ዎሲ ጳዉሎስኒ ዎሲያ
ቆላሲያሲኪ አሱኒ ሜያክ
ጋችግሩ
ሀን ዎሲያስ ትቼናስ ኪስኩ ኢስያ ኤፌሶንኑክ አዋ ኬስንናርኪ ዎል ላ ፋ ቆላሲያስኒ ካታማሲ ፋ ቤቴክርስታኒሲክዋ። ኤስ ቤቴክርስታኒስ ኬቴናስ ጳዉሎስኒክ ስና ቤይፋናክኑ ሮምኒ ሀእሱሲ ስና ኢስያኒ አሪኪ ካታማ ስና ኤፌሶኑን ምስራቹኒ ካማሶን ማክሶነክ ጋፍኪና አሱኒ ሜያ ፌሴቴር ስንና ቦርአዋ። ቆላሲያስኖን ደይ ሀእሱናክ እምቴራ ፋር፤ ቆላሲያስኪ ቤቴክርስታኒሲክ፦ «ሀኦሶን አሩክናዋ ቱማ ፋሩ ዳናክ አሱ እሳርባ እሳርባስ ሜንፌሳዊ ሁግናሲክቶክናዋ ሀእሱኒ ሁግናሲክቶክና ሳጋዶናክ ሾልስፋዋ» ይሴፌ ኤሽቱ አስሲኛኒ ሜያ ፎሶቤሲሶን ጳዉሎስ ኦዴሬ ፌር፤ ኤስ አስሲኛኒ ሜያ ማክሴፌ ኦማ ዉዛስ ደይ፦ «አሱ እሳርባ እሳርባስ ሃርኮኒ ኩኑስነ ፋ ስትሪሲክ ሀኡናክናዋ ሙሶንና ደይ ኦማ ኦማ ዱቢዮሶንና ኦዳናክ ሾልሲፋዋ» ይፋርዋ።
ጳዉሎስ ሀን ዎሲያሶን ትችናስ ፉቶኒ ክርስትንናኒ ዎሲያሶን እምሜ ባሶ ኤሻ አስሱሶን ቱጋኦናክዋ። እምና ዎልጉሲክቶስን አርኪስ፦ «የሱስ ክርስቶስ ቱማ ፋሩ እማርዋ፤ ሀን ኦማ አማንቶሴዋ ዎስቶሴ ባሳስታን ዎክስርዋ» ይፋ ባሮጝዋ። ሀኦስ ክርስቶስኒኪ ካሞ ዳሶን ቴሲዋ፤ ባርኪ ካሞ ባሪኪ ዎልግራ ቴሾናዋ፤ ሀን ዳስ ፋሩና አብዲስ ፎናስ ክርስቶስኒን ንብስን ካብግሬ አማኖክ ኮእባዋ። ኤስ ባሪክቱ ጳዉሎስ ሀን አካማ አማኝኒ ሜኒ ካስ ኣካክ ቢስቶክ ችማናማቶ አሲ።
ሀን ዎሲያሶን ጳዉሎስኒኪን ኤጴ ቆላሲያስ ካቱክ ዎስቴሬ ሀማስ ትቂቆስኔን አነ ደይ ፌ አናስሞስ ፌር ስንባሶን ብያ ማአርዋ። ጳዉሎስ ኤስ ኦነስሞስ ይስቴሬ ቴግቴፌ ቦዚስን ካብግሬ ፍልሞናኒክ ኦማ ዎሲያ ትችዋ።
ማፃፋስ ስሩክ ኤጵና ኤጶባስ
ጋችግሩ 1:1-8
ክርስቶስኒ አማላሴዋ ዎስቶሴ 1:9—2:19
ክርስቶስኒኪ ካሞ ቤስቴ ጋድዶ ካ 2:20—4:6
ኮርኡባ 4:7-18
1
ዎሲ ስና ጳዉሎስኒ ዎስሲያ ቆላሲያስኪ አሱኒ ሜያክ
1 ሀኦኒ ሳፋራሲክ የሱስ ክርስቶስኒ ዎሲ ስና ጳዉሎሲኪንናዋ አይኒ ስና ትሞትዮስኒኪንና።
2 ቆላሲያሱክ ፌሴ ክርስቶስኔን አነ ፎክ አማናምቶ ስና አማኝኒ ሜያክ አባኒ ስና ሀኦስኪን ኦቱምነዋ ናጋነ ንቶክ ስንፋውጝዋ።
ጳዉሎስኒ ጋላታ ቆላሲያሲኪ አሱኒ ሜያክ
3 ንቶክ ሺጴፌኒ ካባሲክ ዳም የሱስ ክርስቶስኒ አባ ስና ሀኦሶን ዎንና ዎንና ጋላቴፌኒዋ።
4 የሱስ ክርስቶስኒስታ ፋ አማንቶኒትሴዋ አማኝኒ ሜያ ዙታምቤሲሴ አሲክ ቤሴስቲ ኬሽታናሴ አሲን ኦደኒዋ።
5 ፉቶኒ ካማ ስና ምስራቹኒ ካማስ ዜምማ ንቶኪ ካርፋና ካባሲክ ኤስ ባርስሲ ፋ አብዲሶን ኦደትዋ፥ ኤስ ባሪ ቦርኣ አማንቶኒትሴዋ ኬሽታንኒቲሴ ካፑቴራ የሬናስ ደን ሳማኪ ሆሬራ ንቶትን ኦድኒ አብዲስታዋ።
6 ንቶ ምስራቹኒ ካማሶን ኦደሴቲ ዎኖኔንናዋ ሀኦሲ ኦትማ ፉቶ ስንናማቶ አሪቲ ዎኖኔንና ካብግራ ሀን ምስራቹኒ ካማስ ንቶ ጋነያሲክ ዳ ዙታምባሴ አሲስ ጋንባ ጋነት ደይ ታግቱ ፋርዋ።
7 ኤሲስ ደይ እንኖ ኤዴ አማንቶ ክርስቶስኒ ዎስትኛ ስንና እኖኔን አነ ደይ ዎስቴፌ ሹንቶ ኤጳፍራ ንቶክ ማኬዋ።
8 ኤሲስማቶ ደይ ባር ሀኦሲ አያናክ ንቶክ እምቴ ኬሽታናሲክ ንቶትና ንቶትና ዎል ኬሽቴት ፋትማቶ እኖክ ማኬዋ።
9 ኤስ ባሪ ቦርኣ እንኖ ኤስ ባሮን ኦደኒ ዎናስታን ካብግራ ንቶ አያናኒ ፎሲ ቴችማክናዋ ያዳታክና ሀኦሲ ሳፋራኖን ጋሳሱክ ቱማ አሩኒት ፎናክ ንቶክ ሀኦሶን ሺጶ ኣነ ቤየኒዋ።
10 ኤሲስማቶ ደይ ዳሚሲክ ሾልሱ ስና ፎ ፋራ ባሪን ግርሱትክ ደይ ማአሪ ስና ዎስቶኒ ዎስቶክ ጋና ጋናትክናዋ ሀኦሶን አሩክ ድቼት ሀማትክናቱ ሺጴፌንዋ።
11 ዳሚስ አካማ ቴጋ ሁግናባሲክ ችምባሶን ዙትሬ ንቶክ እሞዎዋ። ዙታምባሴ አሲን ፋክያክ ችምማ ግራክ ሆሬሬ ፌር ስንናትክ ንቶትን ዛጋዎዋ።
12 ደይ ቻሬፋሲ ታቶሲ ኮርቶኒ ሜያኔን አነ ሃኦ ዳናትክ ንቶትን ዛግ አባ ሀኦሶን ጋላቶትዋ።
13 ባር ታልማሲ ሀእሱኒ ሁግናስን ፉኤራ ሹንቶ ባሪ ናሳ ታቶሲ ግሩኒክ ዛግ።
14 ባር እኖትን ፉሬን ቦርኒሲ ፋክያኖን ዳንኒዋ።
ክርስቶስ ዙታምባሴ አሲስታን ደናሎ ስንባስ
15 ክርስቶስ ቢስቶኖይ ሀኦሲክ ፉቶኒ ቤሶዋ። ባር ቴስቴ ቴስቶ ዙታምባሴ አሲስታን ደናሎ ደይ ኡዙንዋ።
16 ደን ሳማክናዋ ሀን ዳስታክና ፋ ባር ቢስቴፋ ባሬዋ ቢስቶኖይ ባሬ፥ ሳማኪ ሁግናሴዋ ዞንስፌ ባሶትና፥ ጋኜ ሜናዋ ሀእሱኒ ሁግናቤስ ፋና ባሶትና ዙታምቤሲሴ ቴስቴሴቴስ ባርክዋ፥ ሀኦስ ዙታምባሴ አሲን ቴስናስ ባርኪ ካሞናዋ ባርኪክናዋ።
17 ክርስቶስ ዙታምባሴ አሲስታን ዜምሜ ፌርዋ። ስና ቾዋ ዙታምባሴ ዎል ኤጴራ የሬናስ ባርክዋ።
18 ባር ባሳ አቱ ስና ቤቴክርስታኒሲ ቴትዋ። ዙታምባሴ አሲክ ስና ዜምማር ስናናክ ክቱን ካቡባሲክ ደይ ቴሱኒርዋ።
19 ኤስ ባር ደይ ባሪ ቱማ ውዛስ ናባሳታ ፎናክ አባ ሀኦሲ ፍቃድዋ።
20 ባርኪ ካሞ ደን ሳማኮ ስኑን ሀን ዳስታክ ፋሴ ዉዛሲክቶኖን ዙትሬ ሀኦሲኔን አነ ጋንሲዋ። ማስቃሊስታ ዉክቴ ናባሳ ሀንናክ ናጋ ዛግዋ።
21 ንቶ ደይ ዜምማ ሀኦስታን ዎካ ፋሴትርዋ። ንብንትስ ደይ ማጙ ሳፋራክናዋ ማጙ ዎስቶኒትሲክና ካብ ቾዋ ሀኦሲ ጉማ ስንና ፋሴትርዋ።
22 ስኑንታኖ ሀሽ ንቶ ኮርቶኒ ሜናዋ ካይምኒ ሜና፥ ደይ ዝናባ ፎንቶ አሱ ዛግራ ስንባ ታእሱናክ ናባስ አሻክ ክቱባስታን ካብ ቾዋ ሀኦስ ባርኔን አነ ንቶትን ጋንስዋ።
23 ኤስ ባር ደይ ስናናስ ምስራቹኒ ካማስኪ ካሞ ቤስቴ አብዲሲክ አማንቶክ ዛግራ ዬሬፋትነ ኮእባዋ። ኤስ ኦደት ምስራቹኒ ካማስ ሀን ዳ ዙታምባሴ አሲስታ ፌሴ አሱኒ ሜያክ ማክቴ ባርዋ። ታ ጳዉሎስ ደይ ሀን ምስራቹኒ ካማሲክቱ ዎስትኛ ስንጝዋ።
ጳዉሎስ ቤቴክርስታኒክ ዎስቴና ዎስቶ
24 ሀሽ ንቶ ቦርአ ኤጳታና ሻናሲክ ግሬፋውጙዋ። ባሳ አቱ ስና ቤቴክርስታኒሲክ ክርስቶስ ኤጴቴና ሻናስን ዮእ ባሮን አሽናሲክ ቱኑናዋ።
25 ሀኦሲ ካማኖን ዙትራ ንቶክ አምማኖን ኮታ ማኮናክ ሀኦስኪን ታክ እምቴ አዳራሲማቶ ቤቴክርስታኒሲክ ዎስትኛ ስንጝዋ።
26 ኣታ ነያሲክ ሀኦሲ ካማ ኮንቶሲክ ኣቼራቱ ፋዋ። ስኑንታኖ ሀሽ ሀኦስ አማነፌ ባሶ ዙታምቤሲሴ አሲክ አምማኖን ክስራ ቤስዋ።
27 ሀኦስ ደይ ኮርቶኒ ሜያክ አምማኖን ክስራ ቤሱናክ ሾሌናስ ሀን ኣቾ ቾዋሲ ኡልፍንኒ ኦትማስ ኣዛብ ስና ንቶ ጋነያስሲ አዉነ ፋ አካማ ስንባሶንጝዋ። ኤስ ኣቾ ቾዋስ ደይ አብድክ ኦዴት ፋኒ ኡልፍናስ ቤስቴፋና ክርስቶስ ንቶስሲ ፎባስዋ።
28 አሱ እሳርባ እሳርባስ ክርስቶስኒክ ችምሜ የሬ አሱ ስንነ ቤስቶናክ ዛጉኒክ አሱ ዙታምባሴ አሲክ ቴችማሶን ዙትራ አሱኒክናዋ ኬኡክናቱ ክርስቶስኒ ቾዋሶን ማኬፌንዋ።
29 ሀኦሲ አካማ ሁግናባሲክ ታይሲ ዎስቴት ፋና ቦርአ ኤስ ሁግናስኪ ካሞ ኤስ አላማባስ ኮኡናክ ካቤት አካማኖን ሆፕድፋዉጝዋ።