5
No Kaisagāna so Kapatnek so Timplo
(2 Kron. 2:1-18)
1 Do nakadāmag ni Hiram a āri no Tiro a napatnek dana si Solomon a āri a nachitādi di āmang na a si Dabid, tinoboy na saw pinakainawan naw di Solomon, ta pirmi a nachisīt di Dabid do nakarahan.
2 Pinabidi ni Solomon nyaya minsāhi na di Hiram:
3 “Chapatak mo a napatnek aba ni āmang ko a si Dabid timplowaw a pangidaydayāwan so ngaran ni ĀPO a Dyos na maynamot do kapachigobat na dyirad omdibon na. On, napatnek aba a mandad nakapangay ni ĀPO siras kabōsor na do tokapan na.
4 Ki sichangori, si ĀPO a Dyos ko, intoroh naw talna do omdibon ko. Apabaw kabōsor mana didigra.
5 Dawa, panggepen ko a patneken timplo a pangidaydayāwan so ngaran ĀPO a Dyos ko a akma so inbahey naw ni ĀPO di āmang ko a si Dabid a kāna, ‘Iyaw pōtot mo a padisnahen konchi do trono mo a tādi mo, ki mapatnek anchi so timplo a pangidaydayāwan so ngaran ko.’
6 “Dawa, ibilin mo a manongeh sa so kayokayo a sidro do Lebanon a para dyaken. Siraw trabahador ko machirāman sanchi dyirad trabahador mo. Magbāyad akonchi dyimo para dyirad trabahador mo aran papiraw ibahey mo a tangdan da, ta chapatak mo a sanay kami aba a manongeh so kayokayo a akma siras Sidonyo saw.”
7 Do nakadngey naw ni Hiram so minsāhi ni Solomon, taywaraw kasoyot na, kan binata na a kāna, “Maidāyaw pakono si ĀPO sichangori, ta tinorohan na si Dabid so masīrib a pōtot na a magtoray do nya mabīleg a nasyon.”
8 Sinpangan na, nanoboy si Hiram so nangyangay so nya minsāhi di Solomon:
“Narawat ko minsāhyaw a inpaw-it mo, kan parinen konchi tabo chakey mo do kapanoroh ko so sidro kan saleng a toroso.
9 Siraw trabahador ko, ki manggōyod sanchi siras toroso a iyosok da a yapo do Lebanon a komwan do kanayan. Patapawen ko sanchi do tāw a takeden a akmay balsa a ikwan do chakey mo a pakarayan sira. Dawrinchiw pamaysisyayan ko sira, kan ikaro mo na sanchi. No pachibayat monchi, ki iyaw kapanoroh mo so kanen a para dyira do palasyo ko.”
10 Dawa, nanoroh si Hiram so tabo a toroso a sidro kan saleng a chinakey ni Solomon.
11 As no tādi na, nanoroh si Solomon di Hiram so 100,000 a kasalop a trīgo a mākan a para dyira do palasyo na. Otro, nanoroh pa so 110,000 a kagalon a pōro a lana no olibo. Komwan pinarin ni Solomon do kāda tawen.
12 Intoroh ni ĀPO kinasīrib di Solomon a akmas inkari na dya. Myan kapya da Hiram kan Solomon, kan namarin sa so tōlag da.
13 Pinaytarabāko na sa a inkapilītan ni Āri Solomon 30,000 a trabahador a yapo do intīrwaw a Israel.
14 Tinoboy na sa do Lebanon a maytatādi a tayisa poho a rībo do kāda bohan. Tan komwan, maytarabāko sa do Lebanon so asa kabohan, as kasabat da so dadwa kabohan do bahay da. Si Adoniram, ki iyaw manyidechideb siras napīlitan saw a maytarabāko.
15 Myan di Solomon 80,000 a mangakchikchid so bato do katokotokonan, kan 70,000 a taga-sabhay.
16 As myan paw 3,300 a manyidechideb so tarabāko kan mangidaōlo siras trabahadoraw.
17 Do bilin ni āri, nangchikchid sa so magaganay a rarakoh a bato tan myan anchiw makwadrado sa a bato do kapatnek no pondasyon no timplo.
18 Siraw mapatnekaw ni Solomon kan Hiram, kan siraw trabahadoraw a taga Gebal, ki nangisagāna sa siras toroso kan bato para do kapatnek so timplo.