2
1 “Ajôc, amac dabuŋwaga, ŋagôliŋ tau tonec kêkanôŋ amac.
2 Lausiŋ undambêŋa nêŋ Apômtau kêsôm gebe Amac embe akêŋ taŋem atom ma embe taêm ênam gebe atoc aêŋoc ŋaê sa atom, go japuc boa amac. Ma janam amacnêm mec ôkwi êtu gêŋ japuc boaŋa teŋ. Biŋŋanô, aê gajam nêm mec ôkwi su gebe amac akêŋ taŋem aêŋoc biŋsu atom.
3 Alic acgom, aê jandim amac lemem êŋgic, ma japalip amacnêm bôc daŋa nêŋ tac êpi amac laŋômanô ma jatiŋ amac su aŋga laŋôcnêmŋa.
4 Go amac ajala gebe aê kasakiŋ biŋsu tonaŋ kêtu amacŋa gebe aêŋoc poac, taŋ kamoatiŋ gawiŋ Lewi naŋ, êtu tôŋ. Lausiŋ undambêŋa nêŋ Apômtau kêsôm biŋ tonaŋ.
5 Ŋoc poac gêdêŋ Lewi gebe eŋ êmoa mata jali to êwê kaiŋ biŋmalô ma eŋ etoc aê sa to êtêc ŋoc ŋaê.
6 Eŋ kêdôŋ aêŋoc lêŋ tobiŋŋanôgeŋ ma biŋ keso teŋ kêsa ênê awa atom. Eŋ kêsa nê lêŋ gêwiŋ aê towama ma tobiŋgêdêŋgeŋ to gêjam lau taêsam ôkwi aŋga nêŋ lêŋ sec.
7 Têndôŋ lau sêjala Anôtô ŋanôŋa gêjac dabuŋwaga ŋawae. Lau dêndêŋ êsêac sêna gebe sêŋô ŋoc ŋalêlôm gebe êsêac têtu Apômtau ŋaniniŋ nê jaeŋwaga.
8 Mago amac dabuŋwaga ao sic aŋga intêna gêdêŋ. Ma biŋ, taŋ amac adôŋ naŋ, gêgôm lau taêsam sebeŋ. Amac ajac poac, taŋ kamoatiŋ gawiŋ amac naŋ popoc. Lausiŋ undambêŋa nêŋ Apômtau kêsôm biŋ tonaŋ.
9 Amboac tonaŋ aê kakêŋ lau samob sêpêc gêdôŋ amac to sêlic amac amboac gêŋ ŋaôma gebe amac adaguc ŋoc biŋ, taŋ kakêŋ naŋ, atom ma embe andôŋ aêŋoc lau, go amac apuc êsêac ŋamgeŋ.”
Lau Israel nêŋ kwalec
10 Aêac samob nêŋ tameŋi tageŋ atom. Ma Anôtô tageŋ kêkêŋ aêac atom me. Kêtu asageŋŋa aêac tajac biŋ, taŋ tajac mata gêdêŋ tauŋ naŋ gêŋgic. Ma kêtu asageŋŋa aêac tasu poac, taŋ Anôtô kêmoatiŋ gêdêŋ nêŋ mimi naŋ susu.
11 Lau Juda sêjac biŋ, taŋ sêjac mata gêdêŋ Anôtô naŋ, popoc ma sêgôm gêŋ alôb-alôb aŋga Israel to Jerusalem. Êsêac sêjaiŋ lôm dabuŋ, taŋ Apômtau têtac gêwiŋ naŋ. Ŋacwaga sêjam lauo, taŋ sêjam sakiŋ anôtôi jaba naŋ.
12 Apômtau enseŋ ŋac, taŋ gêgôm gêŋ amboac tonaŋ naŋ, sumaŋ ma eŋ êwê kaiŋ aêacnêŋ lau, taŋ sêkêŋ da gêdêŋ lausiŋ undambêŋa nêŋ Apômtau naŋ, êtiam atom.
13 Ma gêŋ tonec amac agôm amboac tonaŋgeŋ. Amac agadê Apômtaunê altar ŋa matemsulu to nêm taŋi ma nêm oliŋ gebe eŋ êkôc da, taŋ akôc amêŋ naŋ, sa kêtiam atom.
14 Ma amac atu kênac gebe “Kêkôc sa atom kêtu ageŋŋa.” Ŋam gebe amac asap biŋ, taŋ ajac mata gêdêŋ lauo naŋ, ajam gêdêŋ amac ŋapalêgeŋ naŋ popoc. Eŋ kêtu nêm kêpuctôŋo ma aôm kôsap biŋ, taŋ gôjac mata gêdêŋ eŋ naŋ tulu. Biŋ taŋ gôjac mata kôkô Anôtô laŋônêm gebe ôsap eŋ tôŋ naŋ.
15 Anôtô gêgôm amagêc nêm awê atu ôli to katu tageŋ atom me. Ma eŋ gêgôm tonaŋ kêtu ŋam ondocŋa. Ŋam gebe amagêc atap gôlôac, taŋ têtu Anôtônê ŋapalê ŋanôgeŋ naŋ sa. Amboac tonaŋ ajop taôm gebe nêm teŋ êwi nê awê, taŋ gêjam gêdêŋ eŋ ŋac matacgeŋ naŋ, siŋ atom.
16 Apômtau Israelnêŋ Anôtô kêsôm gebe “Aê gadec mêtê awê to ŋac sêwi tauŋ siŋŋa. Aê têtac sec embe amacnêm teŋ êŋgôm mêtê sec tonaŋ êndêŋ nê awê. Amboac tonaŋ ajop taôm gebe anac biŋ, taŋ ajac mata naŋ, popoc atom ma asap nêm lauo tôŋ.”
Bêc mêtôcŋa kêdabiŋgac
17 Amac asakam Apômtau ŋa nêm biŋ. Mago amac asôm gebe “Aêac agôm eŋ ôli ŋakam kêsa ŋa asageŋ.” Agôm ŋa biŋ tonec gebe “Lausiŋ undambêŋa nêŋ Apômtau gêlic lau, taŋ sêgôm sec naŋ ŋajam. Ma eŋ têtac ŋajam kêtu êsêacŋa.” Ma amac atu kênac biŋ teŋ gebe “Anôtô taŋ oc êmêtôc biŋ naŋ, gêmoa ondoc.