13
No Kayanak ni Samson
1 Minirwa dana saw Israelitaw a mamarin so marahet do salapen ni ĀPO. Dawa, inparawat sa ni ĀPO dyirad Pilisteowaw a nangitoray dyira so apat a poho a katawen.
2 Do dāwri a chimpo, myan asa mahakay a yapo do idi a Sora a mayngaran so Manoah a yapo do partīdos no trībo no Dan. Abaw anak da, ta hopes si baket na.
3 Sinpangan na, napaboya dyaw anghilaw ni ĀPO, as nakabata na sya dya a kon da, “Aran hopes ka a abos anak, ki mabōgi kanchi, as kan maymanganak kanchi so mahakay.
4 Dawa, basta dyi ka minom so palek mana aran āngo a inomen a mangbōk, as kan koman kaba so aran āngo a naibidang a malapos.
5 Oyod a mabōgi kanchi, as kan maymanganak kanchi so mahakay. Ipagogod mwaba, ta pachitatārken danaw nya adekey no Dyos a mayparin a Nasireo a yapo do kaiyanak na. Iyanchiw mangisiknan so kaisalākan dan Israelita yapo do toray dan Pilisteo.”
6 Do dāwri, nangay iyaw mabakesaw di lakay na, as nakaibahey na sya dya a kāna, “Myanaw tawo no Dyos a nangay dyaken. Iyaw langa naw, ki akmas anghilaw no Dyos, as kan makamwamomwaw. Inyahes kwabaw nakayapwan na, as kan inbahey nabaw dyaken ngaran na.
7 Ki no inbahey na dyaken, ki ‘Mabōgi kanchi, as kan maymanganak kanchi so mahakay. Dawa, basta dyi ka minom so palek mana aran āngo a inomen a mangbōk, as kan koman kaba so aran āngo a naibidang a malapos, ta pachitatārken danaw nya adekey no Dyos a mayparin a Nasireo a yapo do kaiyanak naw a manda do kadiman na.’ ”
8 Do dāwri, naydasal si Manoah di ĀPO a kāna, “O ĀPO, pachitoboy mo pa mirwaw tawowaw no Dyos a maybidi a mangnanawo dyamen an āngo machita a parinen namen a maparakoh so adekeyaw a maiyanak.”
9 Nadngey no Dyos inakdawaw ni Manoah, kan napaboya a minirwaw anghilaw no Dyos do mabakesaw do kayan naw a maydisna do bengkag. Ki iyaw lakay naw a si Manoah, ki nachirayay aba do dāwri.
10 Dawa, nakalyalisto a nangay a nangibahey sya di lakay na a kāna, “Iyaw mahakayaw a nangay dyaken do dāwri a araw, napaboya danaw dyaken a minirwa.”
11 Naychakatkat si Manoah, as nakapachangay na di baket na. Do nakapakarapit naw do yananaw no mahakayaw, inyahes ni Manoah dya a kāna, “Imoriw naychirinaw di baket ko?”
“Naon,” initbay na.
12 Do dāwri, inyahes ni Manoah a kāna, “Na, anchan natongpal danaw inchirin mwaya, āngo linteg a onotan adekeyaw do kabibyay na kan do tarabāko na a asa Nasireo?”
13 Inatbay no anghil ni ĀPO a kāna, “Basta tongpalen ni baket mo tabo inbahey kwaw dya.
14 Basta dya koman so aran āngo a yapo do ōbas mana minom so palek naw mana aran āngo a inomen a mangbōk, mana koman so aran āngo a naibidang a malapos. Basta tongpalen na tabo inbahey kwaw dya.”
15 Binata ni Manoah do anghilaw ni ĀPO a kāna, “Balabalayen namen pa imo so dēkey, ta magsagāna kami pas ichan mwa orbon a kalding.”
16 Ki initbay no anghilaw ni ĀPO dya a kāna, “Aran balabalayen mo yaken, kanen kwabaw kanen mo. Ki an isagāna mo a dāton a sosohan mo, sīgi, idāton mo di ĀPO.” (Chinapatak naba ni Manoah a iya, ki anghil ni ĀPO.)
17 Inyahes ni Manoah do anghilaw ni ĀPO a kāna, “Āngo ngaran mo, tan dayāwen namen imo anchan natongpal danaw inchirin mwaya?”
18 Inyahes no anghilaw ni ĀPO a kāna, “Āngo ta akdawen mo ngaran ko? Maskad mwaba iktokto, ta taywara a makaskasdāaw.”
19 Dawa, inhap ni Manoah asaw orbonaw a kalding kontodo irekaw a dāton, as indāton na sa a sinosohan do hapotaw no altar a bato a para di ĀPO a mamarin so makaskasdāaw.
20 Do nakapagilāyabaw no asdebaw no apoy a yapo do altaraw a naypatohos do hanyit, iyaw anghilaw ni ĀPO, naypatohos do asdebaw no apoy. Do nakaboya daw sya da Manoah kan baket na, naysasakeb sa do tana do kāmo da.
21 Napaboya paba iyaw anghilaw ni ĀPO di Manoah kan baket na. Do dāwri, natonngan ni Manoah a iya, ki anghil ni ĀPO.
22 Binata ni Manoah di baket na a kāna, “Alah! Sigorādo a madiman ta, ta nakaboya ta so Dyos!”
23 Ki initbay ni baket na a kāna, “An oyod a chakey na yaten ni ĀPO a dimanen, rinawat nabaw nasosohanaw a dāton kan irek a dāton ta, mana inpaboya naba tabo nya syaya, mana inpadāmag naba dyaten nya saya.”
24 Sinpangan na, naymanganak mabakesaw so mahakay, as kan pinangaranan na so Samson. Nayparakoh iyaw adekeyaw, kan binindisyonan ni ĀPO.
25 Iyaw Ispirito ni ĀPO, inrogi na intorayan si Samson do kayan naw do Mahaneh-dan do baet no Sora kan Estaol.