5
Iyaw Baro di Ipatpateg Na a Nobya
1 Somdep ako do minoyongan kom ādi ko a nobya ko.
Ari ako a mangpeh so mirra kontodo pagbangbanglo ko.
Ari ko a kanen tagapolot no yokan ko kan bahay na.
Inoynomen ko palek ko kan gātas ko.
Siraw Sīt no Nobyo
Koman kan minom kamom sīt!
Atkan nyo a mandanchan makneb kamo do adaw.
No Chapat a Daniw
Iyaw Nobya di Chadaw Na a Baro
2 Nakaycheh ako, ki sirirīdam pōso ko.
Mangadngedngey! Si Chadaw ko, ari a magtoktok.
Iyaw Baro di Ipatpateg Na a Nobya
“Iwangan mo pa yaken mo ādi ko, ipatpateg ko,
boyit ko, kan abo pangpilāwan ko!
Ta no oho ko, ki naknebaya so apon.
No boboh ko, ki nabasa do salemsem no ahep.”
Iyaw Nobya di Chadaw Na a Baro
3 Nakabahas ako naya. Maylaylay ako nawri?
Nawyawyas ko naw kokod ko. Laposan ko nawri?
4 Do nakaitodah naw ni Chadaw ko so tanoro naw do baet no rihas,
naylalakat danaw bitek no pōso ko do kasoyot ko.
5 Naybangon ako a manyiwang a pasdepen ko si Chadaw ko,
ki napapotan saw tanoro ko so mirra.
Siraw kakamay ko, ki nabasa do maranom a mirra
do kaigpet kwaw so balonet no anebaw.
6 Iniwangan ko pantawaw tan somdep si Chadaw ko,
ki komnaro si Chadaw ko a nayam dana.
Marawa abaw no pōso ko iyaw kapagmamayo ko do nakakaro naw.
Chinichwas ko, ki nadongso kwaba.
Tinawagan ko, ki tominbay aba.
7 Nadongso da yaken magwanawan saw a magbanbantay
do kabidibidi daw do ahadaw no syodad.
Minahmah da yaken. Pinaychayateyatek da yaken.
Siraw magwanawan do ahadaw, inhap daw kagay ko.
8 Inyo a babbalāsang a taga Jerosalem, isapata nyo pa dyaken
a an masarakan nyo si Chadaw ko,
āngo ibahey nyo dya?
Ibahey nyo dya iganyit ko kadaw ko sya.
Siraw Babbalāsang a Sīt no Nobya
9 “Na maypāngo a si Chadaw mo, ki maganaganay kan kadwan,
imo a kapipintasan dyirad mababakes?
Maypāngo a si Chadaw mo, ki maganaganay kan kadwan
a machita mo yamen a magsapata dyimo?”
No Atbay no Nobya dyirad Babbalāsang
10 Si Chadaw ko, ki gwapo kan mayit.
Machitatārek dyirad pinoho a rībo.
11 Iyaw rōpa na, ki akmay pōro a balitok.
Magallo-allon boboh na, kan akmay kak kabaheng na.
12 Siraw mata na, ki somilsilap sa a akma siras boyit
do payis dan moyog a ok-oksong a mariyos do gātas
a naikolimas akma siras alāhas.
13 Siraw pisnyi na, ki akmay minoyongan
a yanan dan kayokayo a pangbangbanglo
a mapahtot so angot a mabanglo.
Siraw bibi na, ki akmay bakong
a maytetedted so maranom a mirra.
14 Siraw tachay na, ki akma siras toroso a balitok
a nakaikolimasan dan alāhas.
Iyaw inawan na, ki akmay napasileng a sōng no elipanti
a nabistyan siras mangīna a bato a sappiro.
15 Siraw kokod na, ki akma siras parey a marmol
a napatnek do pangsapatos saw a pōro a balitok.
Iyaw postora na, ki akma do Lebanon
a myan so makakarang a sidro a kayo.
16 No dadek a yapo do dangoy na, ki taywaras katami.
Iya, ki makadadaw paytābwan na.
Nya si Chadaw ko. Nya si sīt ko,
inyo a babbalāsang a taga Jerosalem.