14
No Kaipadto ni Ahiha so Maikontra di Jeroboam
1 Do dāwri, si Abihas a adekey a pōtot ni Jeroboam, ki naganyit.
2 Binata ni Jeroboam di baket na a kāna, “Magpamarang ka a matarek a tawo tan dya mapatakan a imo, ki baket ko, kan mangay ka do Silo. Si Ahiha a propīta, ki myan daw. Iyaw nangibaheyaw dyaken a mayparin akonchi a āri dyirad dyaya a tawotawo.
3 Mapanaybi ka so asa poho a tināpay, kan kadwan a namemeh a napihpih a makan, kan asa kagarapon a tagapolot no yokan, as kangay mo dya. Ibahey nanchi dyimo an āngo maparin do adekeyaya.”
4 Pinarin no baketaw ni Jeroboam binata naw, kan nangay di Ahiha do bahay naw do Silo.
Do dāwri, makaboya paba si Ahiha. Bosa dana, ta malkem dana.
5 Ki binata ni ĀPO di Ahiha a kāna, “Si baket ni Jeroboam, ki mangay a manahes dyimo maynamot do anak naw a mahakay, ta ari a maganyit. Itbay mo dyaw ibahey kwaya dyimo. Anchan mawara, magpamarang anchi a matarek a mabakes.”
6 Do nakadngey naw ni Ahiha so kadagpasaw no kokod na do kasdep naw do pantawaw, binata na a kāna, “Somdep ka mo baket ni Jeroboam. Āngo ta magpamarang ka a matarek? Natoboy ako a mangibahey dyimo so marahmet a dāmag.
7 Mayam ka na yangay mwa ibahey di Jeroboam a nyayaw inbahey ni ĀPO a Dyos no Israel: ‘Pinatēnek koymo yapo dyirad tawotawo, kan pinarin koymo a magtoray do tawotawo ko a Israel.
8 Pinasyay ko iyaw pagāryanaw a pinakaro ko a yapo dyirad kapotōtan ni Dabid, kan intoroh ko dyimo. Ki akma kabaya di Dabid a pachirawatan ko a nagtongpal do bilbilin ko kan minonot dyaken do tābo pōso na a nawriw pinarin naw kosto do kapanyideb ko.
9 Namarin kas arwaro pa a maraherahet kan tabo nanmanma saw kan imo. Pinarin mo do bōkod mo a inawan kadwan saw a dyos kan nalōnag a napōtar a bolto. Pinasoli mo yaken kan tinadyichokodan mo yaken.
10 “ ‘Maynamot do dyaya, iyangay konchiw didigra dyirad kapotōtan ni Jeroboam. Abohen ko sanchiw yapo di Jeroboam kāda mahakay a aran adīpen mana siwayawaya do Israel. Opasen ko sanchiw kapotōtan na saw ni Jeroboam a akmas kapangalawopaw so tachi dan animal a mandan abo danaw kaboyan sira.
11 Kanen danchi no chito kapamilya saw ni Jeroboam a madiman do syodad, kan kanen danchi no manomanok do tohos madiman saw do gagan no syodad. Nyayaw binata ni ĀPO.’
12 “As imo, somabat ka na. Anchan tomokap ka a somdep do syodad mo, madiman anchiw adekeyaw.
13 Tabo no tawotawo no Israel, ki magdongdong-aw sanchi dya kan itābon danchi iya. Iyanchiw moyboh dyirad Jeroboam a maitābon, ta iya lang dyirad kapotōtan na iyaw chahwahok ni ĀPO a Dyos no Israel.
14 “Si ĀPO anchiw mismo a mamangon so āri a magtoray do Israel a mangopas anchi siras kapotōtan ni Jeroboam. On, aran sichangori dana!
15 Dosāen anchi ni ĀPO iyaw Israel tan mayparin sanchi a akmay banakawoy a madohodohod do ranom. Bagoten na sanchiw tawotawo no Israel a pakarohen do maganayaya a tana a intoroh na dyirad aāmang da saw. Paychawpiten na sanchi do bīt no Oksong a Oprates, ta pinasoli da si ĀPO do kapamarin da siras ibidang da sa a masantwan a posti a pagdaydayāwan no dyosa a Asera.
16 Inonolay nanchi ni ĀPO iyaw Israel maynamot do gatogatos a pinarin ni Jeroboam, kan nawriw napawnot siras tawotawowaw no Israel a naygatos.”
17 Sinpangan na, naytēnek baketaw ni Jeroboam, kan komnaro a somnabat do Tirsa. Apāman a tomnokap do dapyan naw no bahay, nadiman adekeyaw.
18 Intābon daw adekeyaw, as tabo Israel, ki nagdongdong-aw sa dya a akmas inpaibaheyaw ni ĀPO do propīta naw a si propīta Ahiha.
19 Siraw kadwan saw a napariparin do nakapagāri ni Jeroboam, iyaw nakapachigobat naw kan maypāngo a nagāri, ki naitolas do librowaw no pakasaritāan dan ar-āri no Israel.
20 Nagāri si Jeroboam so dadwa a poho kan dadwa a katawen. As nachipaynahah si Jeroboam dyirad aāmang na saw. Si Nadab a pōtot na, ki nachitādi dya a āri no Israel.
Si Rehoboam a Āri no Joda
21 Si Rehoboam a pōtot ni Solomon, ki āri do Joda. Nagtawen so apat a poho kan asa do nakapagāri na. Nagāri so asa poho kan papito a katawen do Jerosalem a iyaw syodadaw a pinidi ni ĀPO a yapo dyirad tabo a trībo no Israel a dawriw pagdaydayāwan so ngaran na. No ngaran ni ānang na, ki si Naama a Ammonita.
22 Siraw tawotawo a Joda, ki pinarin daw marahet do kapanyideb ni ĀPO. Do gatogatos a pinarin da, mangamangay pa a napasdeb so kapangīmon no kasoli ni ĀPO kan tabo pinarin dan aāmang da saw.
23 Napatnek sa pa para do bōkod da a inawan siras logaraw a pagdaydayāwan, posti saw a bato, kan posti saw ni Asera do kāda paytokonan, kan do kāda sīrok no mayayabong a kayo.
24 Myan do dya tanaw mahahakay kan mababakes a balangkantis a nagsīrbi dyirad pagdaydāywan da. Siraw tawotawo, ki namarin sa so tabo a makabābaba a dadakay dan nasnasyon a pinaksyat ni ĀPO do salapen da no Israelita.
25 Do chadadima naw a katawen no kapagāri ni Āri Jeroboam, rinaot ni Sisyak a āri no Egipto iyaw Jerosalem.
26 Inkaro na saw kinabaknangaw no timplo ni ĀPO kan kinabaknangaw no palasyo no āri. Inkaro na tābo magrāman tabo balitok a sarāpa a inpaparin ni Solomon.
27 Dawa, namarin si Āri Rehoboam siras bronsi a sarāpa a panādi na sira, kan intalek na sa a para dyirad komander daw no taga-bantay saw do asdepanaw do palasyowaw no āri.
28 Do kāda nakangay no āryaw do timplo naw ni ĀPO, inyangay dan taga-bantayaw sarāpa saw, kan do nakapaybidi naw no āri, pinabidi daw sarāpaw do pangapyanaw so armas dan gwardya.
29 Siraw kadwan saw a napariparin do nakapagāri ni Rehoboam, kan tabo pinariparin na, ki naitolas sabawri do librowaw no pakasaritāan dan ar-āri no Joda?
30 Nāw na myan gobat do payawan da Rehoboam kan Jeroboam.
31 As nachipaynahah si Rehoboam dyirad aāmang na saw, kan naitābon a nachirapa dyira do syodadaw ni Dabid. No ngaran ni ānang na, ki si Naama a Ammonita. Si Abiham a pōtot na, ki nachitādi dya a āri.