40
1 Chipfu nọdu epfukwarọ
eyeru Jiobu sụ iya:
2 “Gụbe nwọphu abarụ
Ọkalibe-kangokọtaru-nụ
mba;
?ị sụru g'ịikajeru iya iphe,
oo-me?
Gẹ gụbe onye ono,
ebo Chileke ibo ono
yenaa ọnu l'opfu-a,
oopfu-a!”
3 Tọbudu iya bụ; Jiobu bya eyeeru
Chipfu ọnu sụ iya:
4 “Mu bụkwa onye ta abadu lẹ
mkpa.
?Dẹnu gẹ mu e-shi jeye ọnu
l'iphe, iipfu?
Mu woakwaru ẹka dẹe l'ọnu.
5 Mu pfuakwaru akpọ opfu
lanụ; ọphu mu
adụkwanu ike eye ọnu
l'ọphu iipfu.
Mu bya epfuwa akpọ labọ;
nta-a bẹ mu tee
pfubaẹkwa ọzo.”
6 Noo ya bụ; Chipfu bya agbẹkwa
l'oke phẹrephere ono pfuru
yeru Jiobu sụ iya:
7 Rịkota onwongu gẹ nwoke;
gẹ mu bya ajịa ngu ajị.
Ọo ẹpho g'i yejekwa ọnu
l'iphe, mu ajị ngu.
8 ?Ii-dụ ike mebyia ikpe,
mu kperu?
?Ịi-dụ ike nma mu ikpe;
k'ọphu ikpe a-kalẹru gụbedua?
9 Ọdzu-ẹka ngu; ?ọ ha gẹ kẹ
Chileke?
Tọo ?ị dụ ike egude olu ngu
atụ egbigwe g'ọotuje ono?
10 Ngwanụ; gudenụ
o-gbu-nwịinwii yẹe akpabiri
kwaa onwongu akwa!
Yenaa akwabẹ ùbvù yẹe
enweru ẹnya g'onye
yeru uwe!
11 Gbanwụbenu iphu ẹhuka
ẹhuka gude goshi l'ẹhu
eghu ngu eghu!
Lenaa ẹnya hụma iphe,
bụkpoo ndu eku
onwophẹ kuzeta phẹ alị;
12 mbụ lee ẹnya hụma iphe,
bụkpoo ndu eku
onwophẹ mee phẹ
g'ẹphe darwua alị!
Tụkonu iphe, bụkpoo ndu
ẹjo-iphe mebyishikọta
l'ẹka ẹphe pfụru!
13 Tụko phẹ g'ẹphe ha lia elili l'alị!
Woru phẹ iphu kpupyabẹ
ekpupyabẹ l'ime ilu!
14 Noo teke mu e-kweta ngu
l'ẹkutara ngu a-dụ-a ike
dzọo ngu.
15 Lenaa oke anụ ono,
bụ behemotu,
bụ anụ, mu tụkoru gụ l'iya
mee dobe;
tẹme ọ bụru anụ,
ata ẹswa l'alị g'eswi.
16 Sụ-a; lenaa ẹgube ike,
dụ iya l'ọkpa!
Hụmawaro ẹgube ike,
dụ iya l'akwara akwara,
gbashịru iya l'ẹpho!
17 Ọdzu iya anọduje enwunga
g'oshi sida.
Anụ anụ, dụ iya l'ụtapfu
ligbachaaru eligba.
18 Ọkpu iya bụ mkpụrukpu
onyirubvu bẹ ọ bụ.
Oshi-ọkpa iya bụru mgbọrígwè.
19 Ọo ya kachaa shii l'iphe,
bụkpoo iphe,
Chileke meshiru dobe lẹ
mgboko;
ọle onye ono, meru iya nụ
ono egudejelẹ-a
ogu-echi iya zaa ya ntse.
20 Úbvú úbvú anọduje ewotaru
iya iphe, ẹphe metaru;
tẹme anụ, bu l'ẹgbudu
g'ẹphe ha nọdu
anọduje iya ntse ebvu
ebvu.
21 Ọozeje lẹ mkpula oshi lotusu;
woru onwiya domia lẹ
mkpula ẹswa, nọ l'ụda.
22 Oshi lotusu ono egudeje
ẹpfukala, dụ iya nụ
gude domia ya.
Ẹkali oshi wilo nọ-phee ya
mgburugburu.
23 Mini -nọdu atụ kpereree;
o too yedu iya ebvu.
Ọphu ọ dụdu iphe,
eme iya nụ
m'obetakpọo ẹnyimu
Jiọ́danu gbaa utso
sụbe iya l'ọnu.
24 ?Bụ onye sụru iya egude
m'ọ nọdu ele iya ẹnya?
Tọo ?bụ onye sụru
g'ọo-nmata iya swọo
ya imi?