2
Lôm dabuŋ wakuc ŋawasi tau ma moasiŋ wakuc
Gêdêŋ kiŋ Darius nê gôliŋ ŋajala kêtu luagêc ŋaajôŋ kêtu 7 ŋabêc 21 Apômtaunê biŋ kêsa propete Hagai awa amboac tonec gebe “Galoc ôsôm êndêŋ gôliŋwaga Judaŋa Sealtiel latu Serubabel agêc Jehosadak latu dabuŋsêga Josua ma êndêŋ lau ŋapopoc samob amboac tonec gebe Amacnêm asa gêmoa, taŋ gêlic andu ŋawasi gêmuŋŋa su naŋ. Ma amac alic andu galocŋa tau amboac ondoc. O alic gêŋ galocŋa amboac gêŋ ŋaôma me masi. O Serubabel, têmtac êpa sugeŋ. Dabuŋsêga Josua, têmtac êpa sugeŋ. Ma lau gamêŋ tonecŋa samob, têmtac êpa sugeŋ. Apômtaunê biŋ tau tonec. Akôc kôm sa gebe aê gamoa gawiŋ amac. Lausiŋ undambêŋa nêŋ Apômtau nê biŋ tau tonec. Aêŋoc Ŋalau oc êmoa amac ŋalêlôm, atêc taôm atom. Gebe lausiŋ undambêŋa nêŋ Apômtau kêsôm amboac tonec gebe Sauŋgeŋ acgom, go aê oc jawiwic undambê to nom ma gwêc to masaŋm dim tageŋgeŋ êwiŋ. Aê oc jawiwic tenteŋlatu pebeŋ gebe samob sêkôc nêŋ awamataêjam sêmêŋ ma aê jakêŋ ŋawasi andu tonecŋa ênam auc. Lausiŋ undambêŋa nêŋ Apômtau kêsôm biŋ tonec. Gebe silber ŋatau aê ma gold ŋatau aêgoc. Lausiŋ undambêŋa nêŋ Apômtau kêsôm biŋ tonec. Lôm dabuŋ tonec ŋawasi ŋamuŋa oc êlêlêc gêmuŋŋa su. Lausiŋ undambêŋa nêŋ Apômtau kêsôm biŋ tonec ma aŋga gamêŋ tau tonec tec janam mec lau. Lausiŋ undambêŋa nêŋ Apômtau kêsôm biŋ tonec.”
Propete kêtu kênac lau dabuŋwaga
10 Gêdêŋ Dariusnê gôliŋ ŋajala kêtu luagêc ŋaajôŋ 9 ŋabêc 24 Apômtaunê biŋ kêsa propete Hagai awa amboac tonec gebe 11 “Lausiŋ undambêŋa nêŋ Apômtau kêsôm amboac tonec gebe Ôtu kênac êsêac dabuŋwaga gebe sêwa biŋ tonec sa gebe 12 ‘Ŋac teŋ embe ênsambaŋ ŋamêsôm da dabuŋŋa êsêp nê ŋakwê ŋalêsu ma êmoasac polom me gêŋ kêsôc teŋ me wain me niptêkwi me gêŋ amboac tonaŋ ŋagêdô ŋa nê ŋakwê naŋ, oc gêŋ tau êtu dabuŋ me masi.’ ” Ma dabuŋwaga sêjô biŋ tau gebe “Masi.” 13 Go Hagai kêsôm gebe “Mago ŋac teŋ, taŋ gêmoa gêwiŋ ŋacmatê teŋ ma geseŋ nê dabuŋ su naŋ, embe eŋ êmoasac gêŋ amboac tonaŋ ŋateŋ naŋ, oc gêŋ tau ŋatêmui êsa e êtu da êtiam me masi.” Dabuŋwaga sêjô biŋ tau gebe “Oc selec atom.” 14 Go Hagai kêsôm gebe” Apômtau kêsôm gebe Lau tonaŋ nêŋ biŋ amboac tonaŋ. Aê galic gôlôacmôkê têtôm tonaŋ. 15 Mago galoc taêm ênam ŋapep ma ajop gêŋ, taŋ mêŋêsa ênac m êndêŋ bêc tonec ma elom-elom êna. Gêdêŋ taŋ adênaŋ poc teŋ gêsac poc teŋ ŋaô aŋga Apômtaunê lôm dabuŋ atomgeŋ naŋ, amac amoa amboac ondoc. 16 Ŋac teŋ gêô lasê polom ŋatoŋ, taŋ gêjac talu 20 ŋawae naŋ, mago kêtap polom talu 10 geŋ sa. Teŋ gêô lasê sêpip wain ŋamala gebe êkôc gasuc 50, mago kêtap 20 geŋ sa. 17 Apômtau kêsôm gebe Aê gajac amac to nêm gêŋ kômŋa ŋa buŋ to gwa ma kompoc. Gêŋ samob, taŋ amac ajam kôm kêpi naŋ, mago amac amu adêŋ aê amêŋ atom. 18 Ajop ŋapep, anac m êndêŋ bêc tonec. Bêc tau ajôŋ 9 ŋabêc 24. Akêŋ Apômtaunê lôm dabuŋ ŋanombaŋ gêdêŋ bêc tau. Ajop ŋapep gebe 19 gêŋ ŋawê oc ê su aŋga andu ajac gêŋ saŋa me masi. Ma wain to jambô ma nip to katêkwi oc ŋanômê me masi. Ocsalô aê gajac m gebe janam mec.”
Apomtau gêjac mata biŋ gêdêŋ Serubabel
20 Gêdêŋ bêc 24 tonaŋgeŋ Apômtaunê biŋ gêdêŋ Hagai kêtu luagêcŋa amboac tonec gebe 21 “Ôsôm êndêŋ gôliŋwaga Judaŋa Serubabel gebe Aê gabe jawiwic undambê to nom 22 ma japô kiŋnêŋ lêpôŋ ênduc to janseŋ tenteŋlatu nêŋ gamêŋ ŋaclai su. Aê oc japô nêŋ kareta to êsêac, taŋ sêkô ŋaô naŋ, ênduc ma nêŋ hos to lau, taŋ sêŋgôŋ hos ŋaô naŋ, sêu tauŋ ma senseŋ tauŋ su sênaŋa. 23 Lausiŋ undambêŋa nêŋ Apômtau kêsôm gebe Êndêŋ bêc tonaŋ aê oc jakôc ŋoc sakiŋwaga aôm Sealtiel latu Serubabel gebe jakôc aôm gebe ôtu gôliŋwaga ônam aê laŋôc gebe aê kajaliŋ aôm sa.” Lausiŋ undambêŋa nêŋ Apômtau kêsôm biŋ tonaŋ.