7
No Kapatnek ni Solomon so Palasyo Na
1 Napatnek pa si Solomon so palasyo na, kan asa poho kan tatdo a katawen na a namarin sya.
2 Napatnek pa so palasyo a mayngaran so Palasyo no Kahasan no Lebanon. Iyaw kanaro na, ki 150 a kadapan, 75 a kadapan karahawa na, kan 45 a kadapan so kakarang. Myan apat a kalinya a sidro a parey, kan myan saw sekeg a sidro a nachidātok.
3 As naatepan so sidro do tohos daw no sekeg a nachidātok dyirad pareyaw. Myan saw 45 a parey, as kan 15 kāda linya.
4 Myan saw hamba no bintan na a taytotdo a kalinya, as kan naytotobang so bintan a taytotdo a kasagonodan.
5 Tabo dan pantaw na kan hamba na sa, ki kwadrado, as naytotobang a taytotdo.
6 As napatnek pa so mayngaran so Portiko dan Parey. No kanaro na, ki 75 a kadapan, as 45 a kadapan so kawbong. Myan patagwab na a naynyopos do salapen naw, kan nasirongan a nachidātok dyirad parey saw.
7 As napatnek pa so mayngaran so Kwarto no Trono a matawagan pa so Yanan no Pangokoman. Dawriw pangikeddengan na so kapangokom na. Pinakalopkopan na so tappi a sidro a yapo do rātag naw a manda do bobida.
8 Iyaw palasyowaw a mismo a pagyanan ni Solomon, ki napatnek do matarek a atat, do dyichodanaw no Yanan no Pangokoman, as machiyengay so arti. Napatnek pa si Solomon so akma syay a pagyanan a para do balasāngaw ni Paraon a kinabahay na.
9 Tabo nya, ki naparin sa dyirad magaganay a rarakoh a bato. Nakchid kan nakwadrado sa sigon do kosto a rokod da, as kan naragādi a maychamībit do salapen kan dichodan. Naosar sa a yapo do pondasyon a manda do reyan, kan do gagan a kominwan do karakohanaw a atat.
10 Siraw pondasyon na saw, ki naintaran so magaganay a rarakoh a bato a asa poho kan dadima mana asa poho kan dadwa a kadapan so kananaro.
11 Napamanyitwan pondasyon saw so kadwan saw a magaganay a bato a nakwadrado sigon do kosto a rokod da. Napamanyitwan pa so tablon a sidro a sekeg.
12 Iyaw karakohanaw a atat, ki nadibon no ahad a taytotdo a katoon a nakwadrado a bato, as napakatayhapotan so tayisa kabatoy a tablon a sidro a sekeg. Masaw do makatayrahemaw a atat no timplo ni ĀPO kan iyaw asdepan a kwarto na.
No Tarabāko ni Hiram
(2 Kron. 2:13-14)
13 Nanoboy si Āri Solomon so nangay do Tiro kan inpahap na si Hiram.
14 Iya, ki anak no bālo a yapo do trībo no Naptali. Si āmang na, ki taga Tiro a trabahador do tombāga. Si Hiram, ki sanay kan pādas naw tabo a klāsi no tarabāko do tombāga. Nangay di Āri Solomon, kan pinarin na tabo tarabāko a naipairebbeng dya.
No Dadwa Tombāga a Parey
(2 Kron. 3:15-17)
15 Nanyipo so dadwa parey a tombāga. Kāda asa, ki 27 a kadapan so kakarang, as kan 18 a kadapan so kapaymemeh.
16 Namarin pa so dadwa a pang-oho para do dadwaw a parey a yapo do naronaw a tombāga. No kakarang no kāda asa a pang-oho so parey, ki papito kan godwa a kadapan.
17 Sinpangan na, namarin so dadwa kahwas a nalāga a myan saw nayādoday a mayhohobid a kadina a para do pang-oho no kāda parey. Namarin so taypipito do kāda pang-oho.
18 Masaw, namarin so dadwa a kabatoy a tombāga a sinan granada a pinasingsing na do pang-ohwaw a madātok do pareyaw. Komwan pinarin na do asaw a pang-oho.
19 Siraw pang-ohwaw a madātok do pareyaw a maytēnek do asdepanaw a kwarto, ki mamanyito saw sinan korona a napōtar sa a akmay sinan bakong, as tayenem sa a kadapan so kakarang.
20 Do toknolen naw no kāda pang-oho a sinan bakong, kan masngen do kahwasaw, dawriw yanan naypadibon a dadwa gasot a sinan granada do dadwa a kabatoy.
21 Pinatnek na saw pareyaw do asdepanaw do timplo. Iyaw pareyaw a mangket do abagātan, ki pinangaranan na si Jakin. As iyaw mangket naw do ammyānanaw, ki pinangaranan na si Boas.
22 Do toknolen no pang-oho no parey saw, ki myan napōtar sa a akmay sinan bakong. As iyaw tarabākwaw do parey saw, ki natayoka dana.
No Tombāga a Tangki
(2 Kron. 4:2-5)
23 Sinpangan na, namarin pa si Hiram so nachīpo a tombāga a tangki a naymemeh a matawagan so “Tāw.” No karahawa no bibi naw a maytobang, ki asa poho kan dadima kadapan, as papito kan godwa so karahem, kan apat a poho kan dadima kadapan iyaw rokod na a maypadibon.
24 Do ohbwaw no ngalab naw, ki napadibonan so dadwa a kabatoy a sinan tabayay a nachilānang do tankyaw. Bāli anem do kāda asa kadapan.
25 Napadisnaw nya a tangki do bokot dan asa poho saw kan dadwa a sinan tōro a bāka a naysintatadyichokod. Tatdo, ki somnalap do ammyānan. Tatdo, ki somnalap do lāod. Tatdo, ki somnalap do abagātan, as kan tatdo, ki somnalap do dāya.
26 Iyaw katokpoh no nya tangki, ki tatdo a kapolgāda. As iyaw ngalab naw, ki naparin a akmas ngalabaw no kopa a akmas sinan sabongaw no bakong. Makahap so malābit a 10,000 a kagalon a ranom.
No Tombāga Saw a Karison
27 Namarin pa si Hiram so asa poho a karison a tombāga. Anem a kadapan no kanaro no kāda asa. Anem a kadapan no karahawa da, kan apat kan godwa a kadapan no kakarang da.
28 Komwan nakapamarin da: No dyinyin saw no kāha na, ki naparin sa a yapo do tombāga a naipasohot do maypadibonaw a pinakalebleb na.
29 Do dyindyin na saw, ki myan naibisti a sinan lion, sinan tōro a bāka, kan sinan naypanyid a parswa. Do tohos kan do ibaba dan sinan lion kan sinan tōro a bāka, ki myan saw napitpit a arkos a nachiborda.
30 Kāda karison, ki myan apat a tombāga a līgay na kan tombāga a ihi na. As do kāda sōli, ki myan tombāga a panarngan no maydisnaw a baldi. Siraw panarnganaw, ki nachīpo sa, as kan myan arkos da a naiborda do kāda bakrang.
31 Do irahem no karisonaw, ki myan tatārang na a naymemeh a paydisnan no baldyaw. Naypatohos a akmay korona so asa poho kan wawaho a kapolgāda a lomnabes do karisonaw, as dadwa poho kan papito a kapolgāda so karahawa a naytobang. Naiyorma saw nya a bisti do hapot naw no bakrang naw a naypadibon. Siraw dyindyin no karisonaw, ki kwadrado sa. Naymemeh saba.
32 Siraw apataw a līgay na, ki myan sa do ohbwaw no dyindyin na saw. Siraw ihi na saw no līgay saw, ki nachilānang sa do karisonaw. No kakarang no kāda līgay, ki dadwa poho kan papito a kapolgāda.
33 Siraw līgay saw, ki naparin sa a akmas līgayaw no logan a pachigobat. Siraw ihi daw, ngalab, rāyos, kan hobok, ki nachīpo sa tabo a yapo do tombāga.
34 Kāda karison, ki myan apat a pangigpetan na a asa do kāda soli a nachilānang do karisonaw.
35 Do ngalab naw no kāda karison, ki myan borda na a sasyam a kapolgāda so karahawa. Siraw panarngan kan dyindyin na saw, ki nachilānang sa do karisonaw.
36 Nangiyorma si Hiram so sinan naypanyid saw a parswa, sinan lion, kan sinan kayo a palma do hapot da saw no panarngan kan siraw dyindyin na saw. Do kāda maparin a pangayan do omdibonaw, pinangayan na so bisti a arkos.
37 Komwan nakaparin na siras asaya a poho a karison. Naparin sa a mayayalit so pōtar kan kararakoh.
38 Namarin pa si Hiram so asa poho a tombāga a baldi a asa do kāda karison. Kāda asa baldi, ki anem a kadapan so karahawa a naytobang, kan makahap so dadwa gasot kan dadwa poho a kagalon a ranom.
39 Pinangay naw dadimaw a karison do mangket naw do abagātan no timplowaw, as dadima do mangket naw do ammyānan. As pinangay naw tangkyaw a mayngaran so Tāw do abagātan a dayāen a soli no timplowaw.
40 Sinpangan na, namarin pa si Hiram so kalkaldiro, palpala, kan sabasabak.
As dawa, natayoka ni Hiram a tabo tarabākwaw a pinarin na a para di Āri Solomon do timplowaw ni ĀPO.
No Paytabwan no Warawara do Timplo
(2 Kron. 4:11 -5:1)
41 Nya saw pinarin na: siraw dadwaw a parey, siraw dadwaw a pang-oho a sinan korona do tōtokaw no kāda parey, siraw dadwaw a kahwas a mangbisti siras sinan koronaw do tōtok saw no parey,
42 siraw apat a gasot a sinan granada para do dadwaw a kahwas, (dadwa a kabatoy a sinan granada do kāda kahwas a mangbisti siras sinan korona saw do tōtok daw no parey),
43 siraw asa poho saw a karison kontodo asa poho saw a baldi,
44 iyaw tangkyaw kan asa poho saw kan dadwa a sinan tōro a bāka do sirok naw,
45 siraw kaldiro, pāla saw, kan sabak saw.
Tabo no nya a warawara a inpaparin ni Āri Solomon di Hiram a para do timplowaw ni ĀPO, ki napasileng a tombāga.
46 Inpaparin sa tabo ni āri saw nyaya do kapādo so naronaw a tombāga dyirad pormaanaw a naparin do hota a mabaya do tanap no Jordan do payawan no Sokkot kan Saretan.
47 Inpakīlo saba ni Solomon tabo nya saya, ta taywara so kāro. Dawa, natonngan dabaw no karahmet da.
48 Namarin pa si Solomon so tabo a maosar do timplo ni ĀPO: iyaw balitokaw a altar, iyaw balitokaw a lamisaan a para do tināpay a maidāton do Dyos,
49 siraw asa poho a pamadatōkan so soho a pōro a balitok do salapen no makatayrahemaw a kwarto (a dadima do mangket naw do abagātan, as dadima do mangket naw do ammyānan), sinan sabsabong, soho saw kan siraw sosopit saw, ki balitok sa a tabo.
50 As myan pa saw kopa, panopit saw so pabīlo, sabasabak, longlongan saw a para insinso, kan siraw pangayanaw so inmaya, ki pōro sa a balitok a tabo. As myan pa saw misagra a balitok para do aneb saw no makatayrahemaw a kwarto a iyaw kasasantwanaw a yanan, kan para do aneb saw do karakohanaw a kwarto no timplowaw. Tabo sa, ki naparin do balitok.
51 Do nakatayoka danaw no tabo tarabāko ni Āri Solomon do timplowaw ni ĀPO, inhap na saw indidikar saw ni āmang na a si Dabid a siraw pirakaw kan balitok, kan kadwan saw a warawara, as pinangay na sa do pangapyanaw do timplo ni ĀPO.