4
Jik chit itxumbꞌal unqꞌa niman tetz u Jesús la ibꞌaneꞌ
1 As la val sete, ech ekuyat u kꞌaxkꞌoeꞌ la ebꞌaneꞌ echeꞌ kat ibꞌan u Cristo tul kat ipalebꞌe Aak u kꞌaxkꞌoeꞌ tukꞌ vichiꞌoleꞌ. Tan abꞌil uvaꞌ kat palebꞌen u kꞌaxkꞌoeꞌ tukꞌ vichiꞌoleꞌ, as yeꞌ la ikꞌul veꞌt tibꞌ itxumbꞌal tukꞌ u paaveꞌ.
2 As tul at vatz u txꞌavaꞌeꞌ, as yeꞌ la ibꞌan unqꞌa vaꞌlexheꞌ uvaꞌ ni tachva vichiꞌoleꞌ. Pet aꞌ u bꞌaꞌneꞌ la ibꞌaneꞌ uvaꞌ nisaꞌ u Tiixheꞌ.
3 As nimal qꞌii kat ibꞌana uvaꞌ nik ebꞌan u vaꞌlexheꞌ uvaꞌ nichiibꞌ unqꞌa tenameꞌ stiꞌ uvaꞌ yeꞌ ni niman Tiixh. As nik ebꞌan u tachaꞌv vechiꞌoleꞌ. As nik emol etibꞌ tiꞌ ebꞌanat unqꞌa nimla qꞌiieꞌ as tiꞌ eqꞌabꞌaneꞌ. As nik epaasa ekꞌuꞌl tiꞌ ebꞌanat u vaꞌlexheꞌ, tan aꞌ veꞌteꞌ ivaatzil etiixh sevatz. As tul aꞌeꞌ uvaꞌ txojonbꞌal chit vatz u Tiixheꞌ.
4 As unqꞌa paasan tziieꞌ uvaꞌ nik emolo etibꞌ stukꞌ sbꞌaxa, as yeꞌ nipal veꞌt stuul uvaꞌ kam stiꞌ yeꞌ nemolokat veꞌt etibꞌ stukꞌ tiꞌ epaasat ekꞌuꞌl tiꞌ ebꞌanat u vaꞌlexheꞌ echeꞌ uvaꞌ nik ebꞌan bꞌaxa. As niyoqꞌon veꞌt setiꞌ.
5 Pet techal la tal unqꞌa uxhchileꞌ isuuchil te Aak kam uvaꞌ kat ibꞌana, tan techal la ibꞌan Aak isuuchil unqꞌa tenameꞌ skajayil, kꞌuxh isleꞌle as kꞌuxh kamnajle.
6 Estiꞌeꞌ uvaꞌ kat alpu u bꞌaꞌnla yoleꞌ te unqꞌa uxhchileꞌ uvaꞌ kamnajlej, tiꞌ uvaꞌ at itiichajil u taanxelaleꞌ kꞌatz u Tiixheꞌ. As kꞌuxh kat bꞌanax veꞌt isuuchil taꞌn unqꞌa uxhchileꞌ.
7 As bꞌiit kuxh itzojpisal unqꞌa veeꞌ skajayil uvaꞌ alel kan taꞌn u Tiixheꞌ. Estiꞌeꞌ la val sete, atoj chit enachbꞌal. As etoksataj chit etaama tiꞌ enachat Tiixh.
8 As ayaꞌloj chit ekꞌuꞌl la exoꞌni etibꞌ sevatzaj. Tan asoj nexoꞌni etibꞌ sevatzaj, as la ekuy tibꞌ epaav sevatzaj.
9 As ayaꞌloj chit ekꞌuꞌl la eloch etibꞌ sevatzaj. As la etaqꞌ ivatbꞌal unqꞌa qitzꞌin qatzikeꞌ.
10 As la eloch etibꞌ sevatzaj tukꞌ vetijleꞌmeꞌ uvaꞌ aqꞌel sete taꞌn u Tiixheꞌ. As jik chit etxumbꞌal la ebꞌan sevatzaj tukꞌ vetijleꞌmeꞌ uvaꞌ aqꞌel sete, tan jalel tibꞌ vetijleꞌmeꞌ sejununilaj taꞌn Aak.
11 As abꞌiste ex uvaꞌ at etijleꞌm tiꞌ etalat viyol Aakeꞌ, as jik chit la etal isuuchil u yoleꞌ. As ex uvaꞌ at etijleꞌm taꞌn Aak tiꞌ elochat etibꞌ tukꞌ unqꞌa qitzꞌin qatzikeꞌ, kꞌuxh kam kuxh lochbꞌalil la ebꞌan ste. As ebꞌantaj tukꞌ u yakꞌileꞌ uvaꞌ aqꞌel sete taꞌn Aak, aqꞌal uvaꞌ la oksal iqꞌii u Tiixheꞌ tiꞌ unqꞌa lochbꞌaleꞌ uvaꞌ nebꞌaneꞌ taꞌn vibꞌaꞌnil u Jesucristo. As yeꞌ la yaꞌsal toksal iqꞌii Aak. As yeꞌl iyaꞌtebꞌal u tijlenaalil Aakeꞌ tiꞌ chit ibꞌeneꞌ. An chiteꞌ.
U chiibꞌichileꞌ tu unqꞌa iltzaꞌleꞌ
12 Ex vitzꞌin vatzik uvaꞌ xoꞌn ex sve, as yeꞌ la sotz ekꞌuꞌl tiꞌ epalebꞌet unqꞌa kꞌaxkꞌoeꞌ, tan ech chit la ibꞌaneꞌ tiꞌ eyakꞌinsaleꞌ echeꞌ tok umaj chꞌichꞌ tu xamal tiꞌ teesal u vaꞌlexheꞌ stiꞌ.
13 Pet aal la chiibꞌ ex tul la epalebꞌe unqꞌa kꞌaxkꞌoeꞌ kꞌuxh aꞌ u bꞌaꞌneꞌ nebꞌaneꞌ, as eela kuxh stukꞌ uvaꞌ ech epalebꞌet u kꞌaxkꞌoeꞌ echeꞌ uveꞌ kat ipalebꞌe u Cristoeꞌ. As la chiibꞌ ex tu u nimla chiibꞌichileꞌ tul uvaꞌ la oksal veꞌt iqꞌii Aak.
14 Asoj la yoqꞌpu veꞌt ex tiꞌ uvaꞌ ex niman tetz u Cristo, as achvebꞌal chit ex, tan at veꞌt u Tiixhla Espíritu setiꞌ tukꞌ vinimla bꞌaꞌnileꞌ. As ootzimal sqaꞌn uvaꞌ niyoqꞌon unqꞌa tenameꞌ tiꞌ u Cristo. Pet ech koj ex, tan netoksa iqꞌii Aak.
15 Estiꞌeꞌ yeꞌ la uchi uvaꞌ tiꞌ eyatzꞌat umaj uxhchil la epalebꞌekat unqꞌa kꞌaxkꞌoeꞌ. As mitaꞌn tiꞌ umaj elaqꞌ; as mitaꞌn tiꞌ etoksat etibꞌ xoꞌl umaj yol uvaꞌ yeꞌl etokebꞌal stiꞌ; as mitaꞌn tiꞌ ebꞌanat umaꞌtoj vaꞌlexh.
16 Pet asoj tiꞌ uvaꞌ nimamal u Cristo setaꞌn la epalebꞌekat unqꞌa kꞌaxkꞌoeꞌ, as yeꞌ la chꞌixvu veꞌt ex. Pet aal la etoksa iqꞌii u Tiixheꞌ tiꞌ ekꞌuchataꞌ uvaꞌ ex veꞌt niman tetz u Cristo.
17 As ni val sete uvaꞌ yeꞌ la sotz ekꞌuꞌl tiꞌ epalebꞌet unqꞌa kꞌaxkꞌoeꞌ tiꞌ eyakꞌinsaleꞌ, tan kat ilejlu veꞌt u qꞌiieꞌ uvaꞌ la xeꞌt u Tiixheꞌ tiꞌ ibꞌanat kusuuchil, oꞌ uvaꞌ oꞌ itenam Aak. Asoj ech la ibꞌan Aakeꞌ sqe as tul oꞌ itenam Aak, ¿as aꞌ kol yeꞌ la ibꞌan Aak qꞌa te unqꞌa uxhchileꞌ uvaꞌ yeꞌ ni niman u bꞌaꞌnla yoleꞌ uvaꞌ ni tal Aak?
18 As ech ni tal umaꞌt u yol ileꞌ uvaꞌ tzꞌibꞌamal kan:
As yeꞌ nitxꞌol veꞌt unqꞌa niman tetz u Tiixheꞌ tel vatz u kꞌaxkꞌoeꞌ tiꞌ uvaꞌ yeꞌ la bꞌen tu u choobꞌal paaveꞌ,
¿as aꞌ kol yeꞌ la ibꞌan qꞌa te unqꞌa bꞌanol vaꞌlexheꞌ tukꞌ unqꞌa paasan tziieꞌ uvaꞌ yeꞌ ni niman Aak? tiꞌk u yoleꞌ.
19 Estiꞌeꞌ la val sete, ex uvaꞌ ni palebꞌen unqꞌa kꞌaxkꞌoeꞌ uvaꞌ aꞌ u Tiixheꞌ ni saꞌon. As yeꞌ la yaꞌ ex tiꞌ ebꞌanat u bꞌaꞌneꞌ. As la etaqꞌ ok vetiichajileꞌ tiqꞌabꞌ Aak tiꞌ ibꞌanat Aak kam uvaꞌ nisaꞌ Aak setiꞌ tan Aakeꞌ cheesan qetz. As jik chit itxumbꞌal Aak tiꞌ ibꞌanat u bꞌaꞌneꞌ uvaꞌ alel kan sqiꞌ taꞌn Aak.