2
No Dasal ni Hanna
1 Do dāwri, naydasal si Hanna, kan binata na a kāna,
“No pōso ko, ki chasoyot na si ĀPO.
Ayit ko, ki naypaypāngay maynamot di ĀPO.
No dangoy ko, ki mamimyeng dyirad kabōsor ko,
ta oltimo karagsak ko do nakapangisalākan mo.
2 “Apabaw masantwan a akma di ĀPO.
Abaw akma dya. Abaw Lāyit akma do Dyos ta.
3 “Maychiychirin ka paba a makapapāngas.
Mapahtot ka pabas makospag a chirin do dangoy mo,
ta si ĀPO, ki Dyos a makapatak so tābo,
kan okomen na saw kaparin ta.
4 “Mapotot saw bai dan mabibīleg a taga-gobat,
ki maarmasan sa so kayit komnapsot saw.
5 Siraw mabsoy, machihornal dana sa para do kanen da,
ki siraw maychapteng saw, maptengan pa saba.
Iyaw hopes a mabakes, nakaiyanak so papito.
Ki no āro so anak, taywara maliday, ta nabo dana sa.
6 “Si ĀPO, ki mangdiman kan manoroh so byay.
Mapagchin do yanan dan nadiman kan makapagōngar.
7 Yangay ni ĀPO kapagpobri kan kapaypabaknang.
Iyaw mapabodis kan iyaw mangitan-ok.
8 Bangonen na saw mapopobri a yapo do kahbekan,
kan katkaten na saw makachitaw a yapo do katotoōkan
a pachidisnahen dyirad prinsipi,
kan patawīdan so madāyaw saw a paydisnan.
“Ta siraw pondasyon no tanaya, ki dyira ni ĀPO,
kan dawriw pinatnekan na so lōbong.
9 Bantayan naw mapodno saw a tawotawo na.
Siraw marahet, ki paolimeken na sanchi do kasaryan,
ta magballīgi abaw asa tawo do bōkod na a ayit.
10 Siraw komontraw di ĀPO, ki rārayawen na sanchi.
Adeyen na sanchi so makayapo do hanyit.
Si ĀPO, ki mangokom anchi so intīro a lōbong.
Itoroh nanchiw bīleg do āri na,
kan itan-ok nanchiw panakabalin no napidi naw.”
11 Sinpangan na, somnabat dana si Elkana do Rama. Iyaw adekeyaw, ki nabidin do Silo a magsīrbi di ĀPO do kainanawo sya ni Eli a pādi.
Siraw Mararahet a Pōtot ni Eli
12 Mararahet saw pōtot ni Eli. Tod da dyābat si ĀPO.
13 No dadakay dan papādi dyirad tawotawo, ki komwan. An myan mangidāton, do kadama na a malaneg no karni, mangay iyaw pachirawatanaw no pādi a nakaigpet so tinidor a myan so tatdo a panodok.
14 Itodok na do palanggana mana kardiro mana silyasi, kan an āngo mahap no tinidoraw, ahapen no pādi a pinakadyira na. Komwan pinariparin da dyirad Israelita saw a mangay do Silo.
15 Ki aran do kasakbay pa no kasosoh no tabaw, mangay iyaw pachirawatanaw no pādi kan ibahey na do tawowaw a mangidāton a kāna, “Manoroh ka so karni a pasohen no pādi, ta rawaten naba dyimo nalanegaw a karni, an dya iya lang sadīwa paw.”
16 An binata no tawowaw dya a kāna, “Na, sosohan ta pa manmaw tabaya ah, as kahap monchi so chakakey mo,” itbay nanchi no pachirawatanaw a kāna, “Ay engga ah! Itoroh mo na dyaken changori. An chaskeh mo aket, agāwen ko.”
17 Iyaw nya gatos dan babbaro, ki taywara marahmet do kapanyideb ni ĀPO, ta abaw kaanyib da so dāton a para di ĀPO.
Si Samwel do Silo
18 Ki si Samwel, tinongtong naw magsirsīrbi di ĀPO a aran adekey pa kan nakalaylay so epod a tela.
19 Tinawen, ki namarin si ānang na so dēkey a kagay na, kan inyangay na dya do kangay daw kan lakay na a mangidāton so tinawenaw a dāton da.
20 Do dāwri, binindisyonan ni Eli sa Elkana kan si baket na, as nakabata na sya di Elkana a kāna, “Torohan na pakono imo ni ĀPO so pōtot maynamot do dyaya mabakes tan myan machitādi do pinaydaydasal naya kan intoroh naya di ĀPO.” Nakabata naw syay, somnabat dana sa.
21 Oyod a binindisyonan ni ĀPO si Hanna. Nabōgi kan naymanganak so tatdo a mahahakay kan dadwa mababakes. As iyaw adekeyaw a si Samwel, ki nayparakoh do salapen ni ĀPO.
22 Do dāwri, laklakayan dana si Eli. Napatakan na tabo pariparinen daw no pōtot na saw dyirad tabo Israelita, kan an maypāngo da oknoden saw mababakes saw a magsirsīrbi do asdepanaw no Toldaw a Pachibayabayatan di ĀPO.
23 Dawa, binata na dyira a kāna, “Āngo ta pariparinen nyo komwan? Nadngey ko dyirad tabo tawotawo maynamot do gatos saya a pariparinen nyo.
24 Inyo a anak ko, komwan aba ah! Maganay abaw nya dāmag a nadngey ko a magwarwaras dyirad tawotawo ni ĀPO.
25 An maygatos tawo do kapayngay na a tawo, si ĀPO mangibabaet dyira. Ki an tawo maygatos di ĀPO, sino mapaychapya dyira?” Ki aran komwan, inadngey daba si āmang da, ta inkeddeng dana ni ĀPO kadiman da.
26 As iyaw adekeyaw a si Samwel, ki tinongtong naw nayparakoh kan naypangay pa a nahwahok na si ĀPO kan tawotawo.
No Padto a Maikontra do Pamilya ni Eli
27 Myan propīta no Dyos a nangay di Eli, kan binata na dya a kāna, “Nyaw bata ni ĀPO: ‘Napaboya ako abawri di simna Aaron kan pamilya na do Egipto do kayan da paw a adīpen Paraon?
28 Pinidi ko iyaw kapoonan mo dyirad tabo a trībo no Israel a mayparin a pādi ko a mangay do altar ko, mangsosoh so insinso, kan maylaylay so epod do salapen ko. Intoroh ko pa dya kan pamilya naw binglay daw do tabo dāton a sinosohan dan Israelita.
29 Āngo ta agōman nyo pa saw sakripīsyo kan dāton da dyaken a inmandar ko dyirad tawotawo ko? Āngo ta ad-adda siraw pōtot mo dayāwen mo kan yaken do kapangpataba nyo so inawan nyo do kapaypidipidi nyo so kakteb saya no tabo dāton no tawotawo ko a Israelita?’
30 “As dawa, si ĀPO a iyaw Dyos no Israel, ki bata na a kāna, ‘Inkari ko a iyaw pamilya mo kan pamilya no aāmang mo, ki magsīrbi dyaken a pādi mandan pandan.’ Ki sichangori, bata ni ĀPO a kāna, ‘Engga dana! Siraw magdāyaw dyaken, ki dayāwen ko. Ki an sino saw mahanyinyi dyaken, ki ichipa ko.
31 Īto danaw araw a akteben ko ayit mo kan ayit dan kapotōtan mo tan abo danaw mangalkem do tābo no pamilya mo.
32 Mariribokan kanchi kan chahoho mo tabo a bindisyon a itoroh konchi dyirad Israelita, ki apabanchi a polos mangalkem do kapamilya mo.
33 No aran sino anchi a dya madiman a magsīrbi do altar ko, ki tod anchi a mabolsekan do hō na kan magmamayo do pōso na. Tabo kapotōtan mo, ki madiman sanchi do ispāda.
34 “ ‘Mayrayay sanchiw dadwaw a pōtot mo a madiman do asa araw a sa Hopni kan Pinehas. Mayparin nyaya a pangilasīnan mo.
35 Mapatnek akonchi para dyaken so mapodno a pādi a magtongpal so myan do pōso kan aktokto ko. Torohan konchi so kapotōtan na sa a magsīrbi do salapen na no napidi kwaw a abos pandan.
36 As tabonchi a mabyay do kapotōtan mo, ki mangay sanchi a magrōkob do salapen na para do asa kapidāso a pirak mana asa kakchid a tināpay, kan machikakaāsi sanchi a mangdaw so tarabāko a para do pādi tan myan kanen da.’ ”