69
Mec Anôtô ênam saŋa
O Anôtô, ônam aêma samaŋ
gebe bu gênôm aê auc e gabe janaŋa.
Aê malocmê kasêp lemoŋ gôlub-gôlub gaja. Gamêŋ teŋ kêtôm gebe jaka tôŋŋa gêc atom.
Aê katap bugaboaŋ sec sa ma ŋasamac kêkôm aê auc.
Kataŋ tauc e tekoc gêbac ma ŋoc koclabeŋ kêtu dambê-dambê laŋgwageŋ.
Aê gaôŋ to kakêŋ matoc Anôtô e matocanô ŋabob kêsa.
 
Lau taŋ têntac gedec aê kêtu ŋam teŋŋa atom naŋ, taêsam ŋasec,
sêlêlêc môkêclauŋ môkêcapacŋa su.
Lau taŋ sebe senseŋ aê su naŋ, ŋaclai sec
ma êsêac sêgôliŋ biŋ kêpi aê. Êsêac sêkac aê gebe jakêŋ gêŋ êjô gêŋ, taŋ gajam geŋgeŋ atom naŋ.
O Apômtau, aôm kôjala ŋoc keso
ma ŋoc geo kêsiŋ tau gêdêŋ aôm atom.
O Anôtô, taŋ kôtu lausiŋ undambêŋa nêŋ ŋatau naŋ,
ôkêŋ aê gebe jaŋgôm lau, taŋ mateŋ gê aôm naŋ, majeŋ êsa atom.
O Israelnêŋ Anôtô,
ôkêŋ aê gabe jaŋgôm lau, taŋ sêsap aôm tôŋ naŋ, waeŋ sec atom,
gebe aê gaôc gêŋwapac sec kêtu aôm ŋa.
Majoc e tecbeloc ŋawapac kêsa kêtu aômŋa.
Ŋoc lasitêwai sêlic aê amboac ŋac jaba
ma tinocnê lau sêlic aê amboac ŋac gamêŋbômŋa teŋ.
 
Gebe gaim tauc su nêm anduŋa e katu meloc su.
Ma lau, taŋ sêmbu aômŋa naŋ, nêŋ biŋ sêmbuŋa mêŋkêpi aê gêwiŋ.
10 Aê katu kasec ôlic gebe kataŋ to gajam dabuŋ mo,
mago lau sêsu aê susu.
11 Aê ganôŋ kaukauc kêtu ŋoc ŋakwê
ma êsêac sêga wê susuŋa kêpi aê.
12 Lau embe sêŋgôŋ malacluŋ naŋ, oc sênam aêŋoc biŋ êtu biŋgalôm
ma lau, taŋ bu kêjaŋiŋ êsêac naŋ, sêga wê sec kêpi aê.
 
13 O Apomtau, aê tec jansuŋ ŋoc mec êndêŋ aôm.
O Anôtô, ôjô ŋoc mec êndêŋ noc, taŋ aôm gôlic ŋajam naŋ.
Ôjô aê aoc êtu nêm têmtac gêwiŋ teŋgeŋŋa,
êtu ôŋgôm nêm biŋ, taŋ gôjac mata naŋ, ŋanô êsa.
14 Ôkam aê sa aŋga lemoŋ gebe gôdubub jasêp e najanaŋa atom.
Ônam aê sa aŋga ŋoc ŋacjo nêŋ, ma aŋga bu ŋagêdim êwiŋ.
15 Ôkêŋ ŋasamac ênsalê aê auc atom.
Ma ôkêŋ aê janôm bu su jasêp gêdimbob me janêc êsêp sê jana atom.
 
16 O Apômtau, ôkêŋ taŋam aê gebe nêm têmtac gêwiŋ teŋgeŋŋa tau ŋajam.
Ôkac taôm ôkwi êndêŋ aê êtu nêm taêm labu ŋanôŋa.
17 Ôsiŋ laŋôm ôkwi êndêŋ nêm sakiŋwaga atom.
Aê gamoa jageo, ôjô aêŋoc biŋ galocgeŋ.
18 Ôndêŋ aê ômôêŋ ma ônam aê kêsi.
Ôsa aê laŋôc sa êndêŋ ŋoc ŋacjo.
 
19 Aôm gôlic aêŋoc biŋ, taŋ sêgôm aê êndu-êndugeŋ to gaŋgôŋ jageo ma sêgôm aê katu meloc naŋgac.
Aôm kôjala ŋoc soŋo-soŋo samobgac.
20 Sêsu aê susu e katuc gêbac to popocgeŋ,
tec gamoa jageo ŋanô.
Kasaê gebe sê malô aê elêmê
ma kakêŋ matoc gebe sênam aê sa e masi.
21 Êsêac sêkêŋ ŋaikisi aê gaeŋ kêtu mo
ma gêdêŋ taŋ bu gêjô aê naŋ, sêkêŋ bu ŋamakic gêdêŋ aê ganôm.
22 Nêm moasiŋ êtu nêŋ lakô
ma nêŋ moasiŋ daŋa êtu naŋ sê sêu tauŋ êsêpŋa.
23 Ôkêŋ êsêac mateŋanô êtu kanuc sêlic gamêŋ atom
ma ôkêŋ êsêac magiŋ êsu.
24 Ôkêc nêm têmtac ŋandaŋ êpi êsêac
ma nêm ŋalêlôm ŋamondec-mondec êtap êsêac sa.
25 Nêŋ malac oc êtu gasaŋ ênêc
ma nêŋ andulêlôm êtu tuc êkô.
26 Gebe êsêac sêjanda ŋac, taŋ aôm taôm gôjac eŋ naŋ,
ma sêjam biŋgalôm kêpi lau, taŋ aôm gôjac êsêac ôliŋ lasê naŋ, naŋ ŋandaŋ.
27 Ônsalê nêŋ keso ŋagêjô ênsac nêŋ keso ŋagêdô ŋaô.
Ma ôkêŋ êsêac sêwê kaiŋ nêm moasiŋ ônam ŋamalac kêsiŋa atom.
28 Nêŋ ŋaê ênêc êwiŋ lau gêdêŋ nêŋ atom.
Senseŋ êsêacnêŋ ŋaê su aŋga buku mateŋ jaliŋa ŋalêlôm.
 
29 Aê tec gaŋgôŋ jageo ma gaôc gêŋwapac ŋanô.
O Anôtô, ôsip aê sa ma ônam aê kêsi.
30 Aê gabe jaŋga wê jaŋgôm Anôtônê ŋaê ŋawae êsa.
Janam daŋge to jatoc eŋ sa ŋanô.
31 Jaŋgôm amboac tonaŋ ec Apômtau êlic ŋajam êlêlêc bôc kapoac,
êlêlêc bulimakao kapoac to ŋajabo ma bôc, taŋ eŋkêku gêwa kêkôc naŋ su.
32 Lau taŋ sêôc gêŋ wapac naŋ, embe sêlic oc têntac ŋajam êsa.
Amac taŋ asom Anôtô amoa naŋ, nêm ŋalêlôm eŋgeŋ amac sageŋ.
33 Gebe Apômtau kêkêŋ taŋa lau ŋalêlôm sawa
ma kêliŋ nê lau, taŋ sêŋgôŋ kapoacwalô naŋ, siŋ atom.
 
34 Undambê to nom aweŋ êôc Anôtô.
Gwêc tau to ŋagêŋ mateŋ jali samob, taŋ gêmoa ŋalêlôm naŋ, amboac tonaŋgeŋ.
35 Gebe Anôtô oc ênam Sion kêsi ma êkwê malac Judaŋa sa êtiam
ma nê lau nasêŋgôŋ tônê ma têtu gamêŋ ŋatau.
36 Ênê sakiŋwaga nêŋ wakuc oc sêkôc sa êtu nêŋ gêŋlênsêm
ma êsêac, taŋ têntac gêwiŋ eŋ naŋ, oc sêŋgôŋ tônê.
*
* 69:36 Dawidnê teŋ.