Eksodo
No Pakatonngan so Paytābwan no Nya Libro
No nya libro, ki naibahey a maynamot do nakakaro da no kapotōtan no Israel a yapo do Egipto a nakaadīpenan da. No chakey na batahen Eksodo, ki “komaro.”
Myan apat a partis no nya libro: 1) kalibri dan Israelita yapo do kaadīpenan da, 2) kakwan da a mangay do Tokon a Sinai, 3) kapachitōlag no Dyos dyirad tawotawo na do Sinai a naitoroh dyira so linlinteg an maypāngo kabibyay da, kan 4) kapatnek kan mapangay so rimīnta no pagdaydayāwan dan Israelita, kan linlinteg a maynamot dyirad papādi kan kadāyaw da do Dyos.
No kasisitāan a minsāhi no nya libro, ki maynamot do pinarin no Dyos do nakalibri na siras tawotawo na do nakaadīpenan da do Egipto, as kan an maypāngo nakasidong na sira a mapatnek so nasyon da.
No kasisitāan a tawo do nya libro, ki si Moyses a iyaw pinidi no Dyos a mangidaōlo siras tawotawo na a yapo do Egipto. As no nagdindināmag a partis no nya libro, ki no listaan no asa poho a bilbilin do kapitolo 20.
No Naychakarwan no Nya Libro
No kalibri dan Israelita yapo do Egipto (1:1-15:21)
No kaadīpen dan Israelita do Egipto (1:1-22)
No kaiyanak ni Moyses a mandad kapaybidi na yapo do Midya (2:1-4:32)
Sa Moyses kan Aaron a machisalap di Paraon no Egpito (5:1-11:10)
No pakanaknakman so kahabasaw ni ĀPO kan kakaro do Egipto (12:1-15:21)
No kakwan da yapo do Mabaya a Tāw a mandad Tokon a Sinai (15:22-18:27)
No linteg kan no tōlag (19:1-24:18)
No masantwan a tolda kan siraw kapangnanawo do kapagdāyaw (25:1-40:38)
Eksodo
1
No Kaadīpen Dan Taga Egipto Siras Tawotawo no Israel
1 Siraw n yaw ngarangaran dan pōtot saw a mahahakay ni Jakob a nangay do Egipto kontodo si Jakob a āmang da kan siraw pampamilya da:
2 Ruben, Simeon, Lebi, kan Joda,
3 Issakar, Sebolon, kan Benhamin,
4 Dan kan Naptali, Gad kan Aser.
5 Siraw nya saya kapotōtan Jakob, ki papito a poho bidang da tabo. Ki si Jose, myan dana sīgod do Egipto.
6 Do nakapaypahabas no āro a tawen, si Jose kan tabo kakakteh na saw kontodo siraw kapoonan do dāwri, ki nadiman dana sa.
7 Ki siraw kapotōtan da a siraw Israelita saya, ki maaanaken sa. Naypaypāro a naypaypayit sa manda do nakapekpek darana do tana a Egipto.
8 Do dāwri, myan bayo a āri a magtoray do Egipto a dya makapapatak so maynamot di Jose.
9 Binata na dyirad tawotawo na saw a taga Egipto a kāna, “Chiban nyo pa. No bidang dan Israelitaya, ki arwaro dana saya kan yaten, kan mayīyit dana sa kan yaten.
10 Ay samna, machita mangirimīdyo ta tan mapenpen ta paw kapaypāro daya. Ta an myan gobat, machirapa sanchi dyirad kabōsor ta saw a manggobat dyaten, as kapayyayo darana komaro do yanan taya, ayket awānen.”
11 Maynamot ta komwan, nangitongdo sa dyira so taga-mandar da siras Israelita saw tan taywara a palidyaten da sa do kapaytarabāko a inkapilītan. Napapatnek āryaw dyira so dadwa syodad a mayngaran so Pitom kan Rameses a pangapyan so irek kan kadwan a dyiran Paraon.
12 Ki an maypāngo nakapalidyat dan taga Egipto saya siras Israelita saya, mimyan paw nakapaypaypāro da kan nakapagwaras da. As dawa, nyaw naynamotan na a chinaamak da sa no taga Egipto saya,
13 kan rinanggasan da saw Israelita do nakaadīpen daw do mararahmet a tarabāko.
14 Pinakpad daw byay dan Israelita do nakapīlit da sira a pamarinen so ladrilyo kan pamadketaw sya, kan tabo a kīta no tarabāko do bengkag da. Oyod an maypāngo nakalidyat da maytarabāko, aba polos nakāsi sira no taga Egipto saw.
15 Do dāwri, nachisarīta si āri dyirad partīra saw a Hebreo a sa Siprah kan Powah.
16 Nyaw binata na dyira a kāna, “Anchan partīraan nyo saw mababakesaw a Hebreo a maymanganak, chiban nyo an mahakay, ta dimanen nyo. Ki amnan mabakes, nonolay nyo a mabyay.”
17 Ki siraw partīra saya, ki mamo sa di Āpo Dyos. Basbāli a dyi da tinongpal bilinaw ni āri no Egipto, kan ninonolay da sa mabyay tagībi saw a mahahakay.
18 Maynamot ta komwan, pinatawag sa no āryaw no Egipto partīra saw, kan inyahes na dyira a kāna, “Āngo ta pinarin nyo komwan? Āngo ta ninonolay nyo sa mabyay mahahakay saya naiyanak?”
19 Ki tinbay dan partīra saw ni Paraon a kon da, “On, ata, akmabaw siras taga Egipto saya mababakes Hebreo saya. Maydamnay saw a maymanganak, ta sakbayaw a mawaraw partīra, ki naiyanak danaw adekeyaw.”
20 Dawa, binindisyonan sa ni Āpo Dyos partīra saya, as siraw Israelitaw, ki naypaypāro sa, as naypaypabīleg sa pa.
21 As kan maynamot ta mamo saw partīra di Āpo Dyos, tinorohan na sas bōkod da a pamilya.
22 Do dāwri, inbilin ni Paraon dyirad tabo tawotawo do Egipto a kāna, “Kāda mahakay a maiyanak dyirad Hebreo, machita maipoha do Oksong Nile, ki siraw mababakes saw a maiyanak, nonolay nyo sa mabyay.”