ዎስኒ ሜኒ ዎስቶ
ጋችግሩ
ዎስኒ ሜኒ ዎስቶስ ሉቃስኒ ምስራቹኒ ካማስ ቱሱ። ማፃፋሲ አሪክ ቾዋ ቴሱኒ የሱስ ክርስቶስኔን አነ ሀማ አሱኒ ሜያ ኮርቶ አያናክ ዞኑስቴሴሬ ባሳ ቾዋሲክ ማኬፋ ምስራቹኒ ካማሶን የሩሳለሙክ፥ ዩዳኒ ዳ ዙታምባሴ አሲስ፥ ሳማሪያኪ፥ ሀማ ዳኒ ድልታ ካርአናኔን (1:8) ኣካክ ዝኢስሴቴማቶቱ ማኬፋ። ማፃፋሲ ክርስትናን አማንቶስ አይሁድኒ ሜኒ ጋነያስ ጃማርቴራ ዳስታክ ፌ አሱ ዙታምባሴ አሲ አማንቶ ስናና ካባኔን ኣካክ ዝእናማቶቱ ቶቾየፋ። ትች ባር ክርስታናን ሜያ ሮምን ታቴ ሜኒ ታቶስ ሾርኩክ ስሬ ስሬ ጃልሱክ ካብሴፌ አሱኒ ሜያ ስና ቤዮቤሲሶናዋ ክርስትናን ሀይማኖትስ አይሁድኒ ሜኒ ሀይማኖትሶን ቱኑንር ስንናማቶ ቤሱክ ችማ ካቦ ካቤ።
ዎስኒ ሜኒ ዎስቶስ፤ የሱስኒ ቾዋሲክ ማኬፋናስ ምስራቹኒ ካማስ ካርና ድማ ዎንና ዎንና ታግት ሀሚባሶናዋ ቤቴክርስታንን ካፑቶሶን ቤስፋ ኬዝ አርቶ አርቶ ድምታ ማዳብቶክ ችማና።
1. ክርስትናን ሀይማኖትስ የሱስኒ ሳማ ሀማስኔን ኦርፎ የሩሳለሙክ ጃማርቶባስ፤
2. እስራኤልኒ ዳ ዙታምባሴ አሲስታ ካርባስ፤
3. ሮምኖኔን ጌዳ ሜድቴራኒያኒ ባሪስ ብራቶታ ፋሴ ዳስታክ ዝኡባስ፤
ዎስኒ ሜኒ ዎስቶስ አምማኖን ኬሳ ቢስቴፋስ ኮርቶ አያናስ ዎስቶ ስኒፋት ፐንጠኮስቴኒ ዎኖ የሩሳለሙክ ፌሴ አማኝ ሜያስታ አካማ ሁግናክ ኬሮባስ፤ ኤሲስማቶ ማፃፋሲ እሳርባ እሳርባሲክ ኩን ዛግቴ ዉዛሲክቶ ዙታምባሴ ቢስቴናስማቶ ኮርቶ አያናስ ቤቴክርስታኒሶናዋ ባር ዞንሲስና ዞንሱባሶንናዋ ችኑባሶንና ዳይስፋ። ዎስኒ ሜኒ ዎስቶስ ዛግቴ ዉዛሲክቶ ዎስያስ አማኝኒ ሜኒ ካስናዋ ቤቴክርስታንን እሳር ስናሲክ ፋ ሁግናስ አዉነ ፋ አካማ ስንናማቶቱ ማኬፋ።
ማፃፋሲ ስሩክ ኤጵና ኤጶባስ
ዛላ ስናክ ሆሮ 1:1-26
የሱስ ኮእባስታ እምና አጃጅነዋ ኮርቶ አያናሲ ዮኒ አብድነ 1:1-14
ዩዳኒ ኤዴሲ ግሪ አሱሳ ቾዋ 1:15-26
የሩሳለሙክ ማክቴ ዛላ 2:1—8:3
ዩዳክናዋ ሳማሪያኪና ማክቴ ዛላ 8:4—12:25
ጳዉሎስ ዎሲ ስንነ ሀሚባስ 13:1—28:31
ዎሲ ስንነ ቴስሬ ሀማ 13:1—14:28
የሩሳሌምኒ ዙቶ 15:1-35
ዎሲ ስንነ ሄፕሳ ሀሚባስ 15:36—18:22
ዎሲ ስንነ ኬዝሳ ሀሚባስ 18:23—21:16
ጳዉሎስኒ የሩሳለሙክ፤ ቅሳርያክናዋ ሮሙክና ታቶባስ 21:17—28:31
1
1 ቴዎፍሎስኖ! ዜሞቲ ትችና ትቻስታ የሱስ ዎስቴና ዉዛሴዋ አሲና አሱሴ አሲና ትችጝዋ። ኤስ ትችናስ ደይ ዎስቶባሶን ጃማሬና ዎናስታን ካብግራ፥
2 ደን ሳማ ሀማና ዎኖኔን ካርአ ዎስቴና ዎስቶሶጝዋ። ደን ሳማ ሀሚናስ ባር ኮርና ዎስባሲክ ኮርቶ አያናሲክ ካሞ አጃጅባሶን እምናኔን ኦርፎዋ።
3 አካማ ሻናሶን ኤጴቴሬ ክትናኔን ኦርፎ ሀየዉ ስንነ ፎባሶን ሾዎ ኡግናክ አምማኖን ቢስቴ ዛላክ ኬሴ ባሶክ ቤስቴ። አቼቻስር ዎና ኬሴ ቤስቴፋፌ ሀኦሲ ታቶኒ ቾዋኖን ባሶክ አሲ።
4 ባሶኔን አነ ፌና ካባሲክ ኤካ ይሬ አጃጀ፦ «ታ ማኬና አባስኪን እምቴ አብዲሶን ኦድትታኖ የሩሳለሙን ኬሳትታ።
5 ዮሀኒስ አካክቱ ሀጵቅ፤ ስኑንታኖ ንቶ ጋሮ ዎናኔን ኦርፎ ኮርቶ አያናክቱ ሀጱቅቶት» ይ።
የሱስ ደን ሳማ ሀሚ
(ማር. 16:19-20፤ ሉቃ. 24:50-53)
6 ባሶ የሱስኔን አነ እሳሪክ ዙቴሬ ፌሴቴን፦ «ዳሚሶ! እስራኤልኒ ታቶሶን ዎልግራ እማታ ዎናስ ሀሽኖሶ?» ይት ማሙሴቴ።
7 የሱስ ደይ ዎልግሬ፦ «አባስ ባሳ ሀእሱኒ ሁግናሲክ ሆስና ዎናሴዋ ነያሴ አሲን ንቶ አሩትክ ኣፋዋ ችማት ዉዛ።
8 ስኑንታኖ ኮርቶ አያናስ ንቶስታ ኬሬፋና ካባሲክ ሁግና ዳናትዋ። ኤስ ካባሲክ የሩሳለሙክ፥ ዩዳክ፥ ሳማሪያኪናዋ ሀማ ዳኒ ድላ ካርአናኔና ታክ ዛል ስናትዋ» ይ።
9 ኤስ ባሮን ማኬናኔን ኦርፎ ባሶ ብየፌን ደን ሳማ ሀሚ። ሻሩስ ደይ ባሪን ኤጳ ኣፌሲስኒ ኣቺ።
10 ባር ደን ሳማ ሀሚፌን ባሶ ደይ ደን ሳማ ኮትክሬ ብየፌን ዲንቆነ ፎሮ ማማ ማዮ ሄፕ አሱ ባሶ ቴሻ የሬፋት፦
11 «ንቶ ጋሊላክ አሱ! አዋጋን ደን ሳማ ኮትክራ ብየት የሬትሪንሶ? ሀን ደን ሳማ ሀሚፌን ብየት የሱስ ደን ሳማ ሀሚፌን ብየትሲማቶ ዎል ሌ ደይ ዮኒርዋ።»
ዩዳኒ ኤዴስ ማትያስ ኮርቴ
(ጋማ. 109:8)
12 ኤሴን ኦርፎ ዳብራዛይትኒ ኩማስታን የሩሳሌም ዎልሴቴ። ኤስ ዳብራዛይትኒ ኩማስ የሩሳሌምኒስታን ዎክባስ እሳ ቤይሳኒ ዎን ኒ ኩቱኒ ኡግና ስናና።
13 የሩሳሌም ዬሴሬ ደን ዲሴፌ ሴጌነትስታ ኬሴቴ። ኤስ ኬሴ ባሶ ደይ ጴጥሮስ፥ ዮሀኒስ፥ ያቆብ፥ እንድርያስ፥ ፍልጶስ፥ ቶማስ፥ ቤርቴሎሜዎስ፥ ማትዮስ፥ እልፍዮስኒ ና ያቆብ፥ ኮነር ይስቴፌ ስሞናዋ ያቆብን ና ዩዳና።
14 ኤስ ባሶ ዙታምቤሲሴ እሳሪክ ሀኦኒ ሺጶክ ዎንና ዎንና ዙቴሴት ፌሴቴር። ባሶኔን አነ ደይ እሳ እሳ ማሽካ ሜያ የሱስኒ እንቶ ማራሚ ኤሲስማቶ ደይ የሱስኒ አይን ሜያ ፌሴቴር።
15 ኤስ ዎኖ ጴጥሮስ ትሬዋ ሄፓስሬ ስኒ አማኝኒ ሜኒ ጋነሲ የሬፋት ኤካ ይ፦
16 «አይን ሜያነ! የሱስኒን ኤጳ ባሶክ ዞንስ ስና ዩዳኒ ቾዋሲክ ኮርቶ አያናስ ዜምማ ዳዊትኒኪ ካሞ ማኬና ትቻስ ካማ ኮኡናክ ሾልሱዋ።
17 ዩዳ እንኖስን እሳር ስንነ ፋድቴሬ ሀን እንኖ ዎስቴፌን ዎስቶሶን ዎስቴት ፌር።
18 ስኑንታኖ ሀን አሱስ ኤስ ዎስቴና ማጙ ዎስቶባስ ዋጋክ ዳ ዋጌ። ኤስታን ስኒባሲክ ጋንደሬ ኪጤክ ካራቴ። ኬናሽባስ ደይ ፌእቴ።
19 ኤስ ቾዋሲ ደይ የሩሳለሙክ ፌሴ ባሶ ዙታምቤሲሴ አሲክ ኦድቴ። ኤስ ባሪ ቦርኣ ኤስ ዳስ ባሶ ኖኖሲክ፦ ‹አኬልዳማ› ይስቴራ ቴግቴ። ኮትባስ ደይ፦ ‹ሀርንኒ ዳ› ኡ።
20 ኤስ ባር ስንናስ ጋምን ማፃፋሲ፦
« ‹ፎና ኬባስ ኦና ስንፋውጝዋ፤
ኦኑ ባርስ ፎናታዋ›
ደይ፦ ‹ባርኪ እምቴ ዎስቶሶን፤
ኦም አሱ ባሳስታን ኤጴ ዎስቶዎዋ።›
ይስቴራ ትቼና ቦርአዋ።
21 «ኤስ ባሪ ቦርኣ ዳም የሱስ እንኖ ጋነያስ ኩቲት ፌና ካባሲክ እኖኔን አነ ፌሴ ባሶስኒ፤
22 ኤሲስማቶ ደይ ዮሀኒስኒ ሀጵቁስታን ካብራ ዳም የሱስ ደን ሳማ ሀሚና ዎናስታኔን ካርኤ አነ ፌሴ አሱኒ ሜያስን እሳ አሱ እኖኔን አነ ክቱኒ ካቡባስ ቾዋሲክ ዛል ስናናክ ሾልሱዋ።»
23 ኤሴን ኦርፎ ሄፕ አሱኒን ኤጴ ዬሴቴ። ኤስ ባሶ ደይ ባርሳባስ ወደይ እዮስጦስ ይስቴፌ ዮሴፍናዋ ማትያስና።
24 ኤካ ይሴሬ ሺጵሴቴ፦ «አሱ ዙታምባሴ አሲ ንባኖን አሪፌ ዳሚሶ! ሀን ሄፒሳስኒ ኦኒን ኮሪታማቶ ነ እኖክ ቤሱዋ።
25 ሺጴፌኒስ ዩዳ ቤየ ባሳ ቴትን ድማስ ሀሚና ዎስቶሴዋ ዎሲ ስናሶን ኤጴቶኒ ባርና እኖክ ቤሱታክዋ»
26 ኤስታን እጣሶን ሀእሴቴን ማትያስኒክ ኬስ። ኤስ ባሪ ቦርኣ ባር አሲሬ እሴ ዎስኒ ሜያኔን አነ ፋድቴ።