55
Ŋac teŋ keteŋ nê mec kêtu nê ŋac jabaŋ kêkac tau su aŋga ênê
O Anôtô, ôkêŋ taŋam ŋoc mec
ma ôsiŋ taôm êndêŋ ŋoc taŋiboa atom.
Ôŋô aê ma ôjô aêŋoc biŋ.
Aê gaeŋ oliŋ tauc ma gao toŋoc gêŋwapacgeŋ,
kêtu ŋacjonêŋ ŋaonda
ma kêtu lau, taŋ sêkac tauŋ su aŋga Anôtônê nêŋ ŋaôndu,
gebe êsêac sêgôliŋ gêŋwapac kêpi aê
ma sêkêŋ kisa aê ŋawaôboa.
 
Ŋoc ŋalêlôm ŋatutuc ŋasec gêc ŋoc waŋlêlôm.
Gêmacanô gêgôm aê katakê e gêjac ŋoc lênô auc.
Katakê e katênêp
to ôliclu gêbuc.
Aê kasôm gebe “Ojae, balôsimagê ênêc aêmamaŋ
gebe jalôp sa jaêc gêŋ tonec su najalêwaŋ tauc jamoa ŋoc ŋasawa teŋ.
Oc jaêc baliŋgeŋ jana,
jalêwaŋ tauc jaŋgôŋ ŋoc gamêŋ sawa tau.
Oc jaêc jana ŋoc gamêŋ kêsiŋ teŋ
gebe mu-gêbuc to gamêŋ-kêlaŋgaŋ ê aê tôŋ atom.”
O Apômtau, onseŋ êsêac su ma ôwa êsêac nêŋ biŋ êŋgic
gebe galic sêgôm gêŋ ŋaclai to sêkac tauŋ kêkôc aŋga malac.
 
10 Êsêac sêgi malac kêtôm bêc to geleŋgeŋ sêsêlêŋ sêmoa ŋatuŋbôm ŋaô
ma gêŋ keso to biŋwapac gêjam malac auc.
11 Ŋaclai sec gêjam gamêŋ auc.
Ma sêkôniŋ lau to sêsau biŋdansaŋ aŋga malacluŋ.
 
12 Ŋacjo embe êsu aê susu
oc jaôc gêŋwapac tonaŋ.
Embe ŋoc soŋo-soŋo êkiaŋ tau sa êndêŋ aê
oc jasiŋ tauc ôkwi.
13 Mago aôm, taŋ kôtôm aê naŋ,
aôm ŋoc ŋac jabaŋ aê to ŋoc ŋac, ôlim andaŋ aêŋa gôgôm gêŋ tau.
14 Aêagêcnêŋ biŋ gelom tau e ŋapep
ma tawê toôndugeŋ dawiŋ tauŋ dadêŋ Anôtônê andu taja.
15 Ojae, ŋoc ŋacjo sêmac sênaŋamaŋ ma sêsêp lamboam tomateŋ jaligeŋ sênamaŋ
gebe biŋ alôb-alôb gêjam nêŋ andu to nêŋ ŋalêlôm auc.
 
16 Aê tec gamôêc gêdêŋ Apômtau
ma Apômtau oc ênam aê kêsi.
17 Aê gabe jateŋ to janiŋ oliŋ tauc êndêŋ êtula ma eleŋŋa to ocsalô
ma oc êkêŋ taŋa aê aoc.
18 Eŋ oc ênam katuc kêsi gebe êmoa tomalô ec êsêac mêŋtêtu gasuc aê atom
gebe êsêac, taŋ sebe senseŋ aê naŋ, taêsam ŋalêlêma atom.
19 Anôtô taŋ gêŋgôŋ nê lêpôŋ gêdêŋ andaŋgeŋanô naŋ,
oc êkêŋ taŋa aê ma êkôniŋ êsêac tôŋ.
Êsêac têtêc Anôtô atom
ma sênam tauŋ ôkwi atom amboac tonaŋgeŋ.
 
20 Aêŋoc ŋac, taŋ gêmuŋgeŋ ôli andaŋ aê naŋ, lêma kêpi tau nê lau.
Eŋ gêjac nê poac popoc.
21 Awasuŋ geŋ oso biŋ e ŋawasi kêtôm bôc ŋalêsi,
mago biŋ tau ŋamata kêtôm siŋ.
Eŋ kêbanac biŋ ŋajam-ŋajamgeŋ kêlêlêc niptêkwi su,
mago kêtôm têdaiŋ siŋ gebe sênac.
 
22 Ôkac nêm gêŋwapac tolagic su êndêŋ Apômtau, eŋ oc ênam aôm sa.
Eŋ oc êkêŋ ŋac gêdêŋ êku atomanô.
 
23 Biŋŋanô, o Anôtô, aôm oc ôku êsêac tulu
ma sêsêp sê ŋadimlabu sêna.
Lau taŋ sêwê kaiŋ dec to biŋdansaŋ naŋ, oc sêmac êndu ŋatêkwa galigeŋ.
Ma aê tec taêc kêka aômgeŋ.
*
* 55:23 Dawidnê wê têŋ.