6
Lau Israel sêku malac Jeriko tulu
1 Ma lau Jeriko sêbalaŋ nêŋ malac auc ŋapep kêtu lau Israelŋa. Lau teŋ sêsô-sêsa atom.
2 Ma Apômtau kêsôm gêdêŋ Josua gebe “Ôlic acgom, aê kakêŋ Jeriko to ŋakiŋ ma siŋwaga toŋaclai sêsêp aôm lêmam.
3 Amboac tonaŋ amac siŋwaga samob asêlêŋ aŋgi malac tau auc êtu dim tageŋ. Ma aŋgôm amboac tonaŋ êtôm bêc 6.
4 Ma dabuŋwaga 7 sêkôc dauc 7 sêsêlêŋ sêmuŋ katapa poacŋa. Ma êndêŋ bêc êtu 7ŋa amac asêlêŋ aŋgi malac auc êtu dim 7 ma dabuŋwaga sênac dauc êtaŋ.
5 Ma êsêac embe sênac dauc êtaŋ ê tôŋ baliŋgeŋ, ma amac embe aŋô dauc êtaŋ amboac tonaŋ, go lau samob sênam lasê toaligeŋ ma malac ŋatuŋbôm êku sa ma lau samob gacgeŋ sembo sêsa malaclêlôm sêna.”
6 Amboac tonaŋ Nun latu Josua kêkalem dabuŋwaga ma kêsôm gêdêŋ êsêac gebe “Aôc katapa poacŋa sa ma dabuŋwaga 7 sêkôc dauc 7 ma sêsêlêŋ sêmuŋ Apômtaunê katapa poacŋa.”
7 Ma eŋ kêsôm gêdêŋ lau gebe “Ajôc, asêlêŋ aŋgi malac auc ma siŋwaga tolaukasap sêsêlêŋ sêmuŋ Apômtaunê katapa.”
8 Ma lau sêgôm biŋ, taŋ Josua kêjatu naŋ, ŋanô kêsa. Dabuŋwaga 7 sêkôc dauc 7 ma sêsêlêŋ sêmuŋ sêmoa Apômtau laŋônêmŋa. Êsêac sêjac dauc kêtaŋ ma Apômtaunê katapa poacŋa kêsêlêŋ kêdaguc êsêac.
9 Ma siŋwaga tolaukasap sêsêlêŋ sêmuŋ dabuŋwaga, taŋ sêjac dauc kêtaŋ ŋapaŋ.
10 Ma Josua kêjatu lau gebe “Anam lasê atom, anam taôm tôŋgeŋ, asôm biŋ teŋ êsa awemsuŋ atom e êndêŋ bêc aê jasôm êndêŋ amac gebe Anam lasê, go anam lasê.”
11 Amboac tonaŋ eŋ kêsakiŋ Apômtaunê katapa kêgi malac tau auc kêtu dim tageŋ. Su, go sêô lasê gamêŋ becoboŋa kêtiam ma sêc bêc aŋga tonaŋ.
12 Gêdêŋ bêbêc kanucgeŋ Josua gêdi sa ma dabuŋwaga sêbalaŋ Apômtaunê katapa.
13 Ma dabuŋwaga 7 sêkôc dauc 7 sêsêlêŋ sêmuŋ Apômtaunê katapa ma sêjac dauc ŋapaŋ. Ma siŋwaga tolaukasap sêsêlêŋ sêmuŋ êsêac ma lau ŋagêdô têdaguc Apômtaunê katapa, ma dauc kêtaŋ ŋapaŋ.
14 Ma gêdêŋ bêc kêtu luagêcŋa êsêac sêsêlêŋ sêgi malac auc kêtu dim tageŋ amboac tonaŋgeŋ ma sêmu sêja gamêŋ becoboŋa. Sêgôm amboac tonaŋ kêtôm bêc 6.
15 Gêdêŋ bêc kêtu 7ŋa êsêac dêdi gêdêŋ geleŋ mata ma sêsêlêŋ sêgi malac auc amboac sêgôm-sêgôm kêtu dim 7. Gêdêŋ bêc tageŋ tonaŋgeŋ tec êsêac sêsêlêŋ sêgi malac auc kêtu dim 7.
16 Ma gêdêŋ taŋ sêgi malac auc kêtu dim 7ŋa ma dabuŋwaga sêjac dauc kêtaŋ naŋ, Josua kêsôm gêdêŋ lau gebe “Anam lasêmaŋ, gebe Apômtau kêkêŋ malac tau gêdêŋ amac.
17 Ma malac to ŋagêŋ samob êtu Apômtaunê gêŋ enseŋ suŋa. Mockaiŋo Rahab to nê lau samob, taŋ sêmoa sêwiŋ eŋ aŋga ênê andu naŋ, tauŋgeŋ go sêmoa mateŋ jali, gebe eŋ gêsa lau jaeŋŋa, taŋ aêac tasakiŋ êsêac naŋ auc.
18 Ma amac ajop taôm êndêŋ gêŋ, taŋ gêjac anseŋ suŋa ŋawae. Matem katu gêŋ tau e akôc ŋagêdô, taŋ kêtu Apômtaunê naŋ, su atom. Embe aŋgôm, go lau Israel nêŋ gamêŋ becoboŋa êwê kaiŋ biŋ, taŋ êtap malac Jeriko sa naŋ, êwiŋ ma êtap gêŋwapac ŋanô sa.
19 Ma silber to gold samob ma laclu, taŋ sêmasaŋ ŋa ki kokoc to jejec naŋ, êtu Apômtaunê gêŋ dabuŋ naêsêp Apômtaunê kanom.”
20 Amboac tonaŋ lau sêjam lasê ma sêjac dauc kêtaŋ. Gêdêŋ taŋ lau sêŋô dauc kêtaŋ naŋ, sêjam lasê ma tuŋbôm kêku sa, ma lau sêpi malac sêja. Lau samob gacgeŋ sebo sêsa malac sêja ma sêku malac tau tulu.
21 Go seseŋ malac samucgeŋ su. Êsêac seseŋ ŋac to awê ma lau matac to lau ŋanô, seseŋ bulimakao to domba ma doŋki. Êsêac seseŋ gêŋ samob su ŋa siŋ ŋamata.
22 Ma Josua kêsôm gêdêŋ ŋaclagêc, taŋ sêkêŋ keleŋ gamêŋ naŋ, gebe “Asô awê mockaiŋo nê andu ana ma akôc awê tau to nê lau samob, taŋ sêmoa sêwiŋ eŋ naŋ, sêsa sêmêŋ amboac atôc lemem gêdêŋ eŋ naŋ.”
23 Amboac tonaŋ ŋac wakuc luagêc tau, taŋ sêkêŋ keleŋ gamêŋ naŋ, sêsô andu sêja ma sêkôc Rahel to têna agêc tama ma lui to nê lau samob, taŋ sêŋgôŋ sêwiŋ eŋ naŋ, sêsa sêmêŋ. Êsêac sêkôc ênê lau samob ma sêkêŋ êsêac sêŋgôŋ lau Israel nêŋ gamêŋ becoboŋa ŋamagê.
24 Ma êsêac sêkêc malac to ŋagêŋ samob ja geŋ. Tageŋ silber to gold ma ku, taŋ sêmasaŋ ŋa ki kokoc to jejec naŋ, sêkêŋ jakêsêp kanom, taŋ kêkô Apômtaunê andu naŋ.
25 Josua gêjam awê mockaiŋo Rahab to tamanê gôlôac ma nê lau samob, taŋ sêwiŋ eŋ naŋ sa. Eŋ gêŋgôŋ lau Israel ŋalêlôm e mêŋgêdêŋ galoc, gebe eŋ gêsa lau jaeŋ, taŋ Josua kêsakiŋ gebe sêkêŋ keleŋ malac Jeriko naŋ auc.
26 Gêdêŋ têm tonaŋ Josua kêjatu lau gebe têtôc lemeŋ sêkô Apômtau laŋônêmŋa ma kêsôm gebe “Aêac tapuc boa ŋac, taŋ êndi mêŋêkwê malac Jeriko tonec sa êtiam naŋ.
Eŋ ênac da alê ŋamataŋa ŋa nê ŋacsêga.
Ma ênac da malac ŋakatam ŋa nê ŋac sauŋ.”
27 Amboac tonaŋ Apômtau gêwiŋ Josua ma ênê wae gêjam gamêŋ samucgeŋ auc.