Bikoro ba kurare in bi Inde
Yeso maveni aje ma iri anu imumu itari adesa wa isi ikirfi iweme ahira u isome. Ma iri ure unee unu zatu nee uruma ma wuna munini muni mure anyimo me. Ba magu, “Kadure in boo shi, unee unu zatu nee uruma ugemu ma wuna imum me sa iteki iwe me vat uwe. Vat anu aginome wa nya anyimo imun igebesa wa wa zini. Me unee ugeme sa ma zome unu rumaba, anyimo udira umeme ma nya vat imum igebesa ma ma zini u ciki umeme”. Kasi aye sa wa boo abanga udenge Asere, kasi sa abara uni inu yaba ina po ahuma mi ikirfa sa a nyiza, Magu, Ahira imumu iginome sa Ihira, uwui u eze sa nipo nizomi ni inde sa nidi cukuno Aseseri uroni sada tuburko mini adezi ba. Ba wa iki me, agi, “Unudungara, unu maya uni adi wuzi imumu iginome? Nyanini tidi iri ubata uya uni aku tubi. Yeso makabirka, “Wuzani Seki kati uye ma rangishi. Anu gbardang wadi ē anyimo niza num wagusi, 'mimani mē, 'anime', uganiya wa aye mamu kati itarsi we. Ingi ya kunna abanga ani kono nan tikara, kati i wu zabut ba, doli ni imumu iginome i wuzi ani, ibinani ida ayeme debe-debe anime ba”. 10 Ma gun we, “Anu wadi yeze anu, Tigomo tidi yeze a tigomo. 11 Adi wuzi tiwiri ta dizi, ati hira sassas adi kuri awuzi ikomo nan imum iburi ani weme. 12 Ingi imum igino vat adi wuzi, wadi mekishi, wa nya shi tetene, wa nya shi ati denge ta Asere nan ti hira ti ukursoso anu, wade ēn shi aje a gomo na magumna barki nizanum. 13 Idi cukuno shi unaa u bezizi. 14 Barki anime barkani iriba ishi me barkani unā sa idi kabirka. 15 Mi, indi nya shi teze nan ugamirka, sa vat anu ishina ishi me wada ke wa tunno wa gun shi izin macicu ba. 16 Nan anu yoza, nan ni henu, nan nikura nan a roni wadi gā shi wa huzi ayeshime. 17 Konda avi madi game shi barki niza num. 18 Ko nice ni nide nishi ni da wonoba. 19 Anyimo iriba ishew idi uri muriba mushi. 20 Ingi ya ira Urishalima ana nikara mini kono wa kete uni, i rusa urizo unini wa aye. 21 An desa wazi mayahudawa wa sumi uhana uzalan, m an desa wa rā ati anipin wa dusa, kati a ceki adesa wa rā amupin mu cincin wa ribe. 22 Ti wui tiginome ti ugarziza tini, barki vat imum be sa aye Heke i myinca. 23 Shi be shi ana ti puro nan adesa wa hamza ahana a ti yē tiginome, 24 Wadi rizi ufenfan uni gbinang adi ha inwe anyimo ni rere vat ama-nyanga anu zatu tarsa Asere wadi mari Urishalima, u hana uganiya uweme u mynica. 25 Idi iri U iso abanga anyimo uwui nan upe nan iwirang. U nē anu zatu tarsa Asere wadi si nirere, wadi wu hu barki ugumuzo u raba udang nan ibarka imei. 26 Anu wadi wi wa zumi barki biyau nan u gamara abanga imum igesa idi kem unē, adi zuruko ubari Aseseri. 27 Idi ku iri vana unu ma eze anyimo amagaji mari unu bari ninonzo gbardang. 28 Vat uganiya sa imum iginome ya tuba utubsa, hira, tunni, I venki aceshi asseseri, barki ubura ushi wa aye mamu. 29 Yeso ma nya ubata, “Irani utiti upom, nan matiti vat. 30 Uganiya sa wa tuba utirso, idi iri ina ce ashi me bi kwugba ba aye mamu, 31 Ane ani, ingi ya ira imumu igino me izini wuza irusi tigomo ta Asere ta biki. 32 Kadure in boo shi, uge uneme uda maraba, adi wuzi vat imumu igeme. 33 Aseseri nan adizi adi aki, Tize tum tida tida akaba. 34 Hirani cece ashi, kati i noki mu riba mushi unu gamara abanga une nan bisiza siza nan ubasa utize uti cukum. Uwui u eze udi mukurkan duru. 35 Kasi imumu imesi, udi ē ahira akonda avi sa ma vengize a muhenu mu unee. 36 Cukononi uni rusa koya uganiya, in biringara barki i kem ni kara nu cika vat imumu iginome sa idi ē, kasi sa idi tunno aje uvana unū. 37 Unu wui mazi unu dungara anyimo udenge Asere, vat niye maka dusa anipo sa agusan ni uzaitun. 38 Vat anu waka dingi uhaza ahira ame nisisizo barki wa kunna me udenge Asere.