15
Yesu Shi Sig Aràg Bin Inabi
1 Yesu dang rag, “N shi síg nì bin inabi àjai, Tamí shi síg nì àsàin da-à.
2 Tamí ri tìg kìfinn ayab bín zyun-à ri wan fig awan bàna. Ku ri tìg samyib ayab bín-à ri wan awan, jirà aku shi ákyàr ma aku wan swàb kà.
3 Tàma-à níng, ning shi sig rag ákyàr á shinn jírká ǹ dinya sig ning níng.
4 Aning shi á byarmí ni, mì má má shi á byarná ni tìnn, àràg barà ayab inabi má wan fig awan awínwá ni bàna, sái kwa bàg hing á dìr murwá ni. I bu-à sa ning má, ná shi sar fig awín ná ni bàna, sái ma mì.
5 “N shi síg nì bin inabi, ning bó ning shi síg ni ayabká. Mpìr-à ma shi sig ma mì, mì má má shi ma ku tìnn. Kwá wan awan nìnànn nímá. Ná sa yì sar fig bu zyun ma shinn ná bàna, sái ma mì.
6 Mpìr-à ma shi fig ma mì bàna, ku shi sig àràg ayab bín-à big kyag tafinn sig, wim rìghing. Bá zà kwonn ayab bínká hi, má takà mà pyìr-à ni, mà byar-à bá swànn gban rìg.
7 Wà na shi sig ma mì, jírmí ma shi sig á pìkyinn ná ni tìnn, bu-à ning ma ri zìm wà na vig hing mì, má ya ning.
8 Aning wan awan nìnànn nímá. A byar-à níng hi, mpìrká má swam yan zìnn Tamí, hár bá myàng yì wà ning í yann sukàmí big.
9 Barà Tamí ri zìm mì níng, í barà mì má, mì ri zìm ning áni tìnn. Aning sìnn kà azìm-à mì ri zìm ning níng á pìkyinn ná ni.
10 Wà na wib hing jírmí, ná gàb fig dìr ma azìmmí bàna, àràg barà mì má ǹ wib sig jir Tamí, ǹ gàb fig dìr ma azìmwá bàna níng.
11 “Mì ri dinya ning àdòníng, àjirà aning fig àjwár àràg barà mì ri fig níng. Ajwár-à hi aku shi hár kinn kinn.
12 Wàníng í jírmí, aning zìm ba dìrná àràg barà mì ri zìm ning.
13 Mpìr-à ma ri zìm jàuwá hár ma ya hing yonkiwá á dò jir shinn jàuwá ni, azìm-à má kab wàníng hi bàna.
14 Wà na sa hing bu-à ǹ dinya sig ning níng, ná shi jàumí.
15 Má bar fig rag ning fàu bàna, jir kai bàna fàu ri yì fig bu-à shinn luwá ri sa bàna. Ama má bar ning jàumí, jir kai bàna bu-à ǹ fig sig mà byar Tamí, ǹ dinya rìghing ning.
16 Ning shig fíg mì nì bàna, ama ǹ shig zu síg ning nì, ǹ ya sig ning gbam àjirà aning yag wan awan nìnànn nímá, awan-à hi aku shi nonn. A byar-à níng hi, Tamí má ya ning bu-à ná vig ku á zìnnmí ni.
17 Bu-à mì ri zìm aning sa í wàníng, aning zìm bar dìrná.
Mpìrká á Dunyaru Ri Zib Yann Sukà Yesu
18 “Kó mpìrká á dunyaru ma zib hing ning, aning kyab pànn rag big zib jag síg mì.
19 Wà ning nìm ma í bu dunyaru, mpìr dunyaru nìm má zìm ning. Ama jirà ning í bu dunyaru bàna, í bu-à sa mpìrká á dunyaru zìm fig ning bàna. Mì í àsàin-à shig zu sig ning.
20 Aning kyab pànn bu-à ǹ dinya sig ning, fàu má kab fig àsàin luwá bàna. Wà ba du kà mì shwìn, ning má bá du kà ning shwìn tìnn. Wà ba wib hing jírmí, bá wib jírná tìnn.
21 Mpìrká má ya ning shwìn jir shinnmí, jir kai bàna big yì fig mpìr-à swam bi sig mì bàna.
22 Wà ǹ nìm ma bi fig ma dinya fig big jír bàna, wàníng big nìm bàna ma bu pyìr, ama tàma-à níng big bàna ma pyù-à bá dang pinn zu shinnbá á jir bu pyìrbá ni.
23 Mpìr-à ma ngàng mì, ku ngàng hing Tamí tìnn.
24 Wà ǹ nìm ma sa fig bu-à kab gbam wà mpìrká má sa bàna, wàníng big nìm bàna ma bu pyìr. Ama tàma-à níng big myàng hing bu mamaki-à ǹ sa sig, ama hár tàma-à níng big ngàng mì ma Tamí tìnn.
25 Big ngàng mì àdòníng, àjirà bu-à big ba sig á jir Shìdun ni aku shi àjai. Big ba sig rag, ‘Big ngàng sig mì átai, ǹ sa fig bu zyun bàna.’
26 “Ama má swam bi ya ning Awun Shìdun mà byar Shìdun. I Awun zyun-à má dinya ning jír àjai, kwá bi shang ning. Ku í àsàin-à má dang jír á shinnmí ni.
27 Ning má, ná dang jír á shinnmí ni tìnn, jir kai bàna ning shi sig ma mì tìnn, sai-à wà jijag hár tàma-à níng.