110
Apômtau agêc nê kiŋ, taŋ geŋ oso eŋ naŋ
1 Apômtaunê biŋ gêdêŋ ŋoc Apômtau gebe
“Mêŋôŋgôŋ aêŋoc anôŋa
e jakêŋ nêm ŋacjo
sênêc amkaiŋ ŋalabu acgom.”
2 Apômtau êkêŋ nêm gôliŋ ŋaclai esewec aŋga Sion ma êsa êna êtu tapa.
Ônam gôliŋ nêm ŋacjo.
3 Êndêŋ bêc, taŋ aôm ônac nêm ŋacjo naŋ,
nêm lau sêwiŋ aôm sênac ŋawaegeŋ.
Êtôm nop êpoac bêbêc kanucgeŋ
aômnêm lau mata sêwac êndêŋ aômnêm lôc dabuŋ.
4 Apômtau kêtôc lêma sa su
ma oc enseŋ nê biŋ atom gebe
“Aôm kôtu ŋac dabuŋsêga ômoa teŋgeŋŋa
kôtôm Melkisedek tau.”
5 Apômtau kêkô aômnêm anôŋa.
Êndêŋ ênê bêc têtac ŋandaŋŋa oc êku kiŋ samob tulu.
6 Eŋ oc êmêtôc tenteŋlatunêŋ biŋ ma êkêŋ nêŋ ŋacmatê sênam gamêŋ auc.
Eŋ ênac lau môkêŋ êkôc aŋga gaboaŋ tapa.
7 Kiŋ oc ênôm bu, taŋ kêpoac gêdêŋ intêna ŋatali naŋ,
amboac tonaŋ tec êsa môkêapac sageŋ.