146
Talanem Apômtau êtu ênê kôm gêdêŋŋa
1 Aleluja.
O katuc tau, ôlanem Apômtau.
2 Aê gabe jalanem Apômtau êtôm ŋoc bêc samob, taŋ gaŋgôŋ matoc jali naŋ,
ma gabe janam wê êndêŋ ŋoc Anôtô êtôm ŋoc têm, taŋ jamoa nom naŋ.
3 Taêm êka laumata to ŋamalac teŋ
gebe êsêac têtôm gebe sênam lau sa atom.
4 Aweŋjaô embe ênac pep, oc têtu kekop êtiam
ma nêŋ biŋ, taŋ taêŋ gêjam naŋ, oc ênac pep amboac tonaŋgeŋ.
5 Aê aoc êôc ŋac, taŋ Jakobnê Anôtô gêjam eŋ sa
ma kêkêŋ mata Apômtau Anôtôgeŋ naŋ.
6 Ŋac tonaŋ tec kêkêŋ undambê to nom ma gwêc to ŋagêŋlêlôm samob.
Eŋ ŋac ŋaŋêŋ endeŋ tôŋgeŋ.
7 Ênê mêtôc gêdêŋ gêjam êsêac, taŋ lau sêkôniŋ êsêac tôŋ naŋ sa
ma gêlôm êsêac, taŋ mo gêjô êsêac naŋ. Apômtau kêgaboac lau kapoacwalôŋa su.
8 Apômtau kêkêŋ mateŋpec sêlic gamêŋ kêtiam ma kêsa lau, taŋ sêpô dêducgeŋ naŋ sa.
Apômtau têtac gêwiŋ lau gêdêŋ.
9 Apômtau gejob lau jaba ma gêjam awêtuc to mosêbu sa.
Mago eŋ geseŋ lau alôb-alôb nêŋ intêna su.
10 Apômtau eŋ kiŋ teŋgeŋŋa.
O Sion, aômnêm Anôtô ênam gôliŋ endeŋ tôŋgeŋ.