14
No Kapamtang Da do Mabaya a Tāw
1 Sinpangan na, binata ni ĀPO di Moyses a kāna,
2 “Ibahey mo dyirad Israelita saya a somiwal sa a maybidi, kan magkampo sa do masngenaw do Pi-hahirot iyaw payawanaw no Migdol kan Mabaya a Tāw a somalap do Baal-sepon.
3 Iktokto nanchi ni Paraon a ‘Ay, ari sa naychawaw Israelitaw a tod a midibidi kan napopok sa do let-ang.’
4 As patwahen konchiw pōso ni Paraon, kan lakatan nanchi inyo. Ki maitoroh anchi dyaken dāyaw do kaābak ko sa Paraon kontodo tabo saw a bōyot na. As siranchiw taga Egipto saw, ki matonngan danchi a yaken si ĀPO.” Dawa, tinongpal dan Israelitaw naibaheyaw dyira.
5 Do nakadāmagaw ni Paraon a komnaro dana saw Israelita saw, nagbāliw kapangtokto na kan opisyalis na saw a maynamot dyira, kan binata da a kon da, “Āngo nya pinarin ta? Inanghen ta sa pinalobōsan a komnaro Israelitaw a adīpen ta a magsirsīrbi dyaten?”
6 Dawa, inpaisagāna ni Paraon logan naw a pachigobat a goyoden no kabalyo, as nakaiyonot na so bōyot na saw.
7 Inyonot naw anem a gasot a kagaganayan do logan a pachigobat kontodo tabo kadwan saw a logan a pachigobat do Egipto, magrāman komander da saw do kāda logan.
8 Oyod a pinatwa ni ĀPO pōswaw ni Paraon a āri do Egipto, as linakatan na saw Israelitaw a madama mayam a komaro a sitotored.
9 Siraw taga Egipto saw kontodo tabo kabalyo saw ni Paraon kan logan na saw a pachigobat, kabalyiro na saw, as kan bōyot na saw, ki linakatan da saw Israelitaw. Nadas da sa do kayan daw a nagkampo do payisaw no tāw a masngen do Pi-hahirot a somalap do Baal-sepon.
10 Do nakapaypasngen daw da Paraon kan bōyot na saw, naboya dan Israelita saw taga Egiptwaw a nanglakat dyira, ki taywaraw nakamo da, kan tinanyisan da si ĀPO.
11 Binata da di Moyses a kon da, “Maynamotori ta abaw pangitabōnan do Egipto ta dawa, inyangay mo yamen do dya let-ang a madiman? Aysa, chiban mo paw pinarin mo dyamen do nakaikaro mwaya dyamen do Egipto!
12 Binata namen abawri dyimo do Egipto a kon namen, ‘Karwan mo yamen, kan nonolay mo yamen a magsīrbi dyirad taga Egipto saya’? Maganaganay pa iyaw kapagsīrbi namen dyirad taga Egipto saw kan madiman do dya let-ang!”
13 Ki tinbay ni Moyses saw tawotawowaw a kāna, “Mamo kamo aba. Patoreden nyo kapangtokto nyo, kan ditā nyo dya. Maboya nyonchiw kaisalākan na dyinyo ni ĀPO sicharaw. Siraw nya taga Egipto a chichiban nyos changori, tawsan nyo na sa a maboya.
14 On, ta si ĀPO, ki iyaw machilāban a para dyinyo. No lang parinen nyo, ki magtalna kamo.”
15 Binata ni ĀPO di Moyses a kāna, “Āngo paynonohed mo dyaken? Sigi, ibahey mo dyirad Israelita saya a tongtongen daw manakey.
16 Ngay, ilāyat mo sarokod mwaya, as kapalongo mo sya do tāwaya tan maysyay. Tan komwan, maparin daw manakey a magkelsat do payawanayan ranom no Israelita saya do mabkoh a tana.
17 Patwahen konchiw pōso dan taga Egipto saya tan somdep sa a manglakat siras Israelitaya, kan maitoroh anchi dyaken dāyaw do kaābak ko sa Paraon kontodo tabo bōyot na saw, logan na saw, kan siraw kabalyiro na saw.
18 Matonngan danchin taga Egipto saw a yaken si ĀPO anchan maitoroh dyaken dāyaw do kaābak ko si Paraon, siraw logan na saw, kan siraw kabalyiro na saw.”
19 Sinpangan na, iyaw anghilaw no Dyos a mapawnonot siras Israelitaw do panman daw, nayadis kan nangay do dichodan daw. As aran iyaw tominnekaw a demdem do salapen daw, ki nayadis a naytēnek do dichodan daw
20 a myan do payahatangan daw no bōyot dan taga Egipto kan no bōyot dan Israelita saw. Naychararakan a pinasari no demdemaw yanan daw no taga Egipto saw, ki pinasēdang naw yanan daw no Israelitaw. Dawa, nāw na a dyi sa makapaysin-asngen dadwaya.
21 Sinpangan na, inlāyat ni Moyses tanoro naw a pinalongo do tāwaw, as pinasoysoy a pinasyay ni ĀPO tāwaw maynamot do mayit a salawsaw a yapo do dāya. Naychararakan a inabkoh naw tanaw. Naycharwaw tāwaw,
22 as nanakey saw Israelitaw do kensadaw no tāw do mabkoh a tana a myan naidyindyin a tāw do maychamībit daw.
23 Siraw taga Egipto, linakatan da sa, kan sindep daw irahemaw no tāw kontodo tabo kabalyo saw ni Paraon, logan da saw a pachigobat, kan kabalyiro da saw.
24 Do makalo a kapaysesēdang, linawngan sa ni ĀPO a yapo do pinatnek naw a apoy kan demdem bōyot saw no taga Egipto kan pinaychaket na sa.
25 Tiningalan naw līgay daw no logan da saw tan malidyatan dana sa mayadis. Ki binata dan taga Egipto saw a kon da, “Iih, alla! Payyayowan ta na saw Israelita saya! Si ĀPO ayaw machilāban a para dyira a kontraen na yaten a taga Egipto.”
26 Sinpangan na, binata dana ni ĀPO di Moyses a kāna, “Ilāyat mo tanoro mwaya palongohen do tāwaya tan maybidiw tāwaya a pōnan na saw taga Egipto saya kontodo logan da saya kan kabalyiro saya.”
27 Dawa, inlāyat ni Moyses tanoro naw a pinalongo do tāwaw, kan do kapaysesēdang naranaw, naybidiw tāwaw do sīgodaw a kayayan na. As siraw taga Egipto saw a pinādas da a payyayowan tāwaw, ki intapwak sa ni ĀPO do irahem no tāw.
28 Minoyog a naybidiw ranomaw, kan pinōnan na saw logan daw kan kabalyiro saw. Sira tabo bōyot saw ni Paraon a nanglakat siras Israelitaw do naysyayanaw no tāw, ki aba polos nakalāsat.
29 Ki siraw Israelitaw, ki nanakey sa do kensadaw no tāw do mabkoh a tana a myan naidyindyin a tāw do maychamībit naw.
30 Do dāwri a araw, insalākan sa ni ĀPO Israelita saw a yapo do tanoro dan taga Egipto saw, as kan naboya dan Israelita saw bangkay daw no taga Egipto saw a nadagta.
31 Do nakaboya daw no Israelita saw so bīleg no panakabalin ni ĀPO a intopak na dyirad taga Egipto saw, chināmo dan tawotawowaw si ĀPO, as kan iya danaw tinalek da kan aran si Moyses a pachirawatan na.