3
Unqꞌa yol uvaꞌ ni talax te unqꞌa niman tetz u Jesús tu u tenam uvaꞌ Sardis
1 As aꞌ unqꞌa yol ilaꞌ uvaꞌ latzꞌibꞌa bꞌen te u alol tetz vunyoleꞌ xoꞌl unqꞌa niman vetzeꞌ tu u Sardis. As ech la aal ileꞌ:
«U Jesús uvaꞌ at vujvaꞌl u Tiixhla Espíritu u Kubꞌaal Tiixheꞌ skꞌatz as uvaꞌ at vujvaꞌt unqꞌa txꞌumileꞌ tisebꞌal iqꞌabꞌ, as ech ni tal Aak ileꞌ see: –Ootzimal svaꞌn kam uvaꞌ nabꞌaneꞌ. As kꞌuxh ni talpu seeꞌ uvaꞌ isleꞌl axh, as ni vileꞌ uvaꞌ kamnajlu veꞌt axh.
2 Estiꞌeꞌ ni val see, atoj chit anachbꞌal. As la ayaꞌlu eebꞌ tiꞌ abꞌanat kaꞌt unqꞌa bꞌaꞌneꞌ uvaꞌ bꞌiit kuxh yeꞌ nayaꞌsa abꞌanataꞌ, tan ni vileꞌ uvaꞌ jit veꞌt u jikeꞌ uveꞌ nabꞌan vatz u Tiixheꞌ.
3 As oolsa unqꞌa chusbꞌaleꞌ sakꞌuꞌl uvaꞌ kat aabꞌi tukꞌ uvaꞌ kat eela. As jikbꞌaꞌ vatxumbꞌaleꞌ tiꞌ animat unqꞌa chusbꞌaleꞌ, tan asoj yeꞌl anachbꞌal ati, as yeꞌ kuxh nachel see tul la ul in. As ech vuleꞌ echeꞌ umaj elqꞌom tiꞌ vaqꞌat kꞌaxkꞌo seeꞌ.
4 At kaꞌl unqꞌa uxhchil sexoꞌl tzitziꞌ tu u Sardis uvaꞌ yeꞌ niyansa tibꞌ tu paaveꞌ. As ikꞌulel chit unqꞌa uxhchileꞌ uvaꞌ la atin sunkꞌatz, tan atoꞌk u toksaꞌmeꞌ staꞌn uvaꞌ vaꞌl chit ipolal.
5 As abꞌiste ex uvaꞌ yeꞌ la eyaꞌsa enimat in kꞌuxh la epalebꞌe kꞌaxkꞌo, as la etoksa veꞌt u oksaꞌmeꞌ uvaꞌ vaꞌl chit ipolal. As yeꞌl vebꞌiieꞌ la unsotzsa tu u uꞌujeꞌ uvaꞌ tzꞌibꞌamalkat vibꞌii unqꞌa uxhchileꞌ skajayil uvaꞌ at itiichajil uveꞌ yeꞌl iyaꞌtebꞌal. Pet vatz vunBꞌaaleꞌ as vatz unqꞌa ángel uvaꞌ tetz u Kubꞌaaleꞌ la valkat vebꞌiieꞌ, jankꞌal ex uvaꞌ ex veꞌt niman vetz,– tiꞌk Aak ni taleꞌ,» chaj axh te u alol tetz vunyoleꞌ xoꞌl unqꞌa niman vetzeꞌ tu u Sardis.
6 As la val sete, ex uvaꞌ ni niman in tulaj unqꞌa tenameꞌ skajayil. Abꞌiste ex uveꞌ nepal tu vunyoleꞌ, as etabꞌitaj uveꞌ ni tal u Tiixhla Espíritu sete.
Unqꞌa yol uvaꞌ ni talax te unqꞌa niman tetz u Jesús tu u tenam uvaꞌ Filadelfia
7 As aꞌ unqꞌa yol ilaꞌ uvaꞌ latzꞌibꞌa bꞌen te u alol tetz vunyoleꞌ xoꞌl unqꞌa niman vetzeꞌ tu u Filadelfia. As ech la aal ileꞌ:
«U Jesús uvaꞌ jik chit itxumbꞌal, as Aakeꞌ u jikla yoleꞌ. As echen unqꞌa laaveeꞌ tiqꞌabꞌ Aak, tan ech u tijleꞌm Aakeꞌ echeꞌ u tijleꞌm u David uvaꞌ ibꞌana. As kam uvaꞌ jajleꞌl taꞌn Aak as yeꞌxhebꞌil la jupun. As kam uvaꞌ jupel taꞌn Aak, as yeꞌxhebꞌil la jajon. As ech ni tal Aak ileꞌ see:
8 –Ootzimal svaꞌn kam uvaꞌ nabꞌaneꞌ. As at veꞌt umaꞌl u tziꞌ kabꞌal savatz uvaꞌ jajleꞌl veꞌt svaꞌn. As yeꞌxhebꞌil la jupun. As ootzimal svaꞌn uvaꞌ kꞌuxh bꞌiil kuxh ayakꞌil ati, as nanima vunyoleꞌ. As yeꞌl axh neesa eebꞌ sunkꞌatz.
9 As la val see uvaꞌ ineꞌ la bꞌanon uvaꞌ techal la tootzi unqꞌa uxhchileꞌ uvaꞌ xoꞌn ex sve, jankꞌal unqꞌa uxhchileꞌ uvaꞌ ni chulin yol tiꞌ toksat tibꞌ tiaal Israel, tan nichus tibꞌ tiꞌ unqꞌa ichusbꞌal u Satanás tu u atinbꞌaleꞌ tetz nachbꞌal Tiixh. As aꞌeꞌ uvaꞌ techal la qaaebꞌ savatz svaꞌn.
10 As tiꞌ uvaꞌ yeꞌ nikaꞌkabꞌin akꞌuꞌl tiꞌ animat vunyoleꞌ echeꞌ uvaꞌ kat val see, as estiꞌeꞌ la unkol veꞌt axh vatz u kꞌaxkꞌoeꞌ uvaꞌ la ul tiꞌ unqꞌa tenameꞌ skajayil, tiꞌ ikꞌaxbꞌisal unqꞌa uxhchileꞌ uveꞌ ni ixvan in vatz u txꞌavaꞌeꞌ.
11 As il in vul veꞌteꞌ. As ayaꞌloj chit akꞌuꞌl tiꞌ ooksat aama tiꞌ animat unqꞌa chusbꞌaleꞌ uvaꞌ ootzimal veꞌt aꞌn, aqꞌal uvaꞌ yeꞌxhebꞌil la maon vatxꞌajaꞌmeꞌ,– tiꞌk Aak ni taleꞌ,» chaj axh te u alol tetz vunyoleꞌ xoꞌl unqꞌa niman vetzeꞌ tu u Filadelfia.
12 As abꞌiste ex uvaꞌ yeꞌ la eyaꞌsa enimat in kꞌuxh la epalebꞌe kꞌaxkꞌo, as ech la ebꞌaneꞌ svaꞌn echeꞌ umaj piraal uvaꞌ xiꞌabꞌ tetz u tostiixheꞌ uvaꞌ ninachpukat Tiixh. As yeꞌxh jatu la el veꞌt chꞌuꞌl ex tzitziꞌ. As la untzꞌibꞌa veꞌt ok vibꞌii u Kubꞌaal Tiixheꞌ setiꞌ, tukꞌ vibꞌii u akꞌ Jerusalén, vitenam u Kubꞌaal Tiixheꞌ, uvaꞌ nikuꞌ chꞌuꞌl tu almikaꞌ taꞌn u Tiixheꞌ. As la untzꞌibꞌa ok vunbꞌiieꞌ setiꞌ uvaꞌ akꞌnal veꞌteꞌ.
13 As la val sete, ex uvaꞌ ni niman in tulaj unqꞌa tenameꞌ skajayil. Abꞌiste ex uveꞌ nepal tu vunyoleꞌ, as etabꞌitaj uveꞌ ni tal u Tiixhla Espíritu sete.
Unqꞌa yol uvaꞌ ni talax te unqꞌa niman tetz u Jesús tu u tenam uvaꞌ Laodicea
14 As aꞌ unqꞌa yoleꞌ uvaꞌ latzꞌibꞌa bꞌen te u alol tetz vunyoleꞌ xoꞌl unqꞌa niman vetzeꞌ tu u Laodicea. As ech la aal ileꞌ:
«U Jesús uvaꞌ tzojpisan tetz unqꞌa yoleꞌ uvaꞌ alel kan, as jik chiteꞌ u yoleꞌ uvaꞌ ni tal Aak, tan taꞌn Aakeꞌ uvaꞌ jik chit niyoloneꞌ, as jik chit nibꞌan unpajte. As tukꞌ vibꞌaꞌnil Aakeꞌ kat icheesa u Tiixheꞌ unqꞌa veeꞌ skajayil. As ech ni tal Aak ileꞌ see:
15 –Ootzimal svaꞌn kam uvaꞌ nabꞌaneꞌ, tan yeꞌl axh uvaꞌ cheꞌv koj axh. As mitaꞌn tzꞌaꞌ koj axh. ¡Pet aal bꞌaꞌneꞌ uvaꞌ cheꞌv axh, as moj tzꞌaꞌ axh tiꞌ aatin sunkꞌatz!
16 As la xaꞌv in aꞌn, tan tiꞌ uvaꞌ miqꞌmoj kuxh axh. As jit axh tzꞌaꞌ; as jit axh cheꞌv tiꞌ aatin sunkꞌatz.
17 As ech naal jeꞌ ileꞌ seeꞌ. In txꞌioliqꞌii. As bꞌaꞌn chit vatineꞌ, tan yeꞌxhkam kuxh nisaꞌvit sviꞌ, chꞌaxh naaleꞌ. As tul yeꞌ ootzaj uvaꞌ kam bꞌanel aꞌn sunvatz, tan yeꞌl eetz ati. As oyebꞌ kuxh avatz, tan meebꞌaꞌ kuxh axh. As txumlebꞌal kuxh atineꞌ, tan ech axheꞌ echeꞌ umaj tzot. As ech axheꞌ sunvatz echeꞌ umaj uxhchil uvaꞌ tꞌosleꞌleꞌ.
18 Estiꞌeꞌ nunbꞌeya veꞌt see uvaꞌ la aloqꞌ u ooroꞌeꞌ sve uvaꞌ nitxilqꞌaꞌch taꞌn u xamaleꞌ, aqꞌal uvaꞌ ech veꞌt aatineꞌ sunvatz echeꞌ umaj txꞌioliqꞌii. As la aloqꞌ veꞌt ooksaꞌm sve uvaꞌ vaꞌl chit ipolal tiꞌ abꞌajut eebꞌ, aqꞌal uvaꞌ yeꞌ la chꞌixvu veꞌt axh uvaꞌ tꞌosleꞌl axh. As la aloqꞌ atzꞌakabꞌal sve uvaꞌ la tzꞌakan vavatzeꞌ tiꞌ uvaꞌ la ilon veꞌt axh,
19 tan jankꞌal unqꞌa uxhchileꞌ uvaꞌ xoꞌn sve, as nunbꞌeya ste uvaꞌ aꞌ u bꞌaꞌneꞌ la ibꞌaneꞌ. As nunchuseꞌ tiꞌ uvaꞌ la ibꞌan u bꞌaꞌneꞌ. Estiꞌeꞌ ni val see, jalpu vatxumbꞌaleꞌ. As ayaꞌloj chit akꞌuꞌl tiꞌ animat u yoleꞌ uvaꞌ alel see svaꞌn.
20 As il in txakleꞌl veꞌt in tziꞌ u kabꞌaleꞌ tiꞌ unmolot el tzan unqꞌa uxhchileꞌ. As abꞌil uvaꞌ la abꞌin u tuul unviꞌeꞌ as la ijaj veꞌt u tziꞌ kabꞌaleꞌ, as la ok veꞌt in skꞌatz. As la txꞌaꞌn veꞌt in skꞌatz; as la txꞌaꞌn veꞌt sunkꞌatz.
21 As abꞌiste ex uvaꞌ yeꞌ la eyaꞌsa enimat in kꞌuxh la epalebꞌe kꞌaxkꞌo, as la vaqꞌ etijleꞌm tiꞌ exonebꞌ kꞌatz vunxonlebꞌaleꞌ echeꞌ uvaꞌ kat unbꞌana, tan yeꞌ kat unyaꞌsa unnimat viyol vunBꞌaaleꞌ kꞌuxh kat unpalebꞌe kꞌaxkꞌo. Estiꞌeꞌ kat xonebꞌ veꞌt in kꞌatz vixonlebꞌal vunBꞌaaleꞌ,– tiꞌk Aak ni taleꞌ,» chaj axh te u alol tetz vunyoleꞌ xoꞌl unqꞌa niman vetzeꞌ tu u Laodicea.
22 Abꞌiste ex uveꞌ nepal tu vunyoleꞌ, as etabꞌitaj uveꞌ ni tal u Tiixhla Espíritu sete,— tiꞌk u Jesúseꞌ.