15
Ebvu Mósisu
1 Noo ya; Mósisu; waa ndu Ízurẹlu gụa ebvu-a nụ Chipfu sụ:
Mu a-gụ ebvu nụ Chipfu;
kẹle o goshiwaru l'ọ parụ ẹka.
Ịnya mẹ ndu agba iya nụ
bẹ o nwuru ye l'eze-ẹnyimu.
2 Chipfu bụ ọkpehu mu
bya abụru onye mu agụ-ku l'ebvu.
Ọ bụru yẹbedua bụ onye dzọtaru mu nụ.
Ọo ya bụ Chileke mu; mu a-nọdu aja iya ajaja.
Ọ bụru iya bụ Chileke nna mu;
mu a-nọdu ekutse ẹpha iya.
3 Chipfu bụ ojọgu.
Ọo Chipfu bụ ẹpha iya.
4 Ụgbo-ịnya Fero yẹe ndu ojọgu iya
bẹ o nwuru ye l'eze-ẹnyimu.
Ndu kachaa ree lẹ ndu-ishi ụgbo-ịnya Fero
bẹ mini riru lẹ Eze-ẹnyimu Uswe-uswe
5 Ogbumini riru phẹ;
ẹphe bụru tụbukungu
l'ọhu-mini gẹ mkpuma.
6 Ẹkutara gụbe Chipfu
bẹ ọkpehu,
dụ iya nụ dụ biribiri.
Ẹkutara gụbe Chipfu
bẹ gwerụ ndu ọhogu ngu uji.
7 I gude ọdu-biribiri ngu,
parụ ẹka kwatsushia ndu
wụ-lihuru etso ngu opfu.
Ị haa oke ẹhu-eghu ngu,
enwu g'ọku;
ọ bya etsua phẹ g'ọku,
etsu ẹswa ọkponku.
8 Ọo unme bẹ i ziru l'imi;
eze-ẹnyimu kọo obvudu.
Utso ono pfụru rọo g'igbulọ.
Ogbumini hụkoo l'ọhu eze-ẹnyimu.
9 Ndu ọhogu sụru:
“Anyi a-chị phẹ ọso gude.
Anyi a-kwa iphe phẹ l'ọkwata; kee;
gude phẹ mee iphe,
agụ anyi ẹgu ememe.
Anyi a-mịta ogu-echi anyi;
tụko phẹ gbushia.”
10 Obenu l'ị tụru unme;
eze-ẹnyimu tụko phẹ rigbushikọta.
Ẹphe bụru tụbukungu
l'eze-ẹnyimu g'ọta-njele.
11 ?Dẹnu agwa,
atụru gụbe Chipfu?
?Bụ onye dụ gẹ ngu?
G'ị dụ-be nsọ bẹ dụ biribiri.
G'ị dụ-be akpabiri dụkwapho ebvu.
Iimeje iphe, dụgbaa biribiri.
12 Ẹkutara ngu bẹ ị machịru;
mgboko bya atụko ndu ọhogu
anyi lwee.
13 Ndu ị gbafụtaru
bẹ ii-gude n-yemobu ngu; dua.
Ọ bụru ẹka ono, i bu, dụ nsọ ono
bẹ ii-gude ọkpehu ngu durwua phẹ.
14 Ọhamoha, nụmaru iya nụ
bẹ ndzụ e-rwuta.
Ndzụ e-rwuta ndu Filisitayinu.
15 Ndu-ishi ndu Edọmu
bẹ meji a-tọfu.
Ẹhu anmaa ndu-ishi Mówabu
anmanma.
Ndu Kénanu erwushihu.
16 Ndzụ-agụgu; waa ẹhu-anmanma
e-gude phẹ.
Ọ bụru ọkpehu, dụ ngu l'ẹkutara
bẹ ii-gude mee
g'ẹphe dabyichaaru gẹ mkpuma;
gbiriri jasụ ndibe gụbe Chipfu wụghata;
mbụ ndu ono, ị gbafụtaru l'ohu,
ẹphe shi bụru ono.
17 Ii-dubata phẹ;
bya eye phẹ l'eli úbvú nkengu;
mbụ ẹka gụbe Chipfu họtaru
g'ọ bụru ibe ngu;
mbụ ụlo, dụ nsọ ọphu i
gude ẹka ngu kpụa.
18 Ọo gụbe Chipfu a-bụru eze
jasụ lẹ tuutuutuu lẹ mịimiimii.
19 Teke ịnya Fero; waa ụgbo-ịnya iya; waa ndu agba l'ịnya bahụru l'eze-ẹnyimu ono bẹ Chipfu vutaru mini ono sọ-kpute phẹ. Obenu lẹ ndu Ízurẹlu jeru ije l'alị ọkponku ghaa eze-ẹnyimu ono.
20 Noo ya; Miriyamu, nwanyị, epfuchiru Chileke, bụ nwune Erọnu bya ewota nkwa; ụnwanyi l'ophu wụ-tsoru iya; akụ nkwa bya ete iya etete.
21 Miriyamu nọdu agụru phẹ ebvu ono; asụje:
Unu gụa ebvu nụ Chipfu;
noo kẹle o goshiwaru l'ọ parụ ẹka.
Ịnya yẹe ndu agba iya nụ
bẹ o nwuru ye l'echi eze-ẹnyimu.
Mini Mara; waa Elimu.
22 Tọbudu iya bụ; Mósisu dua ndu Ízurẹlu gbẹ lẹ Eze-ẹnyimu Uswe-uswe duru phẹ bahụ l'echiẹgu Shuru. Ẹphe jee ije ujiku ẹto l'echiẹgu; ọphu ẹphe ahụmaduru mini.
23 Ẹphe rwua Mara; ọphu ẹphe adụdu ike ngụa mini iya; noo kẹle mini ono atsọ ilu. Noo iphe ono, kparụ iphe, a gụru ẹka ono Mara.
24 Ẹphe gụaharu Mósisu aphụ; sụ: “?Bụ gụnu bẹ anyi a-ngụ?”
25 Noo ya; Mósisu raku Chipfu. Chipfu bya egoshi iya mkpirikpu oshi. O wota iya chie lẹ mini ono. Mini ono tsọahaa ụtso mini.
Ọ kwa l'ẹka ono bẹ Chipfu tụru ekemu nụ phẹ; bya atọoru phẹ ọkpa iya. Ọ bụkwarupho l'ẹka ono bẹ ọ nọ hụa phẹ ama.
26 Chipfu sụ phẹ: “Ọ -bụru l'unu ngabẹru nchị l'opfu mụbe Chipfu, bụ Chileke unu; bya eme iphe, pfụru ọto l'ẹnya mu; ọ -bụru l'unu anga nchị l'iphe, mu sụru g'unu meje; bya etsoẹpho iphe, mu tọru ọkpa sụ g'unu tsoje; bẹ ọ tọ dụdu ẹjo iphe-ememe ono, mu gude byapfuta ndu Ijiputu ono, mu bya egude byapfuta unu. Noo kẹle ọo mbẹdua bụ Chipfu onye emeje unu g'unu ka mma l'iphe-ememe.”
27 E mechaa; ẹphe bya ejerwua Elimu; ẹka ọgba-mini iri l'ẹbo nọ; waa upfu mpfụ ụkporo ẹto l'iri. Ẹphe bya akpọbe ụlo-ẹkwa phẹ lẹ mgboru mini ono.