Mukaanda a Pawuli wa mioolo kwaa basi
Kolito
Kotili
Umata mu mukaanda a Pawuli wa tsiomi kwaa basi Kolito, mikeenzi mili mu umata ku ngaanda Kolito, na bali mu utsinduu mikaanda mu mapeembi mo mamoolo: Pawuli li mu utsinduu kwaa basi Kolito na bo ka bali mu utsinduu kwaa nde (2.3). Induu kia Pawuli na basi Kolito ili mu usiindi ubiiyi. Tswaamina Pawuli ubwayene ku ngaanda Kolito, nde li mu ukwasonuu kwaa bo mu usaa uyiluu induu kii.
Mu kiiti kia tsiomi natee kia tsaamba (1—7), Pawuli li mu ukala mutindi a nde wa uba tumu a Yiisu. Kwaa nde, kio ili isala. Tsimi a nde ndila ya uyaabisa Nziaambi wuli Taayi na Yiisu Kristo mu mambuu moosi. Mu isala ki nde ayaki, mapasi ma mupili na mupili na mamubiti ku peembi a likwa mali malaa. Nde li mu ukama mutimi mu mo. Bu nde ali mu umweese bifwaani bii, Pawuli li na ilimbisi ti sa abiti basi Kolito mu usiingi nde na nziisili a nde.
Mu kiiti kia pwoombo natee kia wa (8—9), Pawuli li mu uloombo kwaa ngaa Kristo ba ku ngaanda Kolito mu ukaba mu mutimi mosi, kwaa bangaa Kristo ba ku ngaanda Yerusalemi, babali bawele. Mbayili ya binaa yi babamosi bali na yo, yafwaana ubaasila babahele. Mu taanga di Pawuli akisonuu mukaanda wu, ngaanda Kolito ali ngaanda ya busini. Baata bakisa ngo mumbungu kuu, na mboongo diali na ndutu yalaa. Biiti bi bili mu ubiti mu utsimi bwa ubaasila bambaayi. Yiisu Kristo, wali isini, akitii muwele, paa asa ti baata baba bisini mu buwele ba nde (8.9). Ndaa yii yili mu uha kuulu kwaa baata mu ubaasili bambaayi.
Mu kiiti kia kuumi natee kia kuumi na bitata (10—13), Pawuli li mu usa lisoboso nha kati a mitindi mioolo mia uba tumu a Yiisu Kristo. Libuundu la ku Kolito lali laviinzuu mundaa baata bali mu uha nziisili yasobuu na ya Pawuli (11.3-4). Balibuundu bali mu uduku nziisili a baata baa. Baata me bali mu umonuu weti batumu ba Yiisu babanene. Bo bali na tsuyili yimbwe. Bo bali na mvuungu. Bo bali mu ubili mu ibo makulu mundaa bo babanguu. Kii ili ifwaani kia binzia-nziaambi bialaa bili mu ngaanda Kolito.
Pawuli li mu umweese ti nde li tumu a Yiisu wa mutindi mukimi. Tumu a Yiisu Kristo li mu ukuluu mu usa ti bambaayi banaanguu. Nde li mu usiingi uba wadee mundaa ti nde li mu uyaka mifuri mili mu umata kwaa Nziaambi. Nde a li mu uloombo iloo so imosi pe mundaa mbweeyili a nde, so mbilili, so busini. Pawuli li mu ulibili basi Kolito moonyi ti nde ayaabisi bo Ndaa Yimbwe kwa ibuu, kwahele a uloombo bo mboongo. Yii yili mutindi wa uleele ti litoono la Nziaambi mu baata lili la ibuu. Nziaambi a li mu uha iloo kwaa muutu pe, mu ukebe mvutu.
1
Mabwee
1 Me Pawuli, tumu a Kristo Yiisu mu litoono la Nziaambi, ndi mu usonuu mukaanda wu kwaa libuundu la Nziaambi la ku ngaanda a Kolito, na kwaa babangira boosi bali mu itinini kia Akayi. Me ndi itwaari na mwaana a nguu a bisa-beni Timoteo.
2 Nyaala bweese na iyeenge bili mu umata kwaa Taayi a bisa-beni Nziaambi na Pfumu Yiisu Kristo biba na beni!
Pawuli li mu uvutulu matoondo kwaa Nziaambi
3 Dibilani Nziaambi, Taayi a Pfumu a bisa-beni Yiisu Kristo. Nde li Taayi waluulu mu bubwe, Nziaambi wuli mu uhamisanga baata mu mandaa moosi.
4 Nde li mu uboondo bisi mu mapasi ma bisa-beni moosi, paa ti bisi ka dituu uboondo baata boosi babali ku tso mapasi ma mupili na mupili, mu uha bo mboondili yi bisi bameme diayaka kwaa Nziaambi.
5 Mu ngwanya, weti bu dili mu umono mapasi malaa mu itwaari kia bisi na Kristo, ni buu ka, mu Kristo bisi dili mu uholo pamini yinene.
6 Mu taanga di bisi dili mu umono mapasi, ni mu ndaa pamini a beni na ukala beni. Na mu taanga di Nziaambi ali mu uhamisa bisi, ni mu ndaa ti beni diyaka mboondili yikaabaasila beni mu uba na mukonono, mu maana mapasi ma bisi dili mu umono ka.
7 Mu yii, bisi dili na ilimbisi kiahama mu beni, na bisi diayaaba ti, bu beni dili mu ukaba mapasi itwaari na bisi, Nziaambi ka sa ahamisa beni itwaari na bisi.
8 Mu ngwanya, baana ba nguu ba me, bisi diatoono ti beni diyaaba mapasi ma bisi diamoni ku itinini kia Asia. Mapasi maa ali mavulu uleme, na mali mavulu mifuri, mu iteesi kiabiti bisi mu udiimbisi ilimbisi kia ubwaba moonyi.
9 Ka bisi, mu mitimi mia bisi, bisi diakimono weti ti bisi baata babamaaha tsieembili ya likwa. Ka mandaa maa mayilimi buu, paa ti bisi diyii unyaala usa imiini kia bisi mu bisi bameme, ka mu Nziaambi wuli mu usiimbili babakwa.
10 Ni nde akuulu bisi mu mapasi ma likwa ma pili yii, na nde sa abwakuulu bisi mu mo. Ngwanya, bisi diasuusu ilimbisi kia bisi mu nde, na bisi dili na ilimbisi ti nde sa abwakuulu bisi.
11 Na beni ka dili mu ubaasila bisi mu likuundu la beni. Mu yii, bisi sa dibaa bungori ba Nziaambi mundaa makuundu ma baata balaa, na baata balaa sa bavutulu matoondo kwaa Nziaambi mundaa bweese ba nde, na baata balaa sa bavutulu nde matoondo mu ndaa bisi.
Pawuli asobi minhana mia nde mia midieenge
12 Mono ndaa yi bisi dituu uba na kinyi mu yo ni yi: weti muniingi a ndaa wuli mu uyuhunu kutso mitimi mia bisi, wuli mu uta imbaangi mu ndiaatili a bisi mu tsi, na vulu-vulu kwaa beni, mu ngwanya na buleembi bali mu umata kwaa Nziaambi. Mutindi a ndiaatili a bisi mu tsi, a yali pe ya mayele ma baata ba tsi, ka ya bweese ba Nziaambi.
13 Mu mikaanda mia bisi, bisi a dili mu usonuu beni mandaa makimi pe, so a ndila mandaa ma beni dili mu ukwataanga na ma diakwayaaba. Na me ndi na ilimbisi ti beni sa diyiluu uyaaba bubwe-bubwe mandaa ma,
14 weti bu beni diakwayaaba hoolo: mu iluumbu kia nziriri a Pfumu a bisa-beni Yiisu, beni sa diba na kinyi mu bisi, weti bu bisi ka dikaaba na kinyi mu beni.
15 Me ali na ilimbisi mu ndaa yii, ni mu buu me nali nanhana ukwayiri kwaa beni, paa ti beni dibaa bweese mu mbala ya dioolo.
16 Mu ngwanya, me nali na nzala ya ukwalabuu kwaa beni, tswaamina me niyene ku itinini kia Masedwane, na nha mbisi me nakeni ubwayiri avutuu kwaa beni. Mu yii, beni diakeni ubaasila me mu udukusu midieenge mia me ku Yuuda.
17 Bu me nakisa minhana mii, mu uleele ti matsimi ma me ali ma yulu a yulu? Minhana mi me ndi mu usa, mu ndila litoono la imuutu me ndi mu usa mio, paa ti me «siingi» na «ubisi» mu mbala mosi?
18 Nziaambi walibweeye li mbaangi a me: mandaa ma bisi dili mu uleele beni a mali pe «Ee-e» na «ngori» mbala mosi.
19 Ni mu buu, Yiisu Kristo nde makulu Mwaana a Nziaambi wu bisi diayaabisi kwaa baata, Siila, Timoteo na me makulu, a ayiri pe mu uba mbala mosi «Ee-e» na «ngori». Ka taanga dioosi nde ni «Ee-e» a Nziaambi.
20 Mu ndaa ti, Kristo ni «Ee-e» wuli mu ukuusu ndasini dia Nziaambi dioosi. Ni mu Yiisu Kristo bisi dili mu uleele «Ameni» a bisi, «Ee-e» a bisi mu uha buzitu kwaa Nziaambi.
21 Na, ni Nziaambi nde makulu li mu uhamisa bisa-beni mu Kristo. Ni nde ka abiaalisi bisi mu lituu la nde.
22 Nde asa bisi inyeme kia nde mu umweese ti bisi dili baata ba nde, na nde ayitili Muheebili wa Ngira mu mitimi mia bisi weti ikuku kia tsiomi kia mamabwe ma nde asweehele bisi.
23 Me niholo Nziaambi weti mbaangi a me, nde utuu umaasa muwuumu a me so me futi pia: ni mu ndaa ukala beni, me naholo kesili ya uhele uyiri avutuu ku ngaanda a Kolito.
24 Bisi a dili na nzala ubamuu beni pe mu mandaa ma beni diafwaana usa imiini mu mo. Mu ndaa ti, beni dili diahama mu imiini, ka bisi dili na nzala ya usala itwaari na beni mu kinyi a beni.