5
1 Yuto sunil ebnaj yahawil sacerdote saybililo ebnaj xol anma, yakꞌlax ismunil ebnaj istzotel yin̈ anma tet Comam Dios, yeb yu yalten ebnaj ofrenda yeb xahanbal tet Comam yin̈ ismul anma.
2 Ebnaj yahawil sacerdote tuꞌ lahan ebnaj yeb yet anmahil chihoyxipaxico ilwebal yin̈ ebnaj, yuxin chu istzꞌay iscꞌul ebnaj yin̈ macta machi isnabal yeb yin̈ macta cꞌaynatoj.
3 Yuxin yilal yalten ebnaj xahanbal yin̈ ismul babel cat yakꞌni ebnaj xahanbal yin̈ ismul anma.
4 Machi hunu ebnaj ton̈e oc yin̈ huneꞌ munil caw ay yelapno tuꞌ, walxinto haꞌ Comam Dios sayn̈eco ebnaj, hacaꞌ yu issaylaxico naj Aarón.
5 Hacpax tuꞌ Comam Cristo mach ton̈e yaco isba yahawilo sacerdote ischuquil, wal xin haꞌ Comam Dios akꞌn̈e huneꞌ ismunil caw ay yelapno tuꞌ, yuto haꞌ Comam Dios halnicano hacaꞌ tiꞌ:
Hach tiꞌ Incꞌaholan, haninan chiwakꞌan hacawil yin̈ huneꞌ tzꞌayic tiꞌ, ẍiayoj.
6 Yeb xin ay huneꞌxa bay halbilcano yu Comam hacaꞌ tiꞌ:
Hach tiꞌ sacerdote yin̈ sunilbal tiempo, hacaꞌ naj Melquisedec, ẍiayoj.
7 Yet yehicꞌo Comam Jesucristo yul sat yiban̈kꞌinal tiꞌ caw okꞌi yeb caw ip txahli tet Comam Dios, iskꞌanni tet Comam Dios, Comam ay yip iscolni tet camical; yaben Comam istxah yuto caw yijem yute isba Comam.
8 Waxan̈ca Iscꞌahol Comam Dios ye Comam Jesús, yajaꞌ hul isyaꞌtajil yiban̈ caw xin yijem yute isba tet Comam Dios yu ej ilwebal hul yiban̈.
9 Yu isyijemal Comam tuꞌ yuxin akꞌlax ismunil yakꞌni colbanil mach istan̈bal tet macta chiyijen tzet chal Comam.
10 Haꞌ xin Comam Dios an̈eco Comam Jesús yahawilo sacerdotehal yu istzotel jin̈ tet Comam, hacaꞌ naj Melquisedec yet payat tiempo.
Caw ay ismay ta chon̈meltzoto jintaj
11 Caw tzetcꞌato tzet chiwochehan chiwalan teyet yin̈ huntekꞌan tiꞌ, yajaꞌ yaꞌta quexcowatxꞌenico yin̈ yuto caw lan̈o chitxumcha heyu.
12 Yuto hacaꞌxa istiempohal yichi heyaben cuybanile tiꞌ, cuywawom hexxam tinan̈, yajaꞌ wal xin ayto yilal hecuylax yin̈ yacꞌtohal yin̈ huntekꞌan babel cuybanile yet Comam. Caw hacaꞌ ye niẍte neneꞌ, maẍto chu yakꞌlax hunu tzet ye tuꞌ islob, to imeto chiakꞌlax tet, hac tuꞌ heyehi.
13 Huntekꞌan babel cuybanile tuꞌ yet mac maẍto chikꞌoji istxumni yin̈ istoholal, yuto hacaꞌ to niẍte unin imeto chiakꞌlax tet, hac tuꞌ yehi.
14 Wal huntekꞌan cuybanile ayxacan̈ xin yet mac ayxa isnabal yin̈ istoholal, xakꞌoji istxumni baytet cꞌul yeb baytet mach cꞌuloj; haꞌ mac hacaꞌ tuꞌ lahan hacaꞌ icham anma, chu isloni cawla tzet ye tuꞌ.