9
1 Ọle g'ọ dụhabe; e -mechaa bẹ ọ tọ dụedu iphe, adụ ragaraga l'ẹnya ndu nọ l'iphe-ẹhuka. Teke k'ichee bẹ ọ tọ dụdu iphe, a gụberu alị ndu Zebulọnu yẹe alị ndu Nafụtali. Obenu l'o -be l'iphu bẹ aa-kwabẹ ndu bu eze-ẹnyimu ntse ùbvù; mbụ ndu bu l'azụ ẹnyimu Jiọ́danu azụ iya ọphuu, bụ iya bụ alị Gálili, bụ ẹka ono, ndu ọhozo bu ono.
A nwụru anyi nwaswa
2 Sụ-a; ndu nọ l'ime ọchii
hụmaakwaru ìphóró,
parụ ẹka.
Ndu k'ono, bu l'alị ono,
gbakọtaru tsụkiribaa ono
bẹ ìphóró nwuakwarụ
kẹ phorokotokongu.
3 Ọha ono bẹ i mewaru;
ọ ka shii; bya emee;
ẹhu ka phẹ atsọ ụtso.
Ẹphe nọdu anọduje l'iphu
ngu ete ẹswa gẹ ndu
ete ẹswa ekpu iphe,
ẹphe metaru l'opfu,
ẹphe kọru;
gẹ ndu ete ẹswa l'ẹka
ẹphe eke iphe,
ẹphe kwatarụ l'ọkwata.
4 L'ọ bụ-a g'i meru teke
i mekperu ndu
Midiyanu teke ndiche
phọ bụ g'ị chịkashiru ivu-ẹrwa,
shi nyịpyabe ndibe ngu;
bya anyakashịa mgbọrígwè,
e shi swebe phẹ l'ukuvu;
yẹe oshi,
ndu emekpa phẹ ẹhu shi
gude echi phẹ ẹchachi.
5 Akpọkpa ndu ojọgu g'ọ ha,
e gude lwụa ọgu;
mẹkpoo iphe, bụ uwe,
a rwaphuru lẹ mee bẹ bụ
iphe,
e doberu k'akpọ ọku;
mbụ l'ọo-dụ gẹ nkụ,
e gude aphụ-nwu ọku;
6 kẹle a nwụru anyi nwaswa;
mbụ l'a nụru anyi nwa
nwoke.
Ọ bụru iya bụ onye a-bụru
onye-ishi.
Iphe, aa-nọdu eku iya bụ
“Onye mkpozi-ụzo,
dụ biribiri”;
yẹe “Chileke,
bụ Ọkalibe-Kakọta-Ike”;
waa “Nna-ojejoje”;
waa “Onye-ishi,
eme gẹ nchị dụ doo”.
7 Abụbu, ọo-bụru onye-ishi;
yẹe nchị-odoo,
e-shi iya l'ẹka a-nọdu aka
shii eje ala l'iphu;
tẹme ọphu ọ byadu
abvụ abvụbvu.
Ọo-nọdu l'aba-eze
ochochoroche iya,
bụ Dévidi bụru eze.
Oo-gude ekpe ikpe, pfụru ọto;
waa apfụbekoto mee ya
g'o keru jịngujingu;
mbụ mee ya g'ọ ngụru
angụru e -shi lẹ teke ono
jasụ l'ojejoje.
Ọ bụru g'ọ phụ-tabe Chipfu,
bụ Ọkalibe-Kakọta-Ike
l'ẹhu l'e-me g'o mee ya.
Ndu Ízurẹlu akpatsu Chipfu ẹhu-eghu
8 Nnajịuphu pfuwaru iphe, ya e-me oshilọkpa Jiékọpu. Iphe ono tukoru ndu Ízurẹlu l'ishi;
9 k'ọphu bụ lẹ ndu Ízurẹlu l'ophu a-makọtaru iya; mbụ ndu Ifuremu; mẹkpoo ndu bukọta lẹ mkpụkpu Samériya; ndu egudeje eku onwophẹ yẹe etsetse, shi phẹ l'ọkpoma sụ:
10 “Ụlo ono, e gude ẹja kpụa ono bẹ dakpọshihuakwaru nụ. Ọle anyi a-pyịkwanu mkpuma kpụkwaa ya. Oshi sịkamo ono bẹ e gbutsuakwaru. Ọle anyi e-wokwanụru oshi sida je adzakwaa l'ọzo iya.”
11 Ọle Chipfu byaru eyeeru ndu ọhogu Rezinu ọkpukpu-ike g'ẹphe je etsoo phẹ ọgu; mbụ lẹ ndu ọhogu phẹ bẹ ọ tụgbawaru nanụ doberu phẹ.
12 Ndu Arámu shiakwa l'ụzo ẹnyanwu-awawa. Ndu Filisitayinu shi l'ụzo ẹnyanwu-arịba saa ọnu gabala bya eworu ndu Ízurẹlu lwụa. Ọle iphemiphe ono mechaarụ; ẹhu nọdu eghuẹle-a Chileke eghu. Ọ paliẹle-a ẹka g'ọ paliru iya.
13 Ọle ndu Ízurẹlu ta adakọbeduru lwapfuta onye ono, chiru phẹ iphe ono; mbụ l'ẹphe ta achọduru Chipfu ono, bụ Ọkalibe-Kakọta-Ike ono.
14 Ọo ya bụ lẹ Chipfu e-bufu ndu Ízurẹlu ishi bufu phẹ ọdzu; sàshị́a igu; pheshia ẹswa l'akpụru ẹnyanwu lanụ.
15 Ọ bụru ndu bụ ọgerenya; yẹe ndu nweru ẹnya bụ phẹ bụ ishi ọbu. Ọ bụru ndu mpfuchiru Chileke, bụ ndu ezi iphe, abụdu ire-lanụ bụ mgbọdzu.
16 Ndu edu ndu Ízurẹlu eduswekwa phẹ eduswe; tẹme ẹphebedua, eedu ụzo ọbu bụru ndu e duphuru ụzo.
17 Ọo ya bụ lẹ ndu bụ okorọbya l'alị ono te emedu g'ẹhu tsọo Nnajịuphu ụtso. Ndu enwedu nna yẹe ụnwanyi, ji phẹ nwụhuru bẹ ọ tọo phụduru obu-imemini. Noo kẹle onyemonye te emedu ele Chileke; tẹme onyemonye bụwaru onye ẹjo-iphe; bya egudewaa ọnu epfu mkpọkoro opfu. Ọle iphemiphe ono mechaarụ; ẹhu nọdu eghuẹle-a Chileke eghu. Ọ paliẹle-a ẹka g'ọ paliru iya.
18 Ẹjo-iphe, ẹphe eme enwu phuruphuru g'ọku. Ootsu ọgara-mbo etsu olekarara. Tẹme ọ tụko ẹpfukala, nọ l'ọswa l'ophu eze wọowoowoo; k'ọphu bụ l'ire-ọku iya zelihuru tsoru ẹnwuru-ọku iya ala l'eli l'eli.
19 Oke ẹhu-eghu Chipfu, bụ Ọkalibe-Kakọta-Ike bẹ a-nma alị ono l'ophu swọkoswoko. Ọ bụru ndu Ízurẹlu a-bụru manụ-ọku, aa-nọdu ekpu l'ọku ono g'o gude bulihu ebulihu. Ọphu ọ dụdu onye aphụjeru nwune iya obu-imemini.
20 Ẹphe e-gbu l'ẹkutara ria; ẹgu agụle phẹ-a. Ẹphe eria k'ẹkicha; o too jikwa phẹ phọ. Onyemonye a-taahaa anụ onye yẹe ya bụ.
21 Mbụ lẹ ndu Manásẹ a-taahaa anụ ndu Ifuremu. Ndu Ifuremu ata kẹ ndu Manásẹ. Ẹphe atụko gha iphu tsoahaa ndu Jiuda ọgu. Ọle iphemiphe ono mechaarụ; ẹhu nọdu eghuẹle-a Chileke eghu. Ọ paliẹle-a ẹka g'ọ paliru iya.