3
Rut agêc Boas sêmoa gamêŋ sêka polomŋa
1 Go Rut lawao laŋgwa Naomi kêsôm gêdêŋ eŋ gebe “Latucoenec, amboac ondoc aê oc jansom nêm malam ôŋgôŋ ŋajamŋa teŋ, gebe ômoa ŋajamgeŋ me.
2 Boas taŋ gôwiŋ ênê sakiŋwagao naŋ, aêacnêŋ lasitêwainêŋ teŋ eŋ. Ôlic acgom, êmbêc tonec eŋ oc ekoloŋ polom ŋapa aŋga gamêŋ sêka polomŋa.
3 Amboac tonaŋ ôliŋ bu to ôniŋ oso taôm ma ôsô nêm ŋakwê ŋajam tau, go ôsêp ôna gamêŋ sêka polomŋa. Mago ôtôc taôm ôndêŋ ŋac tau atom e êniŋ to ênôm gêŋ êmbacnê acgom.
4 Ma êndêŋ taŋ eŋ êsa tau sic naênêc naŋ, matam êndiŋ gamêŋ, taŋ eŋ gêc naŋ, naôkac belaŋke akaiŋŋa sa ma ôsa taôm sic. Go eŋ êsôm gêŋ, taŋ eŋ gebe êŋgôm naŋ, êndêŋ aôm.”
5 Ma awê tau gêjô Naomi awa gebe “Biŋ samob, taŋ kôsôm naŋ, oc jaŋgôm.”
6 Amboac tonaŋ eŋ kêsêp gamêŋ sêka polomŋa gêja ma gêgôm kêtôm biŋ, taŋ lawao laŋgwa kêsôm gêdêŋ eŋ naŋgeŋ.
7 Boas geŋ to gênôm gêŋ su, go gêmoa totêtac ŋajamgeŋ jakêsa tau sic gêc polom totoŋ ŋamagê. Go awê tau kêsêlêŋ sacgeŋ-sacgeŋ gêdêŋ eŋ gêja ma kêkac belaŋke akaiŋŋa sa, go kêsa tau sic gêc.
8 Gêdêŋ gêbêcauc ŋaluŋ, go ŋac tau kêtakê ma kêkac tau ôkwi e gêlic awê teŋ gêc eŋ akaiŋŋa.
9 Eŋ kêtu kênac gebe “Aôm asa.” Ma awê tau gêjô eŋ awa gebe “Nêm sakiŋwagao aê Rut. Ôlam nêm obo mêŋênsaŋ nêm sakiŋwagao, gebe aôm kôtu aêacma nom lênsêm ŋakêsiwaga.”
10 Ma eŋ kêsôm gebe “O latucoenec, Apômtau ênam mec aôm, gebe aôm gôgôm gêŋlêlôm gêdêŋ lau tolêlôm me lau ŋalêlôm sawa nêŋ ŋapalê wakuc atom. Biŋ tonec kêtu aôm têmtac gêwiŋ ŋanô ŋabelo kapôêŋ kêlêlêc belo ŋamataŋa su.
11 Latucoenec, amboac tonaŋ tec ôtêc taôm atom. Aê oc jaŋgôm gêŋ samob, taŋ oteŋ naŋ, gebe aêŋoc lau Betlehemŋa samob sêlicgac, gebe aôm awê mansaŋ teŋ.
12 Ma galoc, biŋŋanô, nêm nomlênsêm ŋakêsiwaga teŋ aê, mago nom lênsêm ŋakêsiwaga ŋanô teŋ gêmoa.
13 Ômoa êmbêc tonec ma êndêŋ bêbêcgeŋ eŋ embe ênam kôm, taŋ gêjac nom lênsêm ŋakêsiwaga ŋawae naŋ, oc ŋajam, êŋgômmaŋ. Mago eŋ embe endec ma ênam kôm tau atom, naŋgo aê janam kôm, taŋ gêjac nom lênsêm ŋakêsiwaga ŋawae naŋ. Aê jasôm biŋ êtu tôŋ êtôm Apômtau gêmoa mata jali. Ônêc bêc e eleŋŋa acgom.”
14 Go Rut gêc bêc gêc Boas akaiŋŋa e geleŋ mata, go eŋ gêdi gêdêŋ taŋ lau sêlic tauŋ sapu-sapu naŋ. Boas taê gêjam gebe awê tau gêc sêka polom ŋamala nec ŋapuc êsa atommaŋ,
15 tec kêsôm gebe “Ôkôc obo, taŋ kôgadê naŋ, mêŋôlam.” Ma Rut gêlam obo, go eŋ gêjam dôŋ polom laclu 6 jakêsêwa kêsêp obo tau ma kêkêŋ gêdêŋ awê tau gêôc sa ma gêc gêja malac.
16 Eŋ jagêô lasê andu ma lawao gêjam kênac eŋ gebe “Latucoenec, biŋ amboac ondoc.” Go Rut gêjac miŋ biŋ samob, taŋ ŋac tau gêgôm gêdêŋ eŋ naŋ,
17 ma kêsôm gebe “Polom laclu 6 tonec eŋ kêkêŋ gêdêŋ aê ma kêsôm gebe ‘Ôêc tolêmam sawageŋ ôndêŋ lawamo ôna atom.” ’
18 Rut lawao gêjô eŋ awa gebe “Latucoenec, ônsaê malôgeŋ e ôjala biŋ tau êtu katô acgom, gebe ŋac tonaŋ oc êwi biŋ tau siŋ atom, ocsalô oc êmansaŋ biŋ tau êtu solop.” lasitêwainêŋ awêtuc.