24
Dawid taê walô Saul
Saul kêjanda lau Pilisti su ma gêdêŋ taŋ gêmu gêja nê malac naŋ, êsêac sêjac miŋ gêdêŋ eŋ gebe Dawid gêmoa gamêŋ sawa Engedi. Amboac tonaŋ Saul kêkôc lau siŋ 3,000, taŋ kêjaliŋ êsêac sa aŋga lau Israel samob nêŋ naŋ, ma jagesom Dawid to nê lau aŋga pocdênaŋ Noniŋ gêbôm ŋagamêŋ kêsi oc kêpiŋa. Saul jagêô lasê pocgêsuŋ teŋ, taŋ gêc dombanêŋ sapa ŋaintêna ŋamagê naŋ. Eŋ kêsô gêja gebe ênam tau ôkwi. Dawid to nê lau sêsiŋ tauŋ sêŋgôŋ pocgêsuŋ tonaŋ ŋalêlôm. Go Dawidnê lau sêsôm gêdêŋ eŋ gebe “Galoc bêc tau, taŋ Apômtau kêsôm ŋabiŋ gêdêŋ aôm naŋ, gebe ‘Ôlic acgom, aê gabe jakêŋ nêm ŋacjo êsêp aôm lêmam gebe ôŋgôm êtôm aôm taêm ênam.’ ” Ma Dawid gêdi jakêsêbuŋ Saul nê ŋakwê baliŋ ŋalêsu su kelecgeŋ. Su, go Dawidnê ŋalêlôm kepeŋ eŋ kêtu kêsêbuŋ Saulnê ŋakwê baliŋ ŋalêsu gêŋgic. Ma eŋ kêsôm gêdêŋ nê lau gebe “Apômtau ênac jao aê gebe jaŋgôm ŋoc ŋatau, taŋ Apômtau geŋ oso eŋ naŋ, sec ma jakêŋ lemoc êpi eŋ, taŋ kêtu Apômtaunê ŋac geŋ oso eŋŋa.” Ma Dawid gêjam saic nê lau ŋa biŋ tonaŋ ma gêlôc gebe êsêac sênac Saul êndu atom. Ma Saul gêdi sa ma gêwi pocgêsuŋ tau siŋ kêsa gêja.
Ŋasawa sauŋgeŋ, go Dawid kêdaguc eŋ kêsa awê gêja amboac tonaŋgeŋ ma gêmôêc kêdaguc Saul ma kêsôm gebe “O ŋoc ŋatau kiŋ.” Saul kêkac tau ôkwi ma Dawid gewec laŋôanô gêdêŋ nom ma ketoc Saul sa. Ma Dawid kêsôm gêdêŋ Saul gebe “Aôm kôkêŋ taŋam lau, taŋ sêsôm gebe ‘Dawid gebe enseŋ aôm su’ naŋ, nêŋ biŋ kêtu ageŋŋa. 10 Bêc tonec aôm taôm gôlic ŋa matamanô gebe Apômtau kêkêŋ aôm kôsêp aê lemoc aŋga pocgêsuŋ. Ma lau ŋagêdô sêsôm gêdêŋ aê gebe janac aôm êndu. Mago aê gagôm atom. Aê kasôm gebe aê oc jakêŋ lemoc êpi ŋoc ŋatau atom gebe Apômtau geŋ oso eŋ. 11 O tamoc, ôlic nêm ŋakwê baliŋ ŋalêsu, tec gêc aê lemoc nec. Aê kasêbuŋ ŋakwê baliŋ ŋalêsu tonec su, mago gajac aôm êndu atom. Tonaŋ êkêŋ puc aôm ma aôm ôjala gebe aê taêc gêjam biŋ sec teŋ atom ma biŋ jali tauc sa êndêŋ aômŋa gêc ŋoc ŋalêlôm atom. Aê gagôm sec gêdêŋ aôm atom, mago aôm kôjanda aê gebe ônac aê êndu. 12 Apômtau êmêtôc aêagêcnêŋ biŋ. Apômtau êkêŋ ŋagêjô êndêŋ aôm êjô aê su. Mago aê lemoc êmoasac aôm atom. 13 Êtôm biŋgôliŋ laŋgwa kêsôm gebe ‘Ŋac alôb-alôb êŋgôm gêŋ alôb-alôb’, mago aêŋoc lemoc êmoasac aôm atom. 14 Israelnêŋ kiŋ gêmêŋ kêtu asaŋa. Kôjanda asa. Kôjanda kêam ŋamatê teŋ me. Me kôjanda tec teŋ me. 15 Amboac tonaŋ Apômtau êtu ŋacmêtôc ma êmêtôc biŋ, taŋ gêc aêagêc ŋasawa. Eŋ êtuc kêniŋ aêŋoc ŋam ma ênam aê kêsi aŋga aôm lêmam.”
16 Dawid kêsôm biŋ tonaŋ gêdêŋ Saul su, go Saul kasôm gebe “O latuc Dawid, aôm awam tonaŋ me.” Ma Saul gêu taŋiboa lasê ma kêtaŋ. 17 Ma kasôm gêdêŋ Dawid gebe” Aôm gôgôm jagêdêŋ kêlêlêc aê. Gebe aê kakêŋ sec gêdêŋ aôm, mago aôm kôkêŋ moasiŋ gêjô su. 18 Ocsalô tonec Apômtau kêkêŋ aê kasêp aôm lêmam, mago gôjac aê êndu atom. Tec gêwa aôm sa gebe kômoasiŋ aê ŋanô. 19 Ŋac teŋ embe êtap nê ŋacjo sa oc awi eŋ siŋ êc toôli samucgeŋ ana me. Amboac tonaŋ Apômtau êmoasiŋ aôm êjô gêŋ, taŋ ocsalô tonec gôgôm gêdêŋ aê naŋ. 20 Ma galoc ôlic acgom, aê kajala gebe aôm oc ôtu kiŋ ma Israelnêŋ gôliŋ kiŋŋa tonaŋ êsêp aôm lêmam ŋalêlôm. 21 Amboac tonaŋ ôtôc lêmam ôkô Apômtau laŋônêm gebe embe jamac êndu su, go onseŋ ŋoc wakuc su atom ma ômbuŋ ŋoc ŋaê su aŋga tamocnê gôlôac nêŋ atom. 22 Ma Dawid kêtôc lêma gêdêŋ Saul. Go Saul gêmu gêja nê malac ma Dawid to nê lau sêpi malac ŋajaŋa sêja.