3
No Maynamot Dyirad Jodyo
(Roma 9:4-5)
1 Changori, sigōro myan iyahes nyo do aktokto nyo a kon nyo, “Na, an komwan, āngo sīrbi na an naiyanak a Jodyo asa a tawo?” mana “Masisītawri a onotan dadakayaya a kapagkogit?”
2 No atbay ko dyirad dawri sa kapanahes nyo, ki masīrbi sa. No manoma, ki siraw Jodyo nangitalkan ni Āpo Dyos so chirin na.
3 Ki an dya mapagtalkan kadwan saw a Jodyo, chakey nawri a batahen a mapagtalkan paba si Āpo Dyos a mangtongpal so kari na dyira?
4 Samna, engga! Aran mabayataw dana tabo tawotawo do lōbongaya, ki si Āpo Dyos, ki engga, ta polos a dya matādyan kari na, ta akmas naitolas do Masantwan a Tolas a kāna,
“Malawag pakono a maboya a siraw chirin mom Āpo Dyos, ki nāw da a malinteg.
Dawa, maparin aba padsohen no aran sino a mangidarom dyimom Āpo.”
5 Ki sigōro myan kadwan dyinyo a makabata so nya, “Ayket! An iyaw kapamarin tas marahet mangipaboya so malawag a kalinteg no Dyos, madi si Āpo Dyos, ta āngo ta dosāen na pa yaten?” Yaken abaw mangibahey syay ah. Ki ibahey ko lang nya a akmas kapangibahey daw no kadwan.
6 Aysa, engga! Dyi pakono a maparin a komwan ah! Ta an chasoyot naw gatos, maypāngo a mangokom si Āpo Dyos so tawotawo do lōbongaya?
7 Ki myan saw akin atbay so komwan a kon da, “Anchi ka! Kaspangarigan, an yapo do kabayataw ko ad-adda pakaboyan so kaoyod no chirin no Dyos as paypayparakohen kaidāyaw na, āngo ta maokom ako pa a akmay asa maygaygatos?”
8 An komwan dana, āngo ta dyi ta inanawo komwan: “Ngay na, mamarin ta nas marahet tan malawag a maboya ta iyaw maganay”? Aysa! Oltimo a maddiw nyaya, ki alit na myan saw makabata a inanawo ko kono komwanaya. Ki taywaran binata ko komwan! Masigorādo a madōsa sanchiw makabata so komwan, ta nawriw rombeng dyira!
No Kabo no Malinteg a Tawo
9 Dawa, āngo myan do aktokto ta sichangori? Mabata tawri a yaten a Jodyo, ki maganaganay kan siraw dyaw a Jodyo? Samna, engga ah! Inpaboya ko na a tabo no tawotawo aran Jodyo mana Dya-Jodyo, ki inadīpen sa no gatos.
10 Ta malawag a maboya taw nyaya do Masantwan a Tolas a kāna,
“Aba polos malinteg a tawo do lōbongaya.
11 Aba polos kapakaāwat da a maynamot do Dyos
mana makey a omchichwas sya.
12 Tinadyichokodan da si Āpo Dyos,
as kan nayparin sa tabo a abos sinpaspangan.
Abaw aran asa dyira mamarin so kosto.
13 Akmay naywangan a tanem kayarigan dangoy daw
do kāron malapos a chirin da.
Maynana mararahet a bayataw ibalbalikas no rida da.
Akmay dīta no karasaen pahtoten bibi da saw.
14 Napno paw dangoy da so kapangabay kan chirin
a mangipaboya so kapakasoli kan kapangipsok da.
15 Sisasagāna sa a mangdiman so kapayngay da a tawo.
16 Aran dino ngayan da, ki nawriw matokos da daw kapangrārayaw
kan kapanglidyalidyat da so kapayngay da tawo.
17 Chapatak daba polos maybibyay a machitōnos.
18 Aba polos kāmo da di Āpo Dyos.”
19 Nawriw inpatolas ni Āpo Dyos do Masantwan a Tolas. As sichangori, chapatak ta na a inpākat naba ni Āpo Dyos linteg naya tan sira lang Jodyo magtongpal sya, an dyi pa siraw dyaw a Jodyo. Tan komwan, mapagsardeng na saw pagpambar daw no aran sino a tawo anchan okomen sa no Dyos.
20 Ta abaw tawo a maibidang a malinteg do salapen no Dyos a maynamot lang do katongpal so linteg. Naitoroh lang linteg tan ipakatoneng na a myan gatos.
Iyaw Kapalinteg no Dyos so Tawo
21 Dawa, sichangori, naipakatoneng danaw kapangpalinteg no Dyos so tawo a abwa polos kaibibyangan linteg. Inpakatoneng ni Āpo Dyos nyaya do kaychowa pa do nakaipatolas naw sya da Moyses kan siraw propīta saw do Masantwan a Tolas.
22 On, maibidang asa tawo a malinteg do salapen ni Āpo Dyos a maynamot lang do kapanganohed na di Jeso-Kristo. Parinen no Dyos nyaya do tabo a manganohed di Kristo, kan tatarken na saba.
23 Ta naygatos a tabo tawotawo, kan mabawa sa tabo do pakahwahokan no Dyos.
24 Ki aran komwan, maynamot do rakoh a parābor na, ibidang na yaten a malinteg do salapen na a maynamot do pinarin ni Kristo Jesos a nanglibri dyaten.
25 On, tinongdo ni Āpo Dyos si Jesos a nangikāro so gatogatos dan tawotawo tan maynamot do nakawyog no raya na do nakadiman naw do kros, ki napakawan danaw tawotawo an oyod a manganohed sa dya. Pinarin ni Āpo Dyos nyaya tan ipaboya na iyaw kalinteg na a mangokom so tawotawo a aran inan-anōsan na sa a dyi na sa dinosaw nakagatosaw dya do nakahabas a araw.
26 Ki sichangori, pahabasen paba no Dyos gatos dayan tawotawo, ta inpaboya naranaw kalinteg na do nakaparapas naw so gatos no tawotawo a nachilanlansa di Jesos do kros. Komwan nakaipaboya sya no Dyos a taywaras kalinteg, as kan maparin na a palintegen tabo tawotawo a manganohed di Jesos.
27 Changori, aryoriw maipangas ta maynamot do nakapalinteg ta? Polos! Napalinteg tabaya do nakatongpal ta so linteg, an dya iyaw kapanganohed taw di Āpo Jesos, kan nawri lang maparin ta pagtangsit.
28 Ta malawag dana sichangori a iyabaw kapagtongpal taw do linteg iyaw pakaibidangan ta a malinteg do salapen ni Āpo Dyos, an dya iyaw kapanganohed taw di Āpo Jesos.
29 Sirawri lang Jodyo akin Dyos so Dyos? Iyabawriw Dyos da paw no dyi saw a Jodyo? Taywaran dyi pa iyaw Dyos da?
30 Ta asa lang Dyos, kan ibidang na sa malinteg Jodyo saw an manganohed sa di Āpo Jesos. Komwan saw Dya-Jodyo, ta ibidang na sa malinteg an manganohed sa di Āpo Jesos.
31 Changori, mabata tawri a arabaw sīrbi no bilbilin saw ni Āpo Dyos a intoroh na dyirad Jodyo saw? Engga! Ta no kaoyodan na, ki iyaw kapanganohed taw di Āpo Jesos manoroh so katongpal ta so nawri sa bilbilin.