118
Gôlôac sêlic om ŋawê daŋgeŋa
1 Anam daŋge êndêŋ Apômtau gebe eŋ ŋac gabêjam.
Biŋŋanô ênê moasiŋ ênêc endeŋ tôŋgeŋ.
2 Israel sêsôm lasê amboac tonec gebe
“Biŋŋanô, ênê moasiŋ ênêc endeŋ tôŋgeŋ.”
3 Aronnê gôlôac sêsôm lasê amboac tonec gebe
“Biŋŋanô, ênê moasiŋ ênêc endeŋ tôŋgeŋ.”
4 Lau-têtêc-Anôtôwaga samob sêsôm lasê amboac tonec gebe
“Biŋŋanô, ênê moasiŋ ênêc endeŋ tôŋgeŋ.”
5 Aê kapô lêna ma aoc gêjac Apômtau,
tec Apômtau kêkêŋ taŋa aê ma gajam aê sa.
6 Aê katêc tauc atom gebe Apômtau gêwiŋ aê
ŋamalac oc sêŋgôm asageŋ êndêŋ aê.
7 Apômtau gêwiŋ aê, oc ênam aê sa
ma jaku ŋoc ŋacjo tulu.
8 Daê lamu Apômtau
ŋajam kêlêlêc taêŋ kêka ŋamalac su.
9 Daê lamu Apômtau
ŋajam kêlêlêc taêŋ kêka ŋamalacnêŋ laumata su.
10 Tenteŋlatu samob sêgi aê auc,
mago aê gaseŋ êsêac su gajam Apômtau laŋô.
11 Sêgi aê auc e kêsô tau,
mago aê gaseŋ êsêac su gajam Apômtau laŋô.
12 Êsêac sêgi aê auc amboac banic, mago ja kêkwanam êsêac su amboac oba,
mago aê gaseŋ êsêac su ŋa Apômtaunê ŋaclai.
13 Êsêac têtuc aê ŋajaŋa gebe jambeŋ,
mago Apômtau gêjam aê sa.
14 Apômtau kêtu ŋoc ŋaclai to ŋoc ŋac kalanem-eŋwaga.
Eŋ kêtu ŋoc kêsiwaga.
15 Wêsiŋ toôndu kêpi aŋga lau gêdêŋ nêŋ bec.
Apômtau lêma anôŋa gêgôm gêŋsêga ŋaclai.
16 Apômtaunê lêma anôŋa kêsip ŋamalac sa.
Apômtaunê lêma anôŋa gêgôm gêŋsêga ŋaclai.
17 Aê oc jamac êndu atom, jaŋgôŋ matoc jali
ma jasôm Apômtaunê ŋaê lasê.
18 Apômtau gêjac aê matocgasi aucgeŋ,
mago gêlôc gebe jamac êndu atom.
19 Alêc lôm dabuŋ tau ŋakatam su êndêŋ aê.
Aê gabe jasô najanam daŋge êndêŋ Apômtau.
20 Apômtaunê sacgêdô tonec
gêjac lau gêdêŋ tauŋgeŋ ŋawae.
21 Aê gajam daŋge aôm gebe kôkêŋ taŋam aê
ma kôtu ŋoc kêsiwaga.
22 Poc, taŋ sêkwêwaga sêbaliŋ siŋ naŋ,
tec kêtu poc kêclêsuŋa.
23 Gêŋ tonaŋ Apômtau gêgôm,
tec mateŋanô talic amboac gêŋsêga.
24 Bêc tau tonaŋ Apômtau kêkêŋ.
Aweŋ êôc toôndu ma ôliŋ êpi-êpigeŋmaŋ.
25 O Apômtau, ônam aêacmêŋ sa.
O Apômtau, ôkêŋ aêac atap koleŋ ŋanô sa.
26 Aweŋ êôc ŋac, taŋ gêmêŋ gêjam Apômtau laŋô.
Aêac anam mec amac aŋga Apômtaunê andu.
27 Apômtau eŋ Anôtô, eŋ kêkêŋ ŋawê gêdêŋ aêac.
Atê wê tolêsôgeŋ ma anam gêlôŋ altar ŋajabo.
28 Ŋoc Anôtô aôm, aê gabe janam daŋge êndêŋ aôm.
Ŋoc Anôtô aôm, aê gabe jatoc aôm sa.
29 Anam daŋge êndêŋ Apômtau gebe eŋ ŋac gabêjam.
Biŋŋanô, ênê moasiŋ ênêc endeŋ tôŋgeŋ.