9
No Kapagparang ni ĀPO di Solomon
(2 Kron. 7:11-22)
1 Do nakatayokaw ni Solomon a napatnek so timplo ni ĀPO, no palasyo naw, kan tabo a chakey na a patneken,
2 napaboya si ĀPO dya a minirwa a akmas nakapagparang naw do Gibeon.
3 Binata ni ĀPO a kāna, “Nadngey ko dasal kan kapangdakdaw mo do salapen ko. Intatārek ko a masantwan a para dyaken nyaya timplo a pinatnek mo do nakapangay mo so ngaran ko daw a abos pandan. Siraw mata ko kan pōso ko, ki nāw danchi daw.
4 “As imo, an siaannad ka do kabibyay mo do salapen ko a akma si Dabid a āmang mo do kinasingpet no pōso kan kinalinteg na, kan parinen mo tabo a inbilin ko as tongpalen mo saw pangeddeng kan linlinteg ko,
5 patneken konchiw trono mo do pagāryan a Israel a abos pandan a akmas inkari ko di Dabid a āmang mo do nakaibahey kwaw sya a kon ko, ‘Abanchi a polos dya kapaydisna no kapotōtan mo do trono no Israel.’
6 “Ki an imo kan siraw kapotōtan mo, ki tomadyichokod kamo dyaken, kan dyi kamo a magtongpal do bilbilin ko kan pangeddeng ko a intoroh ko dyinyo, as kan mangay kamo a magsīrbi dyirad kadwan saw a dyos kan magdāyaw dyira,
7 paksyaten konchiw tawotawo no Israel do tanaw a intoroh ko dyira. As aran iyaw timplowaya a intatārek ko a masantwan a pangidaydayāwan so ngaran ko, abohen ko do kapanyideb ko. Mayparin anchiw Israel a panyinyirin kan bisti no dangoy dan tabo tawotawo.
8 Iyaw nyaya timplo, ki mayparin anchi a nakawpwan no karārayaw. Tabo sanchi a homabas daw, ki chakigtot danchi, kan oyawen danchi a batahen da a kon da, ‘Āngo ta komwan pinarin ni ĀPO do dya a tana kan do dyaya a timplo?’
9 Atbayen danchi no tawotawo a kon da, ‘Maynamot ta tomnadyichokod sa di ĀPO a Dyos da a iyaw nangihtot siras aāmang da saw do Egipto, as kan nachidket sa do matarek saw a dyos, dinaydāyaw kan nagsīrbyan da sa, nawriw naynamotan na a inyangay ni ĀPO tabo didigra dyira!’ ”
No Kadwan Sa a Kaparin ni Solomon
(2 Kron. 8:1-3; 8-18)
10 Do nakatayoka no dadwa a poho a katawen, ki nakapatnek dana si Solomon so dadwa a bahay a iyaw timplowaya ni ĀPO kan no bahayaya a palasyo no āri.
11 Nanoroh si Āri Solomon di Hiram a āri no Tiro so dadwa a poho a idiidi do Galilya maynamot ta tinorotorohan ni Hiram iya so tabo a kayo a sidro kan saleng kan tabo a balitok a chinakey na.
12 Ki do nakangay ni Hiram a yapo do Tiro a nanyideb so idiidi saw a intoroh ni Solomon dya, ki chinahwahok na saba.
13 Inyahes ni Hiram a kāna, “Āngo saw klāsi da no nya saya idiidi a intoroh mo dyaken, mo kakteh?” Dawa, pinangaranan da sa so Tana no Kabol a manda pa sichangori a araw.
14 Ki nakaipaw-it dana si Hiram so 4,500 a kakīlo a balitok di Solomon.
15 Nyayaw pakasaritāan da no pinaytarabāko saw a inkapilītan ni Āri Solomon a napatnek so timplo ni ĀPO kan iyaw bōkod naw a palasyo, iyaw Millo, iyaw ahad naw no Jerosalem, kan siraw syodad a Hasor, Megiddo, kan Geser.
16 (Rinaot kan sinakōp ni Paraon a āri no Egipto iyaw syodad a Geser, kan sinosohan na. Diniman na saw Kananeo a omyan daw, as intoroh na a pinakarigālo do kasar no balāsang naw a kinabahay ni Solomon.
17 Dawa, binangon a minirwa ni Solomon iyaw Geser.) Binangon na pa a minirwaw Manayahbo a Bet-horon,
18 Baalat, kan Tamar do let-ang a myan do tana a Joda.
19 Binangon na sa a minirwa siraw pangapyan a syodad a dyira na, kan siraw idiidi a pangkapyan siras logan na a pachigobat kan dyirad kabalyo na saw. Aran āngo a magostwan na, ki patneken na do Jerosalem, do Lebanon kan do intīro a pagtorayan na.
20 Myan saw tawotawo a nabidin dyirad Amoreo, Heteo, Pereseo, Hibeo, kan Jeboseo. (Siraw nyaya tawotawo, ki Israelita saba).
21 Siraw kapotōtan da, ki nabidin sa do dyaya a tana a dya inopas no Israelita. Siraw nyaya, ki pinīlit ni Solomon a maytarabāko a adīpen na manda sichangori.
22 Ki nangadīpen aba si Solomon so aran sino a Israelita. Basbāli a nagsīrbi sa a soldādo, opisyalis, komander, kapitan, komander dan logan sa a pachigobat kan komakabalyo na sa.
23 Myan 550 a pangōlo a opisyalis a makatoneng dyirad ipatarabāko ni Solomon. Manyidechideb sa siras tawotawo a maytarabāko.
24 Pinatnek ni Solomon iyaw Millo do nakapayadis narana no balāsang naw ni Paraon a yapo do syodad ni Dabid do yananaw no palasyo a pinatnek na a para dya.
25 Maypitdo do makatawen a nangidāton si Solomon so dāton a masosohan kan dāton a pachikapya do altaraw a pinatnek na para di ĀPO. Sinosohan na pa saw insinswaw a ingeddan do salapen ni ĀPO. Dawa, pinakabos naw rebbeng naw do timplo.
26 Namarin pa si Solomon so bonggoy no gapor do Esyon-geber a masngen do idi a Elat do Edom a myan do payis no Mabaya a Tāw.
27 As tinoboy ni Hiram tripolanti na saw a bisādo do tāw, tan machipagsīrbi sa dyirad tripolanti saw no bonggoy no gapor ni Solomon.
28 Nagbyahi sa a kominwan do tana a Opir, kan nanghap sa so pinanawbi da a balitok a asa poho kan anem a katonilāda a inyangay da di Āri Solomon.