1 Yesu a tre ni ba ngari ni misali a ndi, 2 “Igbu u chu ngbungblu'a he na ichu ri wa si tie gran ni vren ma. 3 Atru ba gran ma ndu ba hi yo bi wa bana hla bawu ndu ba ye ni lo gran, u bana ye na. 4 U chua ala ton gran ma bari nda tre, 'Hla ni biwa mi yo ba, Tomba, mi kle biri u gran ye. Mi han kiekle lando lilon, ni ba mri nze lando ni mbrukpi ba mi tie ba wawuu ye ni bubu gran.' 5 U ndi bi kima ba kana nyme ni yo'a na nda hi kpa mla Iri hi rju, u ri bubu u lema. 6 Imbru mba baka vu ba gran chu'a nno ba nkpon ya, nda wuu ba.' 7 U ichu'a ka tie nfu, nda ton ba soja ma hi ka suu tu biwa ba wuugran ba nda gon gbu mba. 8 Nikima, a hla ni ba gran ma ba, 'Ba kle ndu u gran a ye u bi wa bayo ba'a bana mlau ye na. 9 Nitu kimayi bika hi ni nyu nkon ndi yo gbugbu ndji wa bi toh a ndu ba ye ni gran'a. 10 Igran ba baka hi ni nkon nda ka gbu ndji wa ba toh a ye, ni bi bima niwa bana bina. U tra u gran ka su pui me ni bi tsri. 11 U chu'a ye nda ni toh bi tsri ba, nda toh indji ri wa ana sru kpi u gran na. 12 U chua mye, 'Ikpan mu, u tie ni he ndi ri ye wa hama ni kpi u gran?' Igua ka wa ikpye u trea hama. 13 U chua hla ni gran ma ba, 'Vu ghuyi lo' woni za, ndi kau taga ni mi bwu,' iwrji wa ani yi nda tan nyinyiere na. 14 Ahi ndi gbugbu wa ba yo, u fyi me yi ba chu ba.'” 15 U Farisawa ba baka hi nda ka sron mu u nkon wa la vu ni tre ma'a. 16 Baka tru mri koh ba ni Hirudiyawa hi ni wu. Baka tre na Yesu, “Mala, kie toh wu u indji u hla tre njanji, ndi ni tsro nkon Bachi njanji me. U na ya kri ni tre ndi na ndji na tsro son tu ni ndji na. 17 Hla tawu, ahi ngye hi mre me? A he tu nkon ndu ba han ban ni Kaisar ka a'an?” 18 U Yesu a toh meme mba nda tre, “Anitu ngye mba bi tsra me, biyi bi tie brji? 19 Tsro me nklen u bana. “Niki yi baka nji dinari ri ye nno. 20 Yesu a tre ni ba, “Ahi yu nha ni nde nha mba he ni wayi? 21 U ba hla wu, “Ahi u Kaisar.” U Yesu ka hla bawu, “To kima, nno Kaisar ikpyi bi Kaisar, u ni Irji ikpi bi Irji. 22 Wa ba wo toyi, baka manji ma wakran. Ba donwu me nda hi kpa mba. 23 Ni vi kima Sadukiyawa bari, wa ba hla ndi tash'me na he na, ba ye niwu. Ba mye wu, 24 ndi, “Mala, Musa a hla, 'Indji wa a khwu nda na he ni mri naa, a gbigbi ndu vayi ma ndu gran wama nda ngrji mri ni vayi ma. 25 Imri vayi bari tangban ba na he. U mumla a gran nda kwu. Nitu wa ana ka mri don na, a ka wama don ni vayi maa. 26 U vayi ma u haa ngame ala tie tokima me, u'u traa me, hi niwu tangban a. 27 Iwa ngame ye khwu hu ba tangban mbawu. 28 U ni vi u tash'me, iwaa ni u nha nime tangban ba? Niwa wawu mbawu ba gran wu. 29 Yesu a saa nda hla bawu, “Bi kadu, niwa bi na toh embe ba na ni ngbengblen Irji na. 30 Ni tash'me a, bana gran na nda na nno gran na. Ana he tokima na, ba he tu Malaiku bi shulu. 31 U nitu tash'me bi khwu, bina kra kpye wa Rji hla yiwu, nda tre, 32 'Mi hi Rji u Ibrahim, ni Irji u Ishaku, u ni Irji u Yakubu?' Irji na Irji u wa ba khwu'a na, ahi wu wa ba he ni sisren.” 33 Wa jbu ndji ba ba wo wayi, baka manji tsro maa wakran. 34 U wa Farisawa ba wo ndi Yesu a kanyu Sadusiyawa ba, baka yo kpamba shu tie. 35 Iri mba, wa a kpa ka ni duu a, a myewu, nda ni tsra wu - 36 “Mala, ni mi duu'a a riame mba nna wawuu?” 37 Yesu a hla niwu, “'Son Bachi Irji me ni sron me wawuu, ni dri me wawuu, u ni mre me wawuu.' 38 I wayi hi kikle ni duu u mumla. 39 U uhamaa he to kima - 'Son mri vayi me na tume.' 40 Nitu duu hari biyi mba, inkpyi duu a ni anebi baba nji wu.” 41 Niwa Farisawa ba ba kisi shu kpamba tiea, Yesu a nno mba mye ri. 42 A tre ndi, “Ahi ngye ri hi mre mbi ni tu Kristi? A hi vren nha?” Ba hla wu, “Ivren Doda.” 43 Yesu a hla baawu, “U ni he ri Doda a yo wu ni mi brji'a ndi Bachi, nda tre, 44 'Bachi hla ni Bachimu, “ Kuson ni wo korhi mu, se mi ka bi yowu ko shishi zi ni nda za me?'” 45 U Doda ani ta yo wawu wahi Kristi ndi 'Bachi,' u nihe ahi vren Doda?” 46 Indrjo ri ana he nyu u saa kpe ri ni wu na, u indrjo ri na la mye wu kpe ri rji ni vi kima ngana.