95
Talambiŋ Anôtô to tanam sakiŋ eŋ ŋawê
1 Amêŋ, talambiŋ Apômtau.
Lasê êtaŋ to têntac ŋajam êndêŋ aêacnêŋ moasiŋmôkê.
2 Aêac todaŋgegeŋ dandêŋ eŋ tawac takô eŋ laŋônêm.
Tanam wê lambiŋŋa toaligeŋ.
3 Gebe Apômtau eŋ Anôtô kapôêŋ.
Eŋ kêtu anôtôi samob nêŋ kiŋsêga.
4 Eŋ gêjam gôliŋ nom ŋakêlêndiŋ
to lôc ŋatêpôê samob.
5 Eŋ kêtu-gwêc ŋatau gebe eŋ kêkêŋ.
Eŋ kêtu masaŋm ŋatau gebe eŋ kêlêsôb ŋa lêma.
6 Amêŋ, tawec ma tateŋ mec êndêŋ eŋ.
Tapôŋ aeŋduc êndêŋ Apômtau, taŋ kêkêŋ aêac naŋ,
7 gebe eŋ kêtu aêacnêŋ Anôtô ma aêac tatu ênê lau, taŋ eŋ gejob naŋ, ma domba, taŋ eŋ gêjam gôliŋ naŋ.
Ojae, êndêŋ ocsalô tonec akêŋ taŋem eŋ awamaŋ.
8 “Aŋgôm nêm ŋalêlôm ŋadani asa êtôm sêgôm aŋga Meriba,
ma êtôm sêgôm gêdêŋ bêc sêmoa gamêŋ sawa Masaŋa naŋ atom.
9 Gêdêŋ tonaŋ Tamemi sêsaê aê.
Aê gagôm ŋoc gêŋ ŋagêdô êsêac tauŋ sêlicgac, mago sêsaê aê.
10 Gôlôac tonaŋ sêgôm aê têtac kêbôli auc kêtôm jala 40 ma aê kasôm gebe’ Êsêac lau tonaŋ nêŋ kauc kêlêsa ŋapaŋ
ma êsêac sêkô tauŋ auc gêdêŋ aêŋoc lêŋ.’
11 Amboac tonaŋ têtac ŋandaŋ ma katôc lemoc kêtu tôŋ gebe
‘Êsêac oc sêsô aêŋoc gamêŋ sêniŋ aweŋŋa atomanô.’ ”