27
No Kabindisyon ni Isaak di Jakob
1 Do kamalkem dana ni Isaak, do dyi naranaw a pakaboyan, inpatawag nas Esaw a matoneng a pōtot na, as nakabata na sya dya a kāna, “Barok, may ka pa dya.”
“Ari ako dya, mo āmang,” initbay ni Esaw.
2 Do dāwri, binata ni Isaak dya a kāna, “Maboya mwa malkem ako na, kan īto danaw kadiman ko.
3 Dawa, hapen mo bai mwaw, ta yangay mo yaken a panganop so ichan ko do kahasan,
4 as kaimāsen mwa langgen maanopan mwaw iyaw chadaw kwaw a kapanglaneg ah! Anchan tayoka ka manglaneg, yangay mo dya, as kakan ko sya. Ta katayoka kwa koman, bindisyonan koymo sakbay no kadiman ko.”
5 Myan a adngedngeyen Rebekkaw ibahebaheyaw ni Isaak di Esaw. Dawa, do nakapakayamaw ni Esaw a nangay a nanganop do kahasan,
6 tinawagan ni Rebekka si Jakob. Binata na dya a kāna, “Anak ko, nadngey ko kaychiw nakabilinaw ni āmang mo di ākang mos Esaw a kāna,
7 ‘Yangay mo yaken a panganop, as kaimāsen mwa langgen maanopan mwaw, as kakan ko. Ta katayoka kwa koman, bindisyonan koymo do salapen ĀPO sakbay no kadiman ko.’
8 Dawa, adngeyen mo pa yaken, anak ko, as kan parinen mo ibahey kwaya dyimo.
9 Sichangori, mangay kad yanan binyay ta saw, as mamidi kas dadwa orbon no kalding a matataba, ta langgen ko so chadawaw ni āmang mwa kapanglaneg.
10 Iyangay monchi di āmang mo ah, tan kanen na, as bindisyonan naymo sakbay a madiman.”
11 Ki tominbay si Jakob dya a kāna, “Ay, katen mo Ānang, ta borboranaw si ākang Esaw. Yaken, ki enggaya.
12 Āngonchan saliden na yaken āmang, ki mapatakan na a al-allilāwen ko. Samna! An komwan, bindisyon pabanchiw mahap ko, an dya abay.”
13 Ki initbay ni ānang na dya a kāna, “Anak ko, mabakel kaba, ta imo abaw ngayan nawri a abay, an dya yaken. Basta magtongpal ka dyaken. Ngay, yay mo na hapen iyaw inbahey kwaya dyimo, ta yangay mo na dyaken.”
14 Dawa, nangay a nanghap si Jakob so inbaheyaw ni ānang na, as nakaitoroh na sya dya. Nilaneg ni Rebekka so maīmasaw a akmas chadawaw ni Isaak.
15 Somarono, pinahtot ni Rebekka saw kinapikapya na saw do bahayaw a kagaganayan a laylay ni Esaw a matoneng a anak na, as nakailaylay na sya di Jakob.
16 Binedbedan naw tanoro na saw kan lagawaw ni Jakob so koditaw no kaldingaw,
17 as nakaitoroh na sya di Jakob so maīmasaw a linaneg kan tināpay a rinotongan na.
18 Sinpangan na, nangay si Jakob di āmang na, as nakabata na sya a kāna, “Mo āmang.”
Ki tinbay ni āmang na a kāna, “On, barok. Sino dyinyo a anak ko nya?”
19 Ki tominbay si Jakob a kāna, “Yaken matonengaw a anak mo a si Esaw. Pinarin kwaw iyaw inbahey mwaw dyaken. Dawa, maybangon ka na a michan so karnyaya a insabat ko, as kabindisyon monchi dyaken an tayoka ka koman ah.”
20 Ki binata ni Isaak do pōtot naw a kāna, “Ay samna! Kalistom pa nangay do kahasan, barok!”
Tominbay si Jakob a kāna, “On, ata, sinidongan naw yaken ni ĀPO a Dyos mo.”
21 Ki binata na di Jakob a kāna, “Maypasngen ka pa dya, ta kapyasen ko paymo an ara paro a oyod a imos Esaw.”
22 Dawa, naypasngen si Jakob di āmang na, as kinapikapyas ni āmang na, kan binata pa ni Isaak a kāna, “Na, akmayaw si Jakob ōni mwaya, ki sirayaw tanoro mwaya, ki si Esawayam na.”
23 Nailasin aba ni Isaak si Jakob, ta siraw tanoro naw, ki borboran a akmas tanoro saw ni Esaw. Do dāwri, nakasagāna dana mangbindisyon sya, ki pinirwa na pa inyahes a kāna,
24 “Oyodawri a imo si Esaw a anak ko?”
Ki tinbay ni Jakob, “On, yakenaw, mo āmang!”
25 Dawa, binata ni Isaak a kāna, “Yangay mo dyaw rinotongan mwaw, ta kanen ko na. Anchan tayoka ko, ki nawri dananchiw kabindisyon ko dyimo.” Dawa, pinasngen ni Jakob iyaw rinotongan naw, as kinan ni Isaak. Nakapanghap na pas palek a ininom ni āmang na.
26 Sinpangan na, binata ni Isaak dya a kāna, “Maypasngen ka dyaken, anak, ta dadek mo yaken.”
27 Do dāwri, naypasngen si Jakob a mindadek si āmang na. Do nakaangotaw ni Isaak so laylay naw, binindisyonan na a kāna,
“Oyod makaay-āyo iyaw āngot no anak kwaya
a akmas āngotaw no tana a binindisyonan ĀPO.
28 Itoroh pakono no Dyos iyaw apon a yapo do hanyit a ombasa so tana,
tan magla saw mohamoha mo.
As torohan na pakono imo so āro a āpit kan ōbas mo,
tan āro kanen kan inomen mo.
29 Magsīrbi pakono sa dyimo nasnasyon saw,
as kan siraw tawotawo, ki maydogod sa magdaydāyaw dyimo.
Itortorayan mo pakono saw kakabagyan mo saw,
kan imo āpohen dan kakabagyan saw ni ānang mo.
Mabay pakono saw mangabayaw dyimo,
as siraw mangbindisyonaw dyimo, ki mabindisyonan pakono sa.”
No Kabindisyon ni Isaak di Esaw
30 Do katayokaw ni Isaak a nangbindisyon di Jakob, komnaro. As do kakakaro paw ni Jakob do salapenaw ni āmang na, ki nawara si Esaw a yapo do nanganopan naw.
31 Nanotong pa si Esaw so maīmas a linaneg, as nakaiyangay na sya di āmang na. Binata na dya a kāna, “Āmang, maybangon ka, ta koman ka na so karnyaya a insabat ko tan bindisyonan mo na yaken.”
32 Tominbay si Isaak a kāna, “Oy samna! Sino ka?”
“Yakenaw si Esaw a matoneng a anak mo,” binata na.
33 Do dāwri, taywara naychamirpirpir si Isaak, as binata na dya a kāna, “Ay samna! Sino nangisabat dyaken kaychi so nilanegaw a naanopan? Sakbay no kawara mo, inichan ko na, as intoroh ko na dyaw pamindisyon ko. Ay, matādyan pabaw nawri a bindisyon ko!”
34 Do nakadngeyaw sya ni Esaw so nyaya, tomnanyis so malyak, kan oltimo kaynyin aktokto na, as binata na a kāna, “Chāsi mo pa yaken, mo āmang, ta bindisyonan mo pa yaken ah!”
35 Ki tominbay si Isaak a kāna, “Kawanen! Nangay naya yaken a inallīlaw ni ādi mo. Nahap naranaw itoroh kwaw dyimo a bindisyon.”
36 Binata pa ni Esaw a kāna, “Na, kostwaya. Dawa, sawen a nayngaran so Jakob, ta naypirwa narana yaken a niyoban a inallīlaw. Inhap naw kalintegan kwa matoneng a anak. Sichangori, inhap na paw bindisyon a itoroh mo dyaken. Mo āmang, apabawriw bindisyon mo dyaken?”
37 Ki tominbay si Isaak di Esaw a kāna, “Na, intoroh ko na dyaw bindisyon, as iya danaw āpohen mo. Masaw dyirad tabo a kakabagyan nyo a magsīrbi dya. Inbahey ko pa a maypāro pakononchiw kanen na kan inomen na. Barok, arabaw bindisyon ko dyimo.”
38 Ki nakatongtong ni Esaw a nangdaw so kāsi ni āmang na. Binata na a kāna, “Asawriw pamindisyon mo, mo Āmang? Bindisyonan mo pa yaken ah!” Maynamot ta naylilyak abas Isaak, naypalyak dana tomnanyis.
39 Sinpangan na, nyaw inbahey ni Isaak dya a kāna,
“Omyan kanchi do tana a dya maganay a paymohan,
kan abanchiw apon a ombasa so tana mo.
40 Nawrinchiw kabyayan mo kapachilāban mo maynamot do ispāda,
as magsīrbi kanchid ādi mo.
Ki aran komwan, anchan dyi mo na maibtoran kaadīpen mo,
ki mapenpen nabaymo a mangdichan so toray na.”
41 Yapod dawri, taywara isoli ni Esaw si Jakob a ādi na a maynamot do nakayoba naw so bindisyonaw ni āmang na dya, as nyaw myan do aktokto na, “Ara, ki mahay paba madiman si āmang. Anchan tayokaw arawaw a kapagmamayo, ki dimanen konchi si Jakob.”
42 Ki do nakadamāgaw ni Rebekka so inbaheyaw ni Esaw, inpatawag na si Jakob, as kan binata na dya a kāna, “Anak ko, inplāno na kono imo no ākang mwaw a dimanen, tan maagāsan iyaw kaynyin no aktokto na dyimo.
43 Sichangori, adngeyen mo chirin kwaya, anak ko. Mangay ka sigīda do Haran do yananaw ni maraan mos Laban a kakteh ko.
44 Omyan ka daw a mandan mabawan kasoli ni ākang mo dyimo.
45 Anchan mabawan danaw soli na, as kan nawayakan naranaw pinarin mwaya dya, ki manoboy akonchi so mangay a omhap dyimo. Aysa! Marawa kwabaw kapagmamayo ko an mayrayay kamo a dadwa a mabo do asa karaw.”
No Katoboy ni Isaak si Jakob di Laban
46 Sinpangan na, binata ni Rebekka di Isaak a kāna, “Ayya! Maanōsan ko pa sabayaw Heteo saya a kabahay ni Esaw. An mangabahay panchi si Jakob so kapayngay dan nyaya a Heteo, ayket, maganaganay dana an madiman ako!”