4
Ni tal u Pablo uvaꞌ unvatzul kuxh veꞌt unqꞌa niman tetz u Jesús taꞌn u Tiixhla Espíritu
As atoꞌk tzan in tu tzeꞌ tiꞌ kuxh uvaꞌ nik val isuuchil u yoleꞌ tiꞌ u Jesucristo. As nunjaj bꞌaꞌnil sete tiꞌ uvaꞌ jik koj chit etxumbꞌal la ebꞌaneꞌ, tan echeꞌ uveꞌ nisaꞌ u Kubꞌaal Tiixheꞌ setiꞌ tul kat imolo ex Aak.
As yeꞌ la ejeꞌsa etibꞌ sevatzaj. Pet sula aama chit ex la ibꞌaneꞌ. As la ekuy etibꞌ sevatzaj, tan tiꞌ uvaꞌ nexoꞌni etibꞌ sevatzaj.
As etaqꞌtaj yakꞌil tiꞌ uvaꞌ unvatzuloj chit ex la ibꞌaneꞌ tiꞌ chit ibꞌeneꞌ, tan unvatzul veꞌt oꞌ setukꞌ taꞌn u Tiixhla Espíritu. As bꞌaꞌnoj chit etatineꞌ sevatzaj la ibꞌaneꞌ.
As unvatzul veꞌt oꞌ vatz u Tiixheꞌ, jankꞌal oꞌ uvaꞌ nimamal veꞌt u Jesucristo sqaꞌn, tan ech veꞌt qatineꞌ sukuvatzaj echeꞌ bꞌan taꞌn u kuchiꞌoleꞌ uvaꞌ txeyel tibꞌ skajayil. As umaꞌl kuxh u Tiixhla Espíritu at sqiꞌ. As umaꞌl kuxh u txꞌajaꞌmeꞌ nu kutxꞌebꞌeꞌ, oꞌ unqꞌa tiaal Israel tukꞌ ex uvaꞌ jit ex tiaal Israel, tan estiꞌeꞌ kat imolokat oꞌ u Tiixheꞌ.
As unvatzul veꞌt oꞌ sukuvatzaj, tan umaꞌl kuxh u Jesucristo at sqiꞌ. As eela kukꞌujbꞌaꞌt veꞌt kukꞌuꞌl tiꞌ Aak. As eela kukꞌuchataꞌ uvaꞌ oꞌ veꞌt niman tetz Aak tul kat kuꞌ oꞌ xeꞌ u aꞌeꞌ.
As umaꞌl kuxheꞌ u Tiixheꞌ ati. As Aakeꞌ u Kubꞌaaleꞌ; as Aakeꞌ ibꞌaal unqꞌa veeꞌ skajayil, oꞌ itenam Aak. As Aakeꞌ ni aqꞌon kutxumbꞌal skukajayil tiꞌ ikꞌuchax vibꞌaꞌnil Aakeꞌ xoꞌl unqꞌa tenameꞌ. As at veꞌt ok Aak tu u qaanxelaleꞌ.
As ibꞌaꞌnil kuxh u Jesucristo as kat taqꞌ Aak qijleꞌm skujununil kam uvaꞌ kat isaꞌ Aak taqꞌat sqe.
Estiꞌeꞌ uvaꞌ ech ni tal umaꞌl u yol ileꞌ uvaꞌ tzꞌibꞌamal kan:
Tul uvaꞌ maꞌtik itxꞌakon veꞌt u ijlenaaleꞌ tiꞌ unqꞌa chꞌoꞌnchil aamaeꞌ,
as kat jeꞌ u ijlenaaleꞌ viꞌ umaꞌl u vitz uvaꞌ nim at jeꞌ.
As kat teqꞌo veꞌt u ijlenaaleꞌ unqꞌa chꞌoꞌnchil aamaeꞌ stiꞌ tiꞌ ikꞌuchat te unqꞌa tenameꞌ uvaꞌ kat txꞌakon veꞌt u ijlenaaleꞌ.
As kat taqꞌ veꞌt u ijlenaaleꞌ itxꞌajaꞌm unqꞌa tenameꞌ, tiꞌk u yoleꞌ.
As qitzꞌataj u yoleꞌ uvaꞌ ech ni tal ileꞌ: «Kat jeꞌi,» tiꞌk u yoleꞌ. As aꞌ isuuchil u yoleꞌ uvaꞌ bꞌaxel kat kuꞌ chꞌuꞌl tu almikaꞌ. As kat kuꞌ jaqꞌ txꞌavaꞌ tul kat kami.
10 As aꞌ u Jesucristo uvaꞌ kat kuꞌ chꞌuꞌl tu almikaꞌ. As kat jeꞌ veꞌt Aak tu almikaꞌ unpajte, as Aakeꞌ uvaꞌ at pal u tijleꞌmeꞌ tiꞌ unqꞌa uveꞌ skajayil uvaꞌ at tu almikaꞌ.
11 As an chit u Jesucristoeꞌ kat oksan oꞌ apóstolil xoꞌl vitenam Aakeꞌ. As kat toksa Aak kaꞌt uxhchil qꞌajsan tetz viyoleꞌ, tukꞌ kaꞌt unqꞌa paxsan tetz u bꞌaꞌnla yoleꞌ tiꞌ Aak, as tukꞌ kaꞌt unqꞌa uxhchileꞌ uvaꞌ ni alon isuuchil viyol Aakeꞌ. As tukꞌ unqꞌa uxhchileꞌ uvaꞌ ni ilon isuuchil vitenam u Tiixheꞌ, tan ech nibꞌaneꞌ echeꞌ unqꞌa xeen txooeꞌ.
12 As ech kat ibꞌan Aak, tan aꞌ isaꞌ Aak uvaꞌ oꞌ la aqꞌon itxumbꞌal vitenam Aakeꞌ, tiꞌ uvaꞌ la aqꞌonvu chajaak tiꞌ ibꞌanataꞌ jankꞌal uvaꞌ nisaꞌ Aak uvaꞌ la ibꞌaneꞌ. As la yakꞌin veꞌt u taanxelaleꞌ skajayil. As bꞌaꞌn veꞌt tatineꞌ svatzaj la ibꞌaneꞌ kꞌatz u Jesucristo.
13 As vatzul veꞌt u kꞌujlebꞌal kukꞌuꞌleꞌ tiꞌ viKꞌaol u Tiixheꞌ. As achaꞌv veꞌt qatin sukuvatzaj la ibꞌaneꞌ, oꞌ uvaꞌ ootzimal veꞌt Aak sqaꞌn. As jik veꞌt u kutxumbꞌaleꞌ la ibꞌaneꞌ. As la xekebꞌ veꞌt u kutxumbꞌaleꞌ tiꞌ vitxumbꞌal Aakeꞌ uvaꞌ jik chittuꞌ,
14 aqꞌal uvaꞌ jitꞌeꞌch u kutxumbꞌaleꞌ la ibꞌaneꞌ echeꞌ itxumbꞌal umaj talaj intxaꞌ uvaꞌ nu kuxh ijalpu vitxumbꞌaleꞌ. Pet yeꞌ la qaqꞌ qibꞌ maxtibꞌeloj te unqꞌa chulin yoleꞌ uvaꞌ vaꞌlexhla chusbꞌal nichuseꞌ. As jitꞌeꞌch la ibꞌan u kutxumbꞌaleꞌ echeꞌ nibꞌan umaj barco viꞌ u mareꞌ, tan kat kuxh nibꞌenkat u barco taꞌn u kajiqꞌeꞌ.
15 Pet kukꞌuchtaj u jikla yoleꞌ tiꞌ u Jesucristo tukꞌ u kutxumbꞌaleꞌ. As kuxoꞌnitaj qibꞌ sukuvatzaj. As la chee veꞌt imaas kutxumbꞌal aqꞌal uvaꞌ ech u kutxumbꞌaleꞌ echeꞌ u Jesucristo, tan ech tatin Aakeꞌ sqiꞌ echeꞌ u kuviꞌeꞌ, tan aꞌ u kuviꞌeꞌ eqꞌon tetz u kuchiꞌoleꞌ skajayil.
16 As ech kunimat qibꞌeꞌ sukuvatzaj taꞌn Aak, oꞌ uvaꞌ oꞌ itenam Aak, echeꞌ u txeyol tetz u kuchiꞌoleꞌ tiꞌ itiinsa tibꞌ. As at taqꞌon sijununila. As echat nu kubꞌaneꞌ tul uvaꞌ nu kuxoꞌni qibꞌ sukuvatzaj as nukuyakꞌin veꞌt staꞌn.
Niyolon u Pablo tiꞌ u txumbꞌaleꞌ uvaꞌ ibꞌan unqꞌa niman tetz u Cristo
17 Estiꞌeꞌ nunbꞌeya bꞌen sete tukꞌ vibꞌii u Kubꞌaal Jesucristoeꞌ, uvaꞌ yeꞌ la ebꞌan etetz echeꞌ uveꞌ nibꞌan unqꞌa uxhchileꞌ uveꞌ yeꞌ ni niman u Tiixheꞌ, tan aꞌ kuxh u vaꞌlexhla txumbꞌaleꞌ eqꞌomal staꞌn uvaꞌ yeꞌl itxaꞌk.
18 As yeꞌl tokebꞌal unqꞌa uxhchileꞌ tiꞌ u tiichajileꞌ uvaꞌ yeꞌl iyaꞌtebꞌal, tan aꞌ kuxh u paasan tziila txumbꞌal nibꞌaneꞌ. As ni tiibꞌisa jeꞌ taama, tan yeꞌ nisaꞌ tabꞌit isuuchil viyol u Tiixheꞌ.
19 As yeꞌ nichꞌixvu veꞌt unqꞌa uxhchileꞌ tiꞌ ibꞌanat unqꞌa vaꞌlexheꞌ echeꞌ u tachaꞌv vichiꞌoleꞌ. As yeꞌl kuxh iyaꞌebꞌal tiꞌ ibꞌanat unqꞌa vaꞌlexhla txumbꞌaleꞌ skajayil, tan ayaꞌl chit ikꞌuꞌl nibꞌaneꞌ.
20 Pet ech koj ex, tan jitꞌeꞌch u chusbꞌaleꞌ uveꞌ kat chuspu sete tiꞌ u Cristo.
21 As ootzimal svaꞌn uvaꞌ jik chit kat alpu isuuchil u yoleꞌ sete tiꞌ u Cristo. As kat chuspu veꞌt ex tiꞌ unqꞌa jikla txumbꞌaleꞌ uvaꞌ nisaꞌ Aak setiꞌ.
22 As aꞌ u chusbꞌaleꞌ uvaꞌ kat chuspu veꞌt ex stiꞌ tiꞌ uvaꞌ la etaqꞌ veꞌt kan unqꞌa txumbꞌaleꞌ uvaꞌ nikat ebꞌan bꞌaxa uvaꞌ chiannalik sete, tan eesamalik vetxumbꞌaleꞌ tu bꞌey taꞌn u tachaꞌv vechiꞌoleꞌ.
23 As la etaqꞌ tokebꞌal u Tiixheꞌ tiꞌ ijalput Aak vetxumbꞌaleꞌ
24 tan tiꞌ uvaꞌ kat taqꞌ Aak umaꞌl u akꞌ txumbꞌal sete uvaꞌ Aak cheesan tetz. As ech veꞌt u akꞌ txumbꞌaleꞌ echeꞌ vitxumbꞌal Aakeꞌ, tan jik chit u akꞌ txumbꞌaleꞌ uvaꞌ kat taqꞌ Aak sete. As yeꞌl umaj vaꞌlexh la chee staꞌn.
25 Estiꞌeꞌ ni val sete, etaqꞌtaj kan unqꞌa chuli yoleꞌ. As jik chit la yolon ex sevatzaj, tan unvatzul kuxh veꞌt oꞌ setukꞌ kꞌatz u Jesucristo.
26 Asoj la ul eviꞌ, as la til jeꞌ etibꞌ, aqꞌal uvaꞌ yeꞌ la paavin ex. As yeꞌ la pal u qꞌiieꞌ setiꞌ. Pet oora kuxh la eyaꞌsa u ulchil viꞌeꞌ.
27 As yeꞌ la etaqꞌ tokebꞌal u txꞌiꞌlanajeꞌ tiꞌ uvaꞌ la paavin ex taꞌn naj.
28 As abꞌiste ex uvaꞌ netelqꞌeꞌ, as eyaꞌsataj etelqꞌeꞌ. Pet aqꞌonvojtaj ex. As ebꞌantaj u bꞌaꞌneꞌ, aqꞌal uvaꞌ la uch elochat vemooleꞌ uvaꞌ nisaꞌ lochbꞌal tetz.
29 Eliꞌk chꞌuꞌl umaj vaꞌlexhla yol tetziꞌ. Pet bꞌaꞌn eyoloneꞌ la ebꞌaneꞌ, aqꞌal uvaꞌ la eyakꞌinsa taama unqꞌa uxhchileꞌ uveꞌ la abꞌin veyoleꞌ.
30 As yeꞌ la etxumunsa u Tiixhla Espíritu uvaꞌ kat taqꞌ u Tiixheꞌ sete, kꞌuchbꞌal tetz uvaꞌ qꞌalpumal veꞌt ex vatz vepaaveꞌ techal la ilej u qꞌiieꞌ uvaꞌ yeꞌl veꞌt tokebꞌal u paaveꞌ sqiꞌ la ibꞌaneꞌ.
31 As eteesataj unqꞌa vaꞌlexhla txumbꞌaleꞌ tu vetaanxelaleꞌ echeꞌ u chiꞌchol aamaileꞌ, u txꞌiꞌtziꞌleꞌ, u ulchil viꞌeꞌ, u yaaibꞌeꞌ, u yoqꞌoꞌmeꞌ, as tukꞌ unjoltu unqꞌa vaꞌlexheꞌ. As eyaꞌsataj.
32 Pet bꞌaꞌnoj etxumbꞌal sevatzaj. Etxumtaj tibꞌ evatz; as esotzsataj tibꞌ epaav sevatzaj, echeꞌ uveꞌ kat ibꞌan u Tiixheꞌ sete, tan kat isotzsa Aak vepaaveꞌ taꞌn u Cristo.