3
Kam itxumbꞌal unqꞌa iqꞌesal unqꞌa niman tetz u Jesús la ibꞌaneꞌ
1 As jikla yol chiteꞌ u yoleꞌ uvaꞌ tuk val see. Tan abꞌil uvaꞌ nisaꞌ uvaꞌ la ok qꞌesalil xoꞌl unqꞌa qitzꞌin qatzikeꞌ, as bꞌaꞌn u aqꞌoneꞌ uvaꞌ nisaꞌ ibꞌanataꞌ.
2 As techal chit la ibꞌaneꞌ uvaꞌ yeꞌl umaj vaꞌlexhla yol la alpu stiꞌ uvaꞌ la ok sqꞌesalil. As jik chit la til tibꞌ tukꞌ u tixqeleꞌ. As jik itxumbꞌal la ibꞌaneꞌ, tan la pal stuul kam uvaꞌ nibꞌaneꞌ. As la til jeꞌ tibꞌ. As la titzꞌa sbꞌaꞌn kam uvaꞌ la ibꞌaneꞌ. As la taqꞌ ivatbꞌal unqꞌa qitzꞌin qatzikeꞌ. As bꞌaꞌn ichusuneꞌ la ibꞌaneꞌ.
3 As jit qꞌabꞌaꞌm. As jit chukul chꞌaꞌo. As yeꞌ la isubꞌ imool tiꞌ itxꞌakat ipuaj. As jit u puajeꞌ la bꞌen iviꞌ stiꞌ. Pet bꞌaꞌnla aama chittuꞌ. As mutxkin aama la ibꞌan vatz unqꞌa imooleꞌ.
4 As la til isuuchil unqꞌa tatineꞌ sbꞌaꞌn tu kabꞌal. As niman yol unqꞌa italaj intxaꞌeꞌ la ibꞌaneꞌ. As jik chit itxumbꞌal.
5 Tan asoj yeꞌ la til isuuchil unqꞌa tatineꞌ sbꞌaꞌn tikabꞌal, as aꞌ kol chit la itxꞌol tilat isuuchil unqꞌa qitzꞌin qatzikeꞌ qꞌa tu tostiixheꞌ.
6 As yeꞌ la ibꞌaneꞌ uvaꞌ la ok umaj naj uvaꞌ aꞌn oknajle tiqꞌabꞌ u Kubꞌaaleꞌ, tan la kuxh ijeꞌsa tibꞌ najeꞌ vatz unqꞌa qitzꞌin qatzikeꞌ. As eela ichee ipaav naj tukꞌ u txꞌiꞌlanajeꞌ.
7 As aal chit bꞌaꞌneꞌ uvaꞌ bꞌaꞌn itxumbꞌal la ibꞌan vatz unqꞌa tenameꞌ, aqꞌal uvaꞌ yeꞌ la eesal iqꞌii. As yeꞌ la kuꞌ tiqꞌabꞌ u txꞌiꞌlanajeꞌ.
Kam itxumbꞌal unqꞌa lochol tetz viqꞌesal unqꞌa niman tetz u Jesús
8 Echat la ibꞌan unqꞌa najeꞌ uvaꞌ la ok veꞌt lochonaalil xoꞌl unqꞌa qitzꞌin qatzikeꞌ, tan jik chit la yoloni. As jit kaꞌvatzul itxumbꞌal la ibꞌaneꞌ. As jit qꞌabꞌaꞌmil. As yeꞌ la isubꞌ imool tiꞌ itxꞌakat ipuaj.
9 As la inima unqꞌa jikla chusbꞌaleꞌ uvaꞌ kat ikꞌuch u Tiixheꞌ sqe. As la ibꞌan u bꞌaꞌneꞌ, aqꞌal uvaꞌ yeꞌl umaj vaꞌlexh la titzꞌa vitxumbꞌaleꞌ.
10 As lanal ilax itxumbꞌal bꞌaxa, as aꞌn la uch tokeꞌ lochonaalil, asoj yeꞌl umaj vaꞌlexhla yol ni tabꞌil stiꞌ.
11 As echat la ibꞌan unqꞌa ixojeꞌ uvaꞌ la ok lochonaalil xoꞌl unqꞌa qitzꞌin qatzikeꞌ. As jik chit la yoloni. As jit aayol la ibꞌaneꞌ. Pet kꞌujlebꞌal chit kꞌuꞌl. As jik chit itxumbꞌal chaꞌma la ibꞌaneꞌ.
12 As abꞌil uvaꞌ at tijleꞌm xoꞌl unqꞌa qitzꞌin qatzikeꞌ as umaꞌl kuxh tixqel la ibꞌaneꞌ. As jik chit la til isuuchil unqꞌa meꞌal ikꞌaoleꞌ tikabꞌal,
13 tan asoj jik chit itxumbꞌal tul la ibꞌan u aqꞌoneꞌ xoꞌl unqꞌa qitzꞌin qatzikeꞌ, as la oksal veꞌt iqꞌii. As yeꞌ la xoꞌvi tiꞌ talat isuuchil uvaꞌ kꞌujleꞌl ikꞌuꞌl tiꞌ u Jesucristo.
Isuuchil u jikla yol uvaꞌ alel te u Pablo taꞌn u Tiixh
14 As aꞌ ni valeꞌ uvaꞌ yeꞌ la bꞌalaxtu veꞌt in tiꞌ unqꞌelut axh. As nuntzꞌibꞌa bꞌen unqꞌa yoleꞌ see,
15 tan echeꞌ uvaꞌ jit kuxh nim la bꞌalaxtu veꞌt in tiꞌ vooneꞌ, as at veꞌt unqꞌa txumbꞌaleꞌ sakꞌuꞌl uvaꞌ la atxakonsa xoꞌl unqꞌa qitzꞌin qatzikeꞌ uvaꞌ txaael taꞌn u islich Tiixheꞌ, tan oꞌeꞌ uvaꞌ txaael oꞌ taꞌn Aak tiꞌ qaqꞌat iyakꞌil u jikla yoleꞌ as tiꞌ kumajat el ivatz unqꞌa chulin yoleꞌ.
16 As ootzimaleꞌ sqaꞌn uvaꞌ nimla yol u yoleꞌ uvaꞌ kat ikꞌuch Aak sqe tiꞌ kunachat Aak, tan ech ni tal u yol ileꞌ:
As kat ok Aak echeꞌ naj tiꞌ ul ikꞌuchat tibꞌ sukuvatz.
As an chit u Tiixhla Espíritu kat kꞌuchun uvaꞌ Tiixh u Jesús.
As kat til kuꞌ tzan unqꞌa ángel u nimla bꞌaꞌnileꞌ uvaꞌ kat ibꞌan Aak sqiꞌ.
As kat paxsal veꞌt u yoleꞌ tiꞌ Aak xoꞌl unqꞌa tenameꞌ uvaꞌ jit tiaal Israel.
As kat kꞌujebꞌ veꞌt ikꞌuꞌl unqꞌa tenameꞌ tiꞌ Aak.
As kat jeꞌ veꞌt Aak tu almikaꞌ tiꞌ toksal iqꞌii Aak, tiꞌk u yoleꞌ.