknod dadwa, ki madidiw dabaw kahanebneb.
Ki maypāngo a komohat maychatanyi?
12 Aran myan mangdarop a makey a mangābak so asaw a tawo,
ki maparin dadwaw a maysintadyichokod a mangpadso sya.
No tatdo so nakapospos a hobid, ki malidyat a bitosen.
No Kabo no Sinpaspangan no Kapaypatohos no Tawo
13 Maganaganay mapobri kan masīribaw a magtotobo kan iyaw malkemaw kan abos arang a āri a dyi dana makapatak a mangrawat so ballāag.
14 Ta iyaw magtotobwaw a yapo do bahodan, ki maparin a mayparin a āri a aran naiyanak a mapobri do pagāryan na.
15 Naboya ko pa a tabo naybibyay kan nanakenakey do lōbongaya, ki minononot sa do magtotobo a nachitādi a āri.
16 Machipanda abaw bidang dan tabo tawotawo mana siraw nayam dana. Ki siraw somaronwaw anchi, maragsakan sabanchi do nachitādyaw. Nya pa, ki abos sinpaspangan. Bāli, manglakat so salawsaw.