6
Sêsakiŋ poac ŋakatapa gêmu gêja Israel kêtiam
1 Apômtaunê poac ŋakatapa kêkô gamêŋ Pilistiaŋa ajôŋ 7 su acgom,
2 go lau Pilisti sêkalem nêŋ dabuŋwaga to lau sêpuc kapoacwaga sêkac sa ma sêsôm gebe “Aêac daŋgôm asageŋ êtu Apômtaunê poac ŋakatapaŋa. Asôm êndêŋ aêac acgom, aêac tasakiŋ gêŋ tau êmu êna ŋamala êtiam ŋalêŋ ondoc.”
3 Go êsêac sêjô êsêac aweŋ gebe “Embe asakiŋ Israelnêŋ Anôtônê poac ŋakatapa êmu êna, go asakiŋ ŋaômageŋ atom. Anac da taôm êwiŋ acgom, go amac ôlim ŋajam êsa ma amac ajala Apômtau Anôtô lêma kêkôniŋ amac gêwi siŋ atom ŋam.”
4 Êsêac têtu kênac kêtiam gebe” Aêac anac da tauŋ ŋa asageŋ.” Tec êsêac sêjô êsêac aweŋ gebe “Kamocmatu ŋakatu gold lemeŋteŋ to moadec ŋakatu lemeŋteŋ êtôm lau Pilisti nêŋ gôliŋwaga nêŋ namba gebe gêŋwapac tonaŋ kêtap amac to nêm gôliŋwaga sa kêtôm taugeŋ.
5 Amansaŋ nêm kamocmatu to moadec, taŋ geseŋ gamêŋ samob naŋ ŋakatu ma atoc Israelnêŋ Anôtô sa, oc moae eŋ êkôc nê lêma ŋawapac su aŋga amacnêm to aŋga nêm anôtôi nêŋ ma aŋga nêm gamêŋ.
6 Amac abe nêm ŋalêlôm ŋadani êsa êtôm Parao to nê lau Aiguptu nêŋ êtu asageŋŋa. Taêm ênam biŋ, taŋ Anôtô tonaŋ gêgôm êsêac têtu meloc e sêwi lau Israel siŋ sac sêja naŋ.
7 Galoc amansaŋ kareta wakuc teŋ ma akôc bulimakao têna luagêc, taŋ sêkêŋ su gêdêŋ ŋalatu sêmoa ma sêjala sê kareta teŋ su atom tageŋ naŋ. Ma akêŋ bulimakao tonaŋ sê kareta, mago akêŋ ŋalatu sêmu sêna sapa.
8 Ma akêŋ Apômtaunê poac ŋakatapa êkô kareta ŋaô ma akêŋ ŋakatu gold, taŋ êtu da naŋ, êsêp gadob teŋ êkô êwiŋ katapa, gocgo awi êsêac siŋ tauŋgeŋ sêna.
9 Ma alic acgom, embe sêsa intêna malac Betsemesŋa, oc ajala gebe Anôtô tau kakôniŋ amac ŋa gêŋwapac. Embe masi oc ajala gebe gêŋ tonaŋ ênê lêma gêjac aêac atom, kêtap aêac sa ŋaômageŋ.”
10 Tec lau sêgôm amboac tonaŋ. Êsêac sêkôc bulimakao luagêc, taŋ sêkêŋ su gêdêŋ ŋalatu sêmoa naŋ, ma sêkêŋ sa kareta ma sêkôc ŋalatu tau su sêmoa sapa.
11 Go sêkêŋ Apômtaunê poac ŋakatapa kêkô kareta ma gadob tomoadec gold ma tokamocmatu ŋakatu gold gêwiŋ.
12 Bulimakao têna sêsêlêŋ gacgeŋ sepeŋ malac Betsemes. Sêsêlêŋ tataŋ-têtaŋ ma sêwi intêna siŋ sêmu anô me gasêŋa sêja atomanô. Gôliŋwaga Pilistiŋa têdaguc êsêac e dêdêŋ lau Betsemes nêŋ madiŋ.
13 Gêdêŋ tonaŋ lau Betsemesŋa sejoŋ mopolom ŋanô sêmoa gamêŋ gaboaŋ. Sêôc mateŋanô sa ma sêlic poac ŋakatapa tec tatu samuc ma sêpuc kareta tôŋ-tôŋ sêja.
14 Bulimakao sê kareta tau jagêô lasê Josua aŋga Betsemes nê kôm ma kêkô. Poc kapôêŋ teŋ kêkô ŋagala. Amboac tonaŋ êsêac sêga kareta ŋaka popoc ma sêkêŋ bulimakao têna luagêc tonaŋ katu daja gêdêŋ Apômtau.
15 Lau Lewit sêkôc Apômtaunê poac ŋakatapa to gadob, taŋ da goldŋa kêsêp ŋalêlôm naŋ, su ma tetoc kêkô poc kapôêŋ tonaŋ ŋaô. Ŋacwaga Betsemesŋa sêkêŋ daja to da sêniŋ sêwiŋŋa gêdêŋ Apômtau gêdêŋ bêc tonaŋ.
16 Lau Pilistiŋa nêŋ gôliŋwaga lemeŋteŋ sêsala gêŋ samob tonaŋ su, go sêmu sêja Ekron gêdêŋ bêc tonaŋgeŋ.
17 Kamocmatu ŋakatu gold, taŋ lau Pilisti sêsakiŋ kêtu sêjac da tauŋŋa gêdêŋ Apômtau naŋ, malac Asdod to Gat ma Askalon to Gasa ma Ekron. Tageŋ-tageŋ kêtom êsêacnêŋ malacgeŋ.
18 Moadec gold gêjô lau Pilisti nêŋ malac samob, taŋ gôliŋwaga lemeŋteŋ tonaŋ sêjam gôliŋ naŋ, malac tuŋbôm ma tuŋbôm masi. Poc tau kapôêŋ, taŋ êsêac tetoc Apômtaunê poac ŋakatapa kêkô ŋaô naŋ, gêŋgôŋ Josua Betsemesŋa nê kôm ŋagala. Poc tonaŋ kêtu ŋabelo gêŋgôŋ gêdêŋ tonê e gêdêŋ galoc.
19 Ma Apômtau gêjac lau Betsemesŋa ŋagêdô gebe êsêac têtu kêniŋ kêsêp Apômtaunê poac ŋakatapa ŋalêlôm. Eŋ gêjac êsêacnêŋ ŋacwaga 70 êndu. Ma lau têtaŋ taŋiboa gebe Apômtau gêjac êsêac secanô.
Poac ŋakatapa mêŋkêkô Kiriat-jearim
20 Go êsêac ŋacwaga Betsemesŋa sêsôm gebe “Asa êtôm gebe êkô Apômtau, Anôtô dabuŋ tonaŋ laŋônêm. Aêac tasakiŋ gêŋ tau êndêŋ asa lau gebe êmoa êwiŋ aêac atom.”
21 Go êsêac sêsakiŋ biŋ gêdêŋ lau Kiriatjearim gebe “Lau Pilistiŋa sêkêŋ Apômtaunê poac ŋakatapa gemu gêmêŋ. Asêp amêŋ ma akôc êpi êndêŋ amac êwac.”