24
1 Belamu bya ahụmaepho l'iphe, dụ Chipfu ree bụ g'a gọru ọnu-ọma nụ ndu Ízurẹlu; ọphu o to jeẹduru l'ajị ẹgube oojejehawa. Iphe, o meru bụ l'o woru iphu ghaa l'ụzo echiẹgu.
2 Belamu bya apalia ẹnya imeli hụma ndu Ízurẹlu g'ẹphe kpọbegbaaru ụlo-ẹkwa phẹ l'ipfu l'ipfu. Unme Chileke bya iya l'ẹhu;
3 o pfushiahaa sụ:
“Waa iphe, Belamu nwa Beyọ epfu.
Ọ kwa opfu, onye ono, e meru; ẹnya sahụ ono epfu.
4 Opfu, onye anụmaje opfu, shi l'ọnu Chileke epfu;
mbụ onye ono, ahụmaje iphe, Ọkalibe-kangokọtaru-nụ egoshi; daa kpurumu kpupyabẹ iphu;
onye ono, e meru; ẹnya dụ sarịmu ono.
5 Ẹgube g'ụlo-ẹkwa ngu amabe mma; gụbe Jiékọpu;
mbụ ẹka gụbe Ízurẹlu bukpọ ebubu!
6 Ọo gẹ nsụda nsụda adụje-a bụ g'ọ sụsaru asụsa.
Ọ dụ gẹ mgbabu, a gbaru l'agụga ẹnyimu.
Ọ dụ g'oshi alowe, Chipfu yeru l'onwiya;
bya adụ g'oshi sida, bvuru l'agụga ẹnyimu.
7 Mini e-shije l'ite-mini Ízurẹlu asọshihu asọshihu.
Oshilọkpa phẹ bẹ e-nweru mini nweru k'etsutsu iya.
Eze phẹ bẹ a-ka eze Agagu shii.
Alị-eze phẹ bẹ aa-pali eli.
8 Chileke dufutaru phẹ l'alị Ijiputu;
bya emee phẹ; ẹphe nweru ọkpehu g'atsụ.
Ẹphe a-lwụcha ọhamoha, ẹphe dụ ashị;
mbụ kụpyashia ọkpu phẹ yọgiri yọgiri.
Ẹphe e-gude arwa phẹ nmafushia phẹ ẹpho.
9 Ízurẹlu bẹ nmakpuru anmakpuru; bya azẹe l'alị g'oduma.
Ẹphe dụ gẹ ne oduma; ?bụ onye a-dụ ike kpatsu phẹ?
G'iphe, bụ ndu gọru ụnwu Ízurẹlu ọnu-ọma bụkwaru ndu a gọru ọnu-ọma nụ.
G'iphe, bụ ndu tụru unu ọnu bụkwaru ndu a tụru ọnu.”
10 Tọbudu iya bụ; Belamu mee; ẹhu ghushiaha Belaku eghu ike. Ọ kụa ẹka kpaa; bya asụ Belamu: “Nta-a bẹ mu kuru ngu g'ị bya atụaru mu ndu ọhogu ọnu; ọ bụ-chiaru ọnu-ọma bẹ ị gọcharu nụ phẹ ugbo ẹto-a.
11 Ngwa; keta ọso tụgbua lashịa ibe ngu ẹgwegwa! Mu shi rịa kẹ gẹ mu kwabẹ ngu ùbvù, parụ ẹka; obenu lẹ Chipfu bẹ nafụwaru ngu ùbvù ọbu.”
12 Belamu sụ Belaku: “?Mu te epfuduru iya ndu i ziru g'ẹphe bya ekua mu sụ:
13 ‘Obetakpọo Belaku nụ mu ụlo iya ono, mkpọla-ododo mẹ mkpọla-ọchaa jiru pyịmu ono bẹ mu te emeghatakwa iphe, Chipfu sụru gẹ mu mee; ọphu mu egudekwa uche k'onwomu eme iphe, dụ ree; ọzoo iphe, dụ ẹji. Ọo ẹpho iphe, Chipfu pfuru bẹ mu e-pfu.’
14 Nta-a bẹ mu alawa; alapfu ndibe mu. Ọle-a; byakwa gẹ mu nmaaru ngu ọkwa; gẹ mu pfuaru ngu iphe, ndu-a e-mechaa mee ndibe unu lẹ teke dụ l'iphu.”
Opfu k'ẹno, Belamu natarụ l'ẹka Chipfu
15 Ọo ya bụ; Belamu pfuahaa sụ:
“Waa iphe, Belamu nwa Beyọ epfu.
Ọ kwa opfu, onye ono, e meru; ẹnya sahụ ono epfu.
16 Opfu, onye anụmaje opfu, shi l'ọnu Chileke epfu;
mbụ onye ono, maru iphe, shi Ọkalibe-kakọta-shii l'ẹka;
onye ono, ahụmaje iphe, Ọkalibe-kangokọtaru-nụ egoshi; daa kpurumu kpupyabẹ iphu;
onye ono, e meru; ẹnya dụ sarịmu ono.
17 Mu hụmaru onye ono; ọle ọ tọ bụdu nta-a.
Mu ele onye ọbu ẹnya; ọle ọ tọ nọdu ntse.
Kpokpode bẹ e-shi l'ọnulo Jiékọpu fụta.
Mgbọro-eze bẹ a-fụta lẹ Ízurẹlu.
Mówabu bẹ ọo-tụko egedegee ọnu-iphu gwee arakabya.
L'ọo-tụko ụnwu Sheti l'ophu mebyishikọta.
18 Ndu Edọmu bẹ aa-lwụta l'ọgu.
Nokwaphọ g'aa-lwụta ndu Siye, bụ ndu ọhogu Ízurẹlu.
Obenu lẹ ndu Ízurẹlu bẹ a-nọdu aka ike eje.
19 Onye-ishi bẹ e-shi l'ọnulo Jiékọpu fụta;
bya emebyishia ndu ọphu phọduru nụ lẹ mkpụkpu ono.”
20 Belamu bya elee ndu Amalẹku ẹnya bya asụ:
“Ndu Amalẹku bẹ bụ ivuzọ l'echilabọ ọhamoha;
obenu l'ẹphe a-bụru mkpurupyata l'ikpazụ.”
21 Ọ bya elee ndu Kénu ẹnya bya asụ:
“Ẹka unubẹ ndu Kénu bu ebubu bẹ e meru; o shihu kẹ dụngudungu.
Nwamkpu, unu tụru bẹ unu tụru l'eli mkpuma.
22 Ọle unubẹ ndu Kénu bẹ aa-lwụkwa alwụlwu.
Ndu Asiriya bẹ a-kpụko unu lẹ ndzụ.”
23 Tọbudu iya bụ; o pfua sụ:
“Oowaa! ?Bụ onye a-nọdu ndzụ lẹ teke Chileke a-nọdu eme iphe ono?
24 Ụgbo-mini e-shi agụga ẹnyimu l'alị Kitimu bya;
bya emekpaa ndu Asiriya yẹle ndu Eba ẹhu;
obenu l'ẹphebedua bẹ a-bụkwarupho mkpurupyata.”
25 Tọbudu iya bụ; Belamu pfuchaa nno bya agbalihu; ọ bụru iya ala ibe iya; Belaku tụgbukwapho lashịa.