☰ U Xhan 2
2
U bꞌaxa txaichil iꞌan u Jesuus
1 Uncheeꞌ tu tek itoxvaꞌ qꞌii tuul, bꞌanax maꞌl tzumbꞌaꞌa tu u tenam Canaa tikuenta Galilea. Utz antu atich opon tziꞌ vinan u Jesuus. 2 Utz antu savsal u Jesuus tuchꞌ qꞌul ichusulibꞌ majte. 3 Utz yeꞌt takꞌa u taꞌl uuva vaꞌl nichtaqꞌaxeꞌ. Ech aatz vinan u Jesuus, tal te ech tzaꞌ: —Motxyu u taꞌl uuva.— Texh te.
4 Tal u Jesuus te ech tzaꞌ: —Ixoj, ¿kam tokeꞌ aas naal ve? Tan yeꞌsaj topon u oora.— Texhtuꞌ.*
5 Pek aatz vinan, tal tu qꞌu xekol ech tzaꞌ: —Lenima tiꞌ kajay vaꞌl satal sete.— Texhtuꞌ. 6 Utz atich vaajil mamaj sivan txeꞌn tziꞌ. Kaꞌvaꞌl oj oxvaꞌl txeꞌn aꞌ nichaav tuul. Tan aꞌ vaꞌl nitxakunsa qꞌu Israeel tiꞌ u kostuumbre tetz txꞌaatxꞌochil.
7 Anchituꞌ. Tal u Jesuus tu qꞌu xekol ech tzaꞌ: —Noosataj qꞌu txeꞌn tu aꞌ tziꞌ.— Texh te. Utz bꞌoono inoosal motx iꞌana. 8 Tal tepaj te ech tzaꞌ: —Aatz cheel, lektaj jeꞌul bꞌioj utz, iqꞌotaj bꞌen xeꞌ u qꞌesal ilol tetz u nimla qꞌii.— Texhtuꞌ.
Ech tiqꞌot bꞌen. 9 Utz inach u aꞌ u qꞌesal ilol tetz u nimla qꞌii. Taꞌl uuvaich tekuꞌen. Loqꞌ yeꞌ tootzaj til cheek u tal uuva tziꞌ. Taꞌxh ootzajinich tetz qꞌu xekol til cheeka.
Ech aatz u qꞌesal ilol tetz u nimla qꞌii, isikꞌle tek u xiak vaꞌl tzumeꞌi. 10 Tal te ech tzaꞌ: —Kajay aanima nibꞌanon aas aꞌ bꞌaxal nitaqꞌ u bꞌaꞌnla taꞌl uuva. Utz anal nitukꞌal vaꞌl bꞌiit nitaleꞌ aas maꞌt tukꞌal sibꞌal u bꞌaꞌn. Pek aatz axh, vetatxaakeꞌl u bꞌaꞌnla taꞌl uuva; anal naaqꞌ cheel.— Texh te.
11 Uncheeꞌ aꞌ u bꞌaxa txaichil iꞌan u Jesuus tu Canaa tziꞌ, tikuenta Galilea. Utz ikꞌuch u mam itechalil u Tioxh kꞌatza. Ech nimal tu qꞌul ichusulibꞌ.
12 Ech aatz maꞌtich ipaal u kam tzaꞌ, motx bꞌen tu u tenam Capernauum. Bꞌen u Jesuus tuchꞌ vinan, qꞌul itzaꞌqꞌ utz, tuchꞌ qꞌul ichusulibꞌ. Utz iꞌan kaꞌxvaꞌl qꞌii tziꞌ.†
U tojchal eluꞌl qꞌu aa kꞌaꞌytu viqꞌanalil u totztioxh
13 Uncheeꞌ nichtekinajabꞌ vinimla qꞌii qꞌu Israeel, tiꞌ u Elchil Vatz Kamchil Tu Egipto. Utz bꞌenjeꞌ u Jesuus tu Jerusaleen. 14 Utz aatz opon tu viqꞌanalil u totztioxh, til qꞌu aa kꞌaꞌy vaakaxh, qꞌu aa kꞌaꞌy karneꞌl, tuchꞌ qꞌu aa kꞌaꞌy paroomaxh. Antu qꞌu chꞌexun puaj. Jolol kꞌujlich tziꞌ.‡ 15 Ech iꞌan maꞌl itzꞌuꞌm u Jesuus. Utz ipaasa eluꞌl kajay qꞌu aa kꞌaꞌy atich tu viqꞌanalil u totztioxh. Maꞌl teluꞌl tuchꞌ qꞌu karneꞌl, tuchꞌ qꞌu vaakaxh. Imakꞌeꞌl vipuaj qꞌu chꞌexun puaj utz, ixhutꞌpika qꞌul imeexha. 16 Utz tal tu qꞌu aa kꞌaꞌy paroomaxh ech tzaꞌ: —¡Eesataj qꞌu kam tziꞌ! Yeꞌ koꞌxh etaqꞌ bꞌens kꞌayibꞌal u totzotz vunTat tzaꞌ.— Texh te.
17 Ech ul sikꞌuꞌl qꞌu chusulibꞌ u yol vaꞌl tzꞌibꞌamichka ech tzaꞌ:
 
—Yeꞌ nunqꞌiꞌ tiꞌ val ootzotz aas kam koꞌxh nibꞌanax tuul.— Chia.§
 
18 Aatz tek qꞌu qꞌesal uqꞌaybꞌal tetz qꞌu Israeel, tal te ech tzaꞌ: —¿Kam xheenya sakꞌuch qe aas atil iijleꞌm tiꞌ qꞌu kam naꞌaneꞌ tziꞌ?— Texh te.*
19 Utz tzaqꞌbꞌel tu u Jesuus ech tzaꞌ: —Aqꞌtaj kuꞌ u totztioxh tzaꞌ utz, tu koꞌn oxvaꞌl qꞌii saqꞌaavunlakvu jeꞌ.— Texh te.
20 Tal tek qꞌu qꞌesala te ech tzaꞌ: —Maꞌl 46 yaꞌbꞌ veetik vikuentail u totztioxh tzaꞌ. Utz aatz axh, ¿tu koꞌn oxvaꞌl qꞌii saqꞌaavalakvu jeꞌ?— Texhtuꞌ.
21 Loqꞌ aatz u Jesuus tan, aꞌ koj chit nichtal vikuentail u totztioxh te. Pek aꞌ nichtal vichiꞌl. 22 Ech ul u yol sikꞌuꞌl qꞌu chusulibꞌ tal u Jesuus tziꞌ aas qꞌaav itzꞌpu u Jesuus xoꞌl qꞌu kamnaj. Ech inima u yol vaꞌl tzꞌibꞌamichka tuchꞌ qꞌu yol tal u Jesuus majte.
Vikꞌuchtu u Jesuus aas tootzaju taanima junun aanima
23 Uncheeꞌ atich u Jesuus tu Jerusaleen tu u nimla qꞌii tiꞌ u Elchil Vatz Kamchil Tu Egipto, sibꞌal aanima niman tan, nichtil qꞌu txaichil nichiꞌaneꞌ. 24 Pek aatz u Jesuus tan, nichkojikꞌujeꞌ ikꞌuꞌl tiꞌ qꞌu aanima. Tan tootzajich kam bꞌanel taqꞌo sikajayil. 25 Utz yeꞌk ministeer aas abꞌil sayolon ok qꞌu aanima te. Tan tootzajich kam atil tu taanima qꞌu aanima.
* 2:4 Aatz u yol tal u Jesuus tzaꞌ: —Yeꞌsaj topon u oora.— Chia. Aꞌ tokeꞌ aas yeꞌsaj topon u tiempo aas saxeꞌttaqꞌonin u Jesuus tinujul tiꞌ qꞌu kam tetz u Tioxh. Yeꞌsaj saxeꞌt viministeerio echaꞌ maꞌj alol tetz u yolbꞌal Tioxh niyolonka. † 2:12 Ex atinoj u Jesuus tu u tenam Capernauum tikuenta Galilea. Aꞌich u txꞌavaꞌ aqꞌax tu qꞌu Zabuloon tuchꞌ tu qꞌu Neftalii tikuenta u Josuee. Choktaj u Josuee 19.10-16, 32-39. Tu u tatin u Jesuus tziꞌ, nitzojpu u yol ibꞌaxabꞌsa talax u Isaias. Choktaj u Isaias 9.1-2. ‡ 2:14 Aatz tu u tiempo tziꞌ, kajay qꞌu aanima qꞌuꞌl nicheninach Tioxh tu viqꞌanalil u totztioxh, nichtoksa txꞌoloꞌm. Avan nichikꞌacheꞌ: vaakaxh, karneꞌl, tuchꞌ tentzun; seguun vitxꞌoloꞌm nitoksa. Ech aatz qꞌu puera qꞌuꞌl tzian nikꞌaskuꞌl, nichiloqꞌ maꞌj tavan tu viqꞌanalil u totztioxh tan, nichikꞌay tziꞌ. Utz nichichool u okebꞌalobꞌ tu viqꞌanalil u totztioxh unpajul jun yaꞌbꞌ majte. Loqꞌ kam koꞌnkoxh puaj nichibꞌanbꞌeleꞌ tan, txaaꞌ oj echi. Pek taꞌxh nichibꞌanbꞌel tiꞌ u choo okebꞌalobꞌ tu viqꞌanalil u totztioxh maꞌl u puaj “tiro” ibꞌii. Ech aatz kajay qꞌu aanima qꞌuꞌl nichentaqꞌ ikutxu tu viqꞌanalil u totztioxh tziꞌ, ministeer nichichꞌexu qꞌul ipuaj tuchꞌ u puaj tiro tziꞌ. Ech tokeꞌ nital tzaꞌ aas atich aa kꞌaꞌy avan tuchꞌ chꞌexun puaj chia. Utz jik koꞌnkoxh kꞌaꞌy utz, chꞌexu puaj nimotxiꞌaneꞌ. Pek nojla tiira mam subꞌuꞌm niꞌan tiꞌ u chꞌexu puaj. Utz aal aꞌ nimotxiꞌanvu okoꞌp tu viqꞌanalil u totztioxh majte. Taꞌxh koj pek yaꞌvla chaj avan nikꞌayi majte aas tiira txaaꞌ tu u oꞌtla mantaar. Loqꞌ aꞌ imol qꞌu qꞌesala tu viqꞌanalil u totztioxh tiꞌ isubꞌax qꞌu aanima. § 2:17 Choktaj u Salmos 69.9. * 2:18 Aatz u yol “qꞌu qꞌesal uqꞌaybꞌal tetz qꞌu Israeel” chiꞌoꞌ, ayaꞌ u yol “los judios” tu kastiya.
☰