12
Nichusun u Pablo tiꞌ u tijleꞌm unqꞌa niman tetz u Jesús uvaꞌ ni taqꞌ u Tiixhla Espíritu ste
Aꞌ ni valeꞌ, vitzꞌin vatzik, uvaꞌ la etootzi isuuchil unqꞌa qijleꞌmeꞌ uveꞌ ni taqꞌ u Tiixhla Espíritu sqe.
Tan ateꞌ sekꞌuꞌl uvaꞌ tul yeꞌxnik ekꞌujbꞌaꞌt ekꞌuꞌl tiꞌ u Kubꞌaaleꞌ, as nik kuxh etaqꞌ etibꞌ subꞌloj tiꞌ etoksat iqꞌii unqꞌa tzeꞌ tiixheꞌ uveꞌ yeꞌ ni tiineꞌ.
Estiꞌeꞌ ni val sete uvaꞌ yeꞌ la uch teesat umaj uxhchil iqꞌii u Jesús, asoj aꞌ u Tiixhla Espíritu la aqꞌon itxumbꞌal tiꞌ talat u yoleꞌ. As yeꞌxhebꞌil la alon uvaꞌ: «Aꞌ u Jesúseꞌ u kuBꞌooqꞌoleꞌ,» chaj la taleꞌ, asoj yeꞌl u Tiixhla Espíritu at tu u taanxelaleꞌ.
As jit eela unqꞌa qijleꞌmeꞌ uveꞌ ni taqꞌ u Tiixhla Espíritu sqe. As umaꞌl kuxheꞌ u Tiixhla Espíritu uveꞌ ni aqꞌon sqe.
As jit eela unqꞌa aqꞌoneꞌ uveꞌ nu kubꞌaneꞌ tiꞌ toksal iqꞌii u Tiixheꞌ. As umaꞌl kuxh u kuBꞌooqꞌoleꞌ uveꞌ ni aqꞌon u qaqꞌoneꞌ.
As jit eela unqꞌa bꞌaꞌnileꞌ uveꞌ at kan sukuxoꞌl. As umaꞌl kuxheꞌ u Tiixheꞌ uveꞌ ni bꞌanon unqꞌa bꞌaꞌnileꞌ skajayil sukuxoꞌl.
As ni taqꞌ u Tiixhla Espíritu vibꞌaꞌnileꞌ sqe skujununilaj, tiꞌ uvaꞌ la kuloch veꞌt qibꞌ sukuvatzaj.
Tan at unqꞌa qitzꞌin qatzikeꞌ uvaꞌ aqꞌel itxumbꞌal taꞌn u Tiixhla Espíritu. As ati uvaꞌ ni taqꞌ u Tiixhla Epíritueꞌ itxumbꞌal tiꞌ talat isuuchil u yoleꞌ uvaꞌ kat ikꞌuch Aak ste.
As ati uvaꞌ at kꞌujlebꞌal ikꞌuꞌl taꞌn u Tiixhla Espíritu tiꞌ ikꞌuchat u nimla bꞌaꞌnileꞌ uvaꞌ tetz u Tiixheꞌ. As ati uvaꞌ ni txꞌolon ibꞌaꞌnxisat unqꞌa aachꞌoꞌmeꞌ taꞌn u Tiixhla Espíritu.
10 As ati uveꞌ kat taqꞌ u Tiixhla Espíritu itxumbꞌal tiꞌ ibꞌanat unqꞌa kꞌuchbꞌal tetz vibꞌaꞌnil u Tiixheꞌ uvaꞌ xoꞌvebꞌal chittuꞌ. As ati uvaꞌ at itxumbꞌal tiꞌ talat isuuchil viyol u Tiixheꞌ taꞌn u Tiixhla Espíritu. As ati uvaꞌ kat taqꞌ u Tiixhla Espíritu itxumbꞌal tiꞌ ipal stuul ma tetz Tiixh u yoleꞌ uvaꞌ ni talpeꞌ moj yeꞌle. As ati uvaꞌ kat taqꞌ u Tiixhla Espíritu tiꞌ iyolbꞌet kaꞌt yolbꞌal. As ati uvaꞌ kat taqꞌ u Tiixhla Espíritu itxumbꞌal tiꞌ talat isuuchil unqꞌa yoleꞌ uvaꞌ ni talpu tu umaꞌt yolbꞌal.
11 As jankꞌal unqꞌa bꞌaꞌnileꞌ uveꞌ aqꞌel te unqꞌa qitzꞌin qatzikeꞌ, as umaꞌl kuxh u Tiixhla Espíritu ni aqꞌon ste. As Aakeꞌ ni jatxon unqꞌa tijleꞌmeꞌ xoꞌl unqꞌa qitzꞌin qatzikeꞌ tukꞌ vitxumbꞌaleꞌ. As Aak kuxheꞌ ootzin tetz abꞌil la taqꞌ Aak ste.
12 Tan echeꞌ bꞌan taꞌn u kuchiꞌoleꞌ, tan umaꞌl kuxh u kuchiꞌoleꞌ. As nimal chit tatineꞌ skajayil. As echat chit bꞌan qaꞌn oꞌ uvaꞌ oꞌ niman tetz u Cristo,
13 tan unvatzul kuxh qatineꞌ sukuvatzaj taꞌn u Tiixhla Espíritu, kꞌuxh oꞌ tiaal Israel as kꞌuxh jit oꞌ tiaal Israel. As kꞌuxh atoꞌk oꞌ skꞌamil kꞌatz umaj naj pet moj yeꞌle as unvatzul veꞌt qatineꞌ sukuvatzaj, tan tiꞌ uvaꞌ umaꞌl kuxh u Tiixhla Espíritu at tu u qaanxelaleꞌ.
14 As echeꞌ u kuchiꞌoleꞌ tan yeꞌle uvaꞌ umaꞌl kuxh koj ni taqꞌonvukat. Pet kalabꞌ kuxh taqꞌon ati.
15 Tan echeꞌ u qojeꞌ tan la koj uchi uvaꞌ ech la tal ileꞌ: «Echeꞌ in koj qꞌabꞌ. Estiꞌeꞌ yeꞌl vokebꞌal tiꞌ u chiꞌoleꞌ,» chaj koj la taleꞌ. As echeꞌ yeꞌ koj txeyel tibꞌ u qojeꞌ tukꞌ u kuchiꞌoleꞌ.
16 As echeꞌ u kuxikineꞌ tan la koj uch talataꞌ uvaꞌ: «Jit in bꞌaqꞌ vatz. Estiꞌeꞌ yeꞌl vokebꞌal tiꞌ u chiꞌoleꞌ,» chaj koj la taleꞌ. As echeꞌ yeꞌ koj txeyel tibꞌ u kuxikineꞌ tukꞌ u kuchiꞌoleꞌ.
17 Tan asoj taꞌn kuxh u bꞌaqꞌ kuvatzeꞌ at tiꞌ u kuchiꞌoleꞌ, as echeꞌ la koj uch qabꞌin veꞌteꞌ. Asoj taꞌn kuxh u kuxikineꞌ at tiꞌ u kuchiꞌoleꞌ, as echeꞌ la koj uch kusijon veꞌteꞌ.
18 As Tiixh kat kꞌujbꞌaꞌn kan uvaꞌ abꞌiste u taqꞌon u kuchiꞌoleꞌ nibꞌan sijununila, echeꞌ uvaꞌ nisaꞌ Aak.
19 Tan asoj umaꞌl kuxh ni taqꞌonvukat u kuchiꞌoleꞌ skajayil, as vaꞌlen veꞌt tiloneꞌ u kuchiꞌoleꞌ la ibꞌaneꞌ.
20 As kꞌuxh kalabꞌ kuxh taqꞌon u kuchiꞌoleꞌ ati, as umaꞌl kuxheꞌ u kuchiꞌoleꞌ.
21 Estiꞌeꞌ uvaꞌ yeꞌ la uch talat u bꞌaqꞌ kuvatzeꞌ te u kuqꞌabꞌeꞌ uvaꞌ: «Yeꞌl atxaꞌkeꞌ sviꞌ,» chaj koj la taleꞌ. As mitaꞌn u kuviꞌeꞌ la alon te u qojeꞌ uvaꞌ: «Yeꞌl atxaꞌkeꞌ sviꞌ,» chaj koj la taleꞌ.
22 Pet jitꞌeꞌcheꞌ tan abꞌiste u tetz u kuchiꞌoleꞌ uvaꞌ bꞌiil kuxh ni taqꞌonveꞌ uvaꞌ ni qileꞌ, as aꞌeꞌ uveꞌ pal chit itxakon sqiꞌ.
23 As unqꞌa tatin u kuchiꞌoleꞌ uveꞌ yeꞌl kuxh iqꞌii sukuvatz, as aꞌeꞌ uveꞌ nu kubꞌaju. As unqꞌa tatin u kuchiꞌoleꞌ uvaꞌ yeꞌ bꞌaꞌn sqe uvaꞌ la ilpi, as aꞌeꞌ uveꞌ ni chit kuxoꞌni.
24 Pet ech koj unqꞌa tatin u kuchiꞌoleꞌ uvaꞌ la uch tilpeꞌ, tan yeꞌxhkam ni titzꞌal stiꞌ. Pet at kuxhtuꞌ. As ech kat ibꞌan veꞌt u Tiixheꞌ tiꞌ ikꞌujbꞌaꞌt unqꞌa tatin u kuchiꞌoleꞌ svatzaj, tan kat toksa veꞌt Aak iqꞌii u kuchiꞌoleꞌ uveꞌ yeꞌl kuxh itxaꞌk sqiꞌ.
25 Aqꞌal uvaꞌ yeꞌ la tal umaj u kuchiꞌoleꞌ teesat tibꞌ kꞌatz unqꞌa imooleꞌ. Pet eela chit la el u kuchiꞌoleꞌ svatzaj tiꞌ ilochat tibꞌ skajayil.
26 Tan asoj ni palebꞌe unbꞌooj u kuchiꞌoleꞌ umaj kꞌaxkꞌo, as kajayil chit u kuchiꞌoleꞌ ni nachon u chꞌoꞌmeꞌ. Asoj la ikꞌul unbꞌooj u kuchiꞌoleꞌ umaj bꞌaꞌnil, as kajayil chit u kuchiꞌoleꞌ nichiibꞌ veꞌteꞌ.
27 Estiꞌeꞌ ni val sete, tan ech qatineꞌ kꞌatz u Cristoeꞌ echeꞌ bꞌan taꞌn u kuchiꞌoleꞌ, tan unvatzul kuxh qatineꞌ sukuvatzaj tukꞌ u Cristo.
28 Pet kat taqꞌ veꞌt u Tiixheꞌ qijleꞌm, oꞌ uvaꞌ oꞌ niman tetz Aak. As at oꞌ uvaꞌ oꞌ apóstol. As at oꞌ uvaꞌ oꞌ qꞌajsan tetz viyol u Tiixheꞌ. As at oꞌ uvaꞌ oꞌ chusunaal. As at oꞌ uvaꞌ ni kꞌuchun unqꞌa nimla bꞌaꞌnileꞌ uvaꞌ tetz u Tiixheꞌ uveꞌ nim talcheꞌ. As at oꞌ uvaꞌ ni bꞌaꞌnxisan unqꞌa aachꞌoꞌmeꞌ. As at oꞌ uvaꞌ at kutxumbꞌal tiꞌ kulochat u kumooleꞌ. As at oꞌ uvaꞌ ni ilon isuuchil unqꞌa qitzꞌin qatzikeꞌ. As at oꞌ uvaꞌ nu kuyolon tu umaꞌt yolbꞌal.
29 Pet jit kajayil oꞌ uvaꞌ oꞌ apóstol. As jit kajayil oꞌ uvaꞌ oꞌ qꞌajsan tetz viyol u Tiixheꞌ. As jit kajayil oꞌ uvaꞌ oꞌ chusunaal. As jit kajayil oꞌ uvaꞌ oꞌ kꞌuchul tetz vinimla bꞌaꞌnil u Tiixheꞌ uvaꞌ nim talcheꞌ.
30 As jit kajayil oꞌ uvaꞌ nu kubꞌaꞌnxisa unqꞌa aachꞌoꞌmeꞌ. As jit kajayil oꞌ nu kuyolon tu umaꞌt yolbꞌal. As jit kajayil oꞌ ni alon isuuchil umaꞌt yolbꞌal.
31 Pet la val sete, okoj ex tilil tiꞌ ejajat te u Tiixheꞌ tiꞌ uvaꞌ la taqꞌ Aak etijleꞌm uvaꞌ techal la txakon sexoꞌl.
As cheel tuk unchus veꞌt ex tiꞌ umaꞌt txumbꞌal uvaꞌ at pal tiꞌ unqꞌa txumbꞌaleꞌ skajayil.