3
Habakuku epfu anụ Chileke
1 Ọwaa bụ epfupfu, onye mpfuchiru Chileke, bụ Habakuku pfuru nụ Chileke. Ọ bụru olu aphụ bẹ o gude gụa ya l'ebvu.
2 Gụbe Chipfu; mu nụmawaru
ụ́dù ngu; mbụ l'iphe,
i meru eye mu ebvu.
Gụbe Chipfu; meshinaa iphe
ono nta-a,
anyi nọ ndzụ-a!
Mbụ-a; menaa g'a maru iya
nta-a, anyi nọ ndzụ-a!
Ẹhu -ghuahaa ngu oke eghu;
nyatanụ obu-imemini.
3 Chileke shikwa lẹ Temanu
bya;
mbụ l'onye ono,
dụ nsọ ono shi l'úbvú
Paranu bya.
Ọdu-biribiri iya tụko imigwe
l'ophu sweta;
tẹme a nọdu etu iya ẹpha
l'ẹkameka l'eliphe.
4 Ogbu-nwịinwii ya dụ g'ẹka
ẹnyanwu watarụ.
Ọbochi-ẹka iya nọdu
egbuchaa nwịinwii.
Ọ bụru l'ẹka iya ono bẹ o
domiru ike iya.
5 Ẹjo-iphe-ememe nọdu eshije
iya l'iphu agụshihu.
Mgbupya nọdu etsokwa iya
phọ l'azụ.
6 Ọ bya apfụru bya anmaa
mgboko yigayiga.
Ọ bya elee ẹnya elele;
ọhamoha nmahụ
pyaapyaapyaa.
Oke úbvú ndiche ono
gbawashịhuchaa
agbawashịhu.
Eli obvu ndiche ono
dakpọshihu;
ụzo iya bụru ojejoje.
7 Mu hụmaru ụlo-ẹkwa ndu
Kushanu l'ẹka ooje
iphe-ẹhuka;
mbụ l'ẹka ono,
ndu Midiyanu bu ono
anma ọkpobe jiijiijii.
8 ?Bụ nggele nggele megbaaru
iphe, ẹhu ghuru
ngu eghu tọo;
gụbe Chipfu?
?Bụ nggele nggele bẹ i shi
atukoshije oke
ẹhu-eghu ngu?
?Bụ eze-ẹnyimu bẹ i shi
abarụ mba teke ono,
ị nọ l'eli ịnya ngu
agba ono yẹle
eli ụgbo-ịnya ngu ono,
i gude mekpee
ọhogu ngu ono?
9 Ị chịfutaru ụta ngu ghebe
ọnu;
bya ekua sụ g'a chịtaru
ngu apfụ, dụ igwerigwe.
Ị bya egude nggele kekashịa
mgboko.
10 Oke-úbvú hụmaru ngu
nmahụ jiijiijii.
Ọchioku mini gbaru
gborogboro bya
agbaghaa.
Ogbu-mini swokperehu.
Akparamini iya nọdu
avọ-lihuje
ephekerephe
ephekerephe.
11 Ẹnyanwu yẹe ọnwa
keru jịngujingu
l'akpaminigwe
l'ẹka ẹphe hụmaru apfụ
ngu g'oozi phaaphaa;
bya ahụma arwa ngu
g'ọoku phoophoophoo.
12 I gude oke ẹhu-eghu zọo
garamugaramu zọjaa
eliphe l'ophu;
bya egude ẹhu-eghu gwee
ọhamoha arakabya.
13 Ị fụtaru bya g'ị dzọta ndibe
ngu;
mbụ g'ị dzọta onye nkengu,
a wụru manụ l'ishi.
Onye bụ ishi l'alị ndu
ẹjo-iphe-a bẹ i gwerụ
arakabya; mbụ;
shi l'ishi phụfu iya
iphe jasụ l'ọkpa.
14 Ọo arwa nkiya bẹ i gude
sụjaa ya ishi teke ono,
ndu ojọgu iya
wụfutaru bya g'ẹphe
chịkaa anyi ono.
Ẹphe nọdu atụ okoo l'ẹphe
abya alajashị ndu
iphe-ẹhuka byaru,
bụ ndu domiru onwophẹ
edomi.
15 Eze-ẹnyimu bẹ i gude ịnya
ngu zọo garamu
garamu ghata;
mbụ ghata eze mini,
kụru l'ikpo l'ikpo.
16 Teke mu nụmaru iya bẹ meji
tsukahụru mu;
mbụ ụgbu-ọnu phụkota
mu aphụphu l'ẹka mu
nụmaru igiji iya.
Ọkpu reshihuchaa mu
ereshihu;
ọkpa phụkota mu
kpaakpaakpaa.
Mu a-takpọepho nshi
kwabẹru mbọku,
ẹphe eje oke iphe-ẹhuka;
mbụ ndu ono,
gude ojọgu phẹ
asọpyabe anyi ono.
17 A makwarụ-a l'oshi
figu ta atụedu ige;
ọphu vayịnu
amịedu mebyi;
ọphu oshi olivu
enwedu akpụru;
ọphu iphe,
e meberu l'opfu
emehujeẹdu emehu.
Mbụ-a; a makwarụ-a
l'atụru ta adụedu
l'ụlo atụru;
ọphu eswi adụedu
l'ọka-eswi.
18 Ọle mu e-gudelẹ-a iphe,
Chipfu eme ete ẹswa.
Ẹhu a-nọdule-a atsọ mu l'ẹ́ká
Chileke ono,
bụ onye ndzọta mu ono.
19 Ọ kwa Chipfu, bụ Chileke
mu bụ ike mu.
Ọ bụru iya eme ọkpa
mu g'o shihu ike gẹ
kẹ mgbada.
Mbụ l'oo-me gẹ mu
gude ọkpa zọo
garamugaramu l'eli
ẹka dụ úbvú úbvú.
Ọ kwa onye-ishi ebvu bẹ ọ dụru; ọ bụru une bẹ ee-gude gụa ya.